«Astana EKSPO-2017» körmesı aumaǧyndaǧy köpır qūrastyrmasy sapasyz materialdar saldarynan opyrylyp tüsken. Iаǧni jobalau barysynda talapqa sai keletın metall konstruksiialar dūrys taŋdalyp alynbaǧan.
Halyqaralyq mamandandyrylǧan körmenıŋ qoǧammen bailanys departamentınıŋ direktory Sergei Kuianovtyŋ aituynşa, atalǧan oqiǧa boiynşa arnaiy komissiia qūrylyp, täuelsız saraptama jasalǧan. «Saraptama barysynda opyryludyŋ qūrastyrmadaǧy qatelıkten bolǧany anyqtaldy. Iаǧni qūlap tüsken qūrastyrmany jobalaǧan qosalqy merdıger metaldyŋ basqa türın paidalanǧan» deidı Sergei Kuianov.
Körme keşenınde bas-aiaǧy segız qūrastyrma bolǧan. Jauapty merdıger būl qūrastyrmalardyŋ törteuın özı jobalap, qalǧan törteuıne qosalqy merdıger tartqan. Naqty osy qūrastyrmany jobalaǧan qosalqy merdıger metaldyŋ basqa türın paidalanǧan. Mamandardyŋ aituynşa, körme keşenın tapsyrys beruşı älı qabyldaǧan joq. Sondyqtan barlyq şyǧyndardy merdıger kompaniia – BI Group öteidı. Bügınde osy ıspettı basqa da konstruksiialardy küşeitu jūmystary jürgızılıp, ärbır dekorativtı elementtıŋ ortasyna qosymşa tıreuışterdı ornatu turaly şeşım qabyldanyp otyr.
Bürkıt NŪRASYL
