Jön-josyqsyz salynǧan aiyppūl men arendalyq tölemnıŋ qymbattauy elordanyŋ ortalyq bazarynda sauda jasaityn jeke käsıpkerlerdı aşyndyryp otyr. Bazar äkımşılıgımen özara ymyraǧa kele almaǧan saudagerler mūŋyn osynda arnaiy kelıp, köşpelı qoǧamdyq qabyldau ötkızgen «Nūr Otan» partiiasy Astana qalalyq filialy töraǧasynyŋ bırınşı orynbasary Sapar Ahmetovke jetkızdı.
Käsıpkerlermen kezdesken Sapar Qairatūly Elbasynyŋ tapsyrmasymen şaǧyn jäne orta biznestı damytuǧa bailanysty elımızde köptegen şaralar qolǧa alynyp jatqanyn, sonyŋ bır aiǧaǧy –2 säuırden bastap, 2015 jyldyŋ 1 qaŋtaryna deiın şaǧyn jäne orta biznes subektılerın tekseruge moratorii jariialanuy ekendıgın alǧa tartty.
– Prezidenttıŋ būl tapsyrmasy – käsıbın jürgızıp otyrǧan är azamatqa ülken kömek. Mūndai ısten «Nūr Otan» partiiasynyŋ elordalyq filialy da syrt qala almady. Būl – jūmysymyzdyŋ basy ǧana. Aldaǧy uaqytta aldyn ala jasalǧan keste boiynşa qaladaǧy barlyq sauda oryndary men bazarlarda jūmys ısteitın käsıpkerlermen ūdaiy kezdesu ötkızıp tūratyn bolamyz, –dedı Sapar Ahmetov.
Partiianyŋ qalalyq filialy jürgızgen köşpelı qoǧamdyq qabyldau jiynyna elordanyŋ Işkı ıster departamentı, Prokuratura, Käsıpkerlık jäne önerkäsıp basqarmasy, Qarjy polisiiasy sekıldı memlekettık organdardyŋ ökılderı qatysty. Bilık ökılderıne mūŋyn şaqqan jeke käsıpkerler ortalyq bazardyŋ arendalyq qūny aiaq astynan köterılıp, äbıgerge salyp qoiǧanyn aitty. Ol ol ma, saudagerler elektr şamyn jaqqanymyz üşın ärqaisymyz aiyna 10 myŋ teŋgege juyq aqşa töleimız dep qynjylyp otyr. «Būl bazar alǧaşynda adam aiaǧy timegen ien dala bolatyn. Bız joqtan bar jasap, äupırımdep aiaǧymyzdan tūrdyq. Sol kezde satyp alǧan ornymyzdy bazar äkımşılıgı özımızge qaitadan satpaqşy. Olar basymyzǧa äbden şyǧyp aldy. Qylt etse aiyppūl salady. Qarsy söz aitsaŋ, bazardan quyp jıberemız dep qorqytady. Endı kelıp auksion degendı şyǧardy. Onyŋ baǧasy udai. Bızdıŋ de qolymyzǧa qarap otyrǧan otbasymyz, bala-şaǧamyz bar. Artyq jatqan aqşamyz joq» deidı käsıpkerler jylarman bolyp.
Jiynda söz söilegen Astana qalalyq Qarjy polisiiasy departamentı Köleŋkelı ekonomika salasyndaǧy qylmystardy aşu basqarmasynyŋ bastyǧy Baqytjan Baihanov Ortalyq bazar äkımşılıgı käsıpkerlerge aiyppūl saluǧa eşqandai da qūqyǧy joqtyǧyn, būl tek tiıstı memlekettık organdardyŋ ökılettılıgıne jatatynyn jetkızdı. «Sızderden jinaǧan qomaqty qarjy qaida ketıp jatyr? Aqşa jinau qanşalyqty zaŋdy? Bız osy mäselelerdı bügınnen bastap egjei-tegjei tekserıp, tiıstı şeşımder qabyldaityn bolamyz» dedı ol.
Sondai-aq, käsıpker azamattardyŋ aryz-şaǧymyn «Nūr Otannyŋ» qalalyq filialy da eskerusız qaldyrmauǧa uäde berdı. Sapar Qairatūlynyŋ aituynşa, kez kelgen biznestıŋ damuyna memleket müddelı. Sondyqtan, käsıpkerlerdı qoldap, olardyŋ käsıbı alǧa basuyna partiia qoldan kelgen kömektı körsetuge äzır.
Qymbat NŪRǦALİ
