Nūr-Sūltan qalasynyŋ äkımı Altai Kölgınov osy qyzmetıne kırısken künnen bastap 9 apta ışınde 300-den asa adamdy qabyldaǧan. Är adamnyŋ aryz-şaǧymy boiynşa tiıstı jūmystar jürgızılude.
Osy aptada qala basşysy juyrda ǧana aşylǧan «Janūia» otbasy institutyn qoldau ortalyǧynda azamattardy qabyldady. Būl mekeme «bır tereze» qaǧidaty boiynşa elordalyqtarǧa 70-ten asa memlekettık qyzmet türlerın ūsynady. Tūrǧyndar atauly älemettık kömek, bılım beru, jūmysqa ornalasu, käsıp aşu, tūrǧyn üi baǧdarlamasyna qatysu jäne t.b. mäseleler boiynşa saualdarǧa jauap tabady. Mäselen, osy joly äielder «Vseobuch» qory aiasynda sertifikat aludyŋ tiımdılıgın atap aitty.
Tūrǧyndardyŋ köpşılıgın baspana alu mäselesı alaŋdatatyny ras. Osyǧan orai, Altai Kölgınov jan-jaqty tüsındırıp berdı. Onyŋ aituynşa, eger jazda baspana kezegındegı azamattardyŋ sany 46 myŋ bolsa, qazır ol 47,5 myŋǧa köbeigen. «Baspana mäselesı bır künde şeşılmeidı. Üidıŋ kezegınde 47,5 myŋ adam tūr. Bırneşe tūrǧyn üi baǧdarlamalary bar. Solardyŋ bırı «Baqytty otbasy» dep atalady. Nesie mölşerlemesı 2 paiyzdy qūraidy. Bız kezeksız päterlerdı ülestıre almaimyz. Baspana alǧysy keletın tūrǧyndarǧa qūjat jinauǧa, keŋes aluǧa kömektesemız. Aldaǧy jyly qoljetımdı tūrǧyn üi kölemın 3 esege deiın arttyramyz. Bıraq kezekte tūrǧandardyŋ da sany ūlǧaiǧanyn ūmytpauǧa tiıspız» dedı ol.
