Nūr-Sūltan qalasynyŋ mäslihatynda elordanyŋ 2022-2024 jyldarǧa arnalǧan biudjetı jobasyn talqylau jalǧasyp jatyr. Qalalyq Ekonomika jäne biudjettık josparlau basqarmasynyŋ basşysy Qaisar Maŋqaraevtyŋ mälımdeuınşe, aldaǧy üş jyldyq biudjettıŋ şyǧys bölıgı 1 trln 208 mlrd teŋgenı qūrap otyr. Osy joly mäslihattyŋ äleumettık-mädeni damu mäselelerı jönındegı tūraqty komissiianyŋ otyrysynda äleumettık salaǧa bölu josparlanǧan qarjy turaly baiandaldy.
Dene şynyqtyru jäne sport basqarmasyna keler üş jylǧa 30 mlrd 180 mln teŋge bölınbek. Sonyŋ ışınde 2022 jyly 7 mlrd 960 mln teŋge qarastyrylǧan. Būl qarjy sport salasyndaǧy memlekettık saiasatty jürgızuge, jergılıktı deŋgeide sporttyq şaralardy ötkızuge, ärtürlı sport türlerı boiynşa el qūramasyna kıretın sportşylardy respublikalyq jäne halyqaralyq jarystarǧa daiarlauǧa, t.b. jūmystarǧa jūmsalmaq.
Qoǧamdyq densaulyq saqtau basqarmasyna 2022-2024 jyldarǧa 18 mlrd 340 mln teŋge qarastyrylyp otyr. Osy qarajat därıger mamandardyŋ bılıktılıgın arttyruǧa, kadrlardy qaita daiarlauǧa, ana men balany qorǧau qyzmetterıne, vaksinalar men basqa da medisinalyq preparattardy satyp alyp, saqtauǧa, basqa da maŋyzdy ısterge baǧyttalmaq.
Jūmyspen qamtu jäne äleumettık qorǧau basqarmasynyŋ aldaǧy üş jyldyq biudjetı aldyn ala jospar boiynşa 42 mlrd 265 mln teŋgenı qūrap otyr. Onyŋ ışıne qarttar men mümkındıgı şekteulı jandarǧa medisinalyq-äleumettık mekemeler men ūiymdarda arnaiy äleumettık qyzmet körsetu, halyqty jūmyspen qamtu, atauly äleumettık kömek töleu, tūrǧyn üi kömegın beru siiaqty osy saladaǧy köptegen jūmystar kırıp otyr.
Bılım basqarmasyna 2022-2024 jyldarǧa 316 mlrd 664 mln teŋge qarastyrylǧan. Mädeniet basqarmasyna aldaǧy üş jylǧa 21 mlrd 554,9 mln teŋge bölınbek. Sonyŋ ışınde 2022 jyly teatr jäne muzyka önerın qoldauǧa 3 mlrd 30 mln teŋge, kelesı jylǧa kıtaphanalar qyzmetıne 216,2 mln teŋge, äleumettık maŋyzdy jäne mädeni şaralardy ötkızuge 1 mlrd 797 mln teŋge qarastyrylyp otyr.
Tılderdı damytu jäne arhiv ısı basqarmasyna aldaǧy üş jylǧa 1 mlrd 728 mln teŋge bölu josparlanǧan. Osy qarjydan 2022 jyly memlekettık tıl men Qazaqstan halqynyŋ basqa da tılderın damytuǧa 254 mln teŋge qarastyrylǧan.
Osynyŋ bärın aitqan Ekonomika jäne biudjettık josparlau basqarmasynyŋ basşysy Qaisar Maŋqaraevtyŋ negızgı baiandamasynan keiın qosymşa baiandamaşylar – tiıstı basqarmalardyŋ basşylary söz aldy. Qalalyq mäslihat deputattary olarǧa sūraqtardy qoiyp, biudjetke pıkırlerın jetkızdı. Aldaǧy üş jyldyq biudjettı talqylau bügın de jalǧasady. Otyrysta audandardyŋ äkımdıkterı men basqa da basqarmalardyŋ biudjetı qaralady.
