Bırde aiaq-qoly joq adam şahardy betke alyp, domalai jyljyp bara jatyr eken. Jolşybai kezdeskender: «Myna türıŋmen qaşan jetesıŋ?» dep mazaq etıptı. Moiymaǧan müsäpır: «Orda ornynda tūr ma? Eşqaida köşıp ketken joq pa?» dep sūrapty. «Joq» deptı atty jolauşylar. «Orda ornynda tūrsa, men de bır künı jetemın, arman qalany bır körermın!» degen eken.
Būl tämsıl Astanany bır köreiık dep arnaiy kelgenderge de, bır künı bır jetermın dep, oqtalyp jürgenderge de qatysty aitylǧan siiaqty körınedı. Rasynda, el ordasyn köruge degen eldıŋ yqylasy erekşe. Astanaǧa aǧylyp kelıp jatqan halyqtyŋ sanynda da şek joq. Äsırese, şıldenıŋ alǧaşqy aptasynda elımızdıŋ tükpır-tükpırınen elorda saltanatyna arnaiy kelmek. Sol qonaqtardyŋ qūrmetıne osy künderı türlı merekelık ıs-şaralar ūiymdastyryluda. Duly duman ortasynda boludy aŋsaǧan jūrt Astanaǧa aparatyn poiyzǧa bilettı aldyn ala alyp qoiǧan. Al aiaq astynan elordaǧa joly tüskennıŋ qalaǧa jetuı qiyn-au… Sebebı, mereke qarsaŋynda ǧana emes, jaz şyqsa, «bilet joq» degen sözdı jiı estimız.
İä, jaqyn aptanyŋ ainalasynda Astanadan kete almaisyz, ne Astanaǧa jete almaisyz, bilet joq. Men qarapaiym halyqtyŋ qaltasyn qaǧatyn jürdek poiyzdardyŋ nemese äue kompaniialarynyŋ «qymbat» biletterın aityp otyrǧan joqpyn. Ortaşa mümkındıgı bar azamattardyŋ temır joldyŋ ortaŋqol mümkındıgımen dıttegen jerıne qinalmai jetıp qalatyn plaskart vagondardyŋ biletterın aitamyn.
Astanaǧa bastaityn saiahatşylar sürleuı taptalyp, jatatyn jaiy, tüstener asy qoljetımdı bolǧanda arman qalany bır köruge köptıŋ qoly jeter edı. Al, qolyŋyzda bilet bolmasa, onda ne aituǧa bolady?..
Aigül UAISOVA,
a.uaisova@astana-akshamy.kz
