Jeksenbı künı astanalyq arbatta «KITAP FEST 2019» atty kıtap festivalı öttı. Būl mädeni şarany biylǧy Jastar jyly aiasynda qalalyq äkımdıktıŋ qoldauymen «Astana jastary» mekemesı jäne «BAURZHAN» jeke qory men «ABAYbooks» baspa üiı ūiymdastyrdy.
Ädebi merekede kıtap körmesı, järmeŋke, tanymdyq äŋgımege toly kezdesuler boldy. Sondai-aq festival aiasynda «I BOOK YOU» kıtap almasu jobasy öttı. Mūnda oqyrmandar özderınıŋ oqyǧan kıtaptaryn oqymaǧan dünielerımen almastyryp aldy. Baǧdarlama barysynda kışkentai oqyrmandar da nazardan tys qalmady, olar türlı oiyndar men şeberlık synyptaryna qatysty. Sonymen bırge jūrtşylyq jaŋa avtorlarmen tanysyp, jaqynda jaryq körgen kıtaptardyŋ tanystyrylymyn tamaşalady. Aitar bolsaq, Qazaqstannyŋ halyq ärtısı, talantty pianist Jäniia Äubäkırovanyŋ «Variasii na temy» kıtabynyŋ tanystyrylymy boldy. Sondai-aq prodiuser, rejisser, «100 jaŋa esım» jobasynyŋ iegerı Aidie Aidarbekovtıŋ jyr jinaǧynyŋ tūsauy kesıldı. Soŋǧy jyldary poeziiaǧa sybyzǧydai näzık ünımen kelgen aqyn Aijan Täbarakqyzy öz oqyrmandaryna «Sen jylamaşy» atty kıtaby turaly oi bölısıp, keiıngı jazǧan öleŋderın oqydy.
«Bızdıŋ şaranyŋ maqsaty – jūrtşylyqty kıtap oquǧa ündep, otandyq qalamgerler men baspalarǧa qoldau körsetu. Būl körmenı belgılı jazuşylar men ädebiettegı jolyn endı bastaǧan jastarǧa ūsynǧan alaŋ deuge bolady. Öitkenı būl jerde avtorlar öz oqyrmandarymen kezdesıp, al adamdar bolsa özderı ūnatqan kıtaptaryn alyp oquǧa mümkındık bar» – dedı jobany ūiymdastyruşy Maira Äljanova.
Būl festival būǧan deiın Almatyda bes jyl qatarynan ötken. Osy aralyqta baǧdarlama jūrtşylyqtyŋ yqylasyna bölenıp, mädeni-tanymdyq şaraǧa ainalǧan. Biyl atalǧan festival bas qalada alǧaş ūiymdastyryldy. Soǧan qaramastan kıtap merekesıne kelgen qauymnyŋ qarasy köp boldy.
