Elordadaǧy L. Gumilev atyndaǧy Euraziia ūlttyq universitetınıŋ aumaǧynda «Äsker esırtkıge qarsy, bız esırtkıge qarsymyz!» atty aksiia öttı. Aituly şara aiasynda Almaty audanynan şaqyrylǧan qyryqqa juyq bır top jasty Otan aldyndaǧy boryşyn adal atqaruǧa saltanatty türde şyǧaryp saldy.
– Bügın bız üşın erekşe kün. Öitkenı, däl «Otan qorǧauşylar künı» merekesınde äskerge şaqyrylǧan azamattardy şyǧaryp salyp tūrmyz. Osyndai igılıktı şara aiasynda «Äsker esırtkıge qarsy, bız esırtkıge qarsymyz!» atty aksiia ötuınıŋ de taǧylymdyq mänı bar. Eldıŋ bolaşaǧy – jastar. Sondyqtan olar jaman ädetten aulaq bolǧan jön. Bügıngı jas qūraqtai jelkıldep ösıp kele jatqan jetkınşekter äskerge attanyp bara jatqan aǧalarynan ülgı alyp, solar sekıldı otansüigıştık ruhty boiǧa sıŋırıp össın demekpın. Barlyqtaryŋyzdy merekelerıŋızben şyn jürekten qūttyqtaimyn, – dedı Almaty audany äkımınıŋ orynbasary Qasymhan Senǧaziev. Odan keiın «Pravo» qoǧamdyq qorynyŋ töraǧasy Olga Ryl söz aldy.
Jalpy, ǧasyr dertı dep atalatyn keselge, äsırese 14 pen 27 jas arasyndaǧy jastar üiırsek eken. Derekterge şolu jasap ötsek, ötken jyly elımız boiynşa esırtkını medisinalyq emes tūtynuǧa jol bergen adamdardyŋ sany 31 049-dy qūraǧan. Olardyŋ ışınde äielder men kämeletke tolmaǧandar – 2 499 bolsa, er azamattar 28 850-ge jetken. Osy atalǧandardyŋ barlyǧy ışkı ıster organdary men densaulyq saqtau bölımderıne resmi türde tırkelgen. Osydan-aq, aitary bar aksiianyŋ jastar üşın de, jasamys üşın de mänı zor ekenın aŋǧaruǧa bolady.
Azamat ESENJOL
