Elordadaǧy astanalyq saiabaqta Aiaz atanyŋ rezidensiiasy aşyldy. Saiabaqtyŋ ışınde ornalasqan arnaiy üide qala tūrǧyndary men qonaqtary ertegı keiıpkerlerımen kezdesıp, jaŋa jyldyq köŋıl küidı sezıne alady.
Jaŋa jyldyŋ qarsaŋynda bastalyp, qaŋtardyŋ 8-ıne deiın jalǧasatyn dumanda balalar Aiaz ataǧa taqpaq aityp, än şyrqaidy. Al büldırşınderge tättı taratylyp, sondai-aq Aiaz ata, Aqşaqar jäne aqqala Olafpen bırge estelık suretke tüsedı. Astana qalasy Kommunaldyq menşık qory direktorynyŋ orynbasary Ǧani Hasenovtıŋ aituynşa, ata-analar balaqaiǧa äzırlegen syilyǧyn Aiaz ata arqyly tabystai alady. «Barlyq elorda tūrǧyndary men qonaqtaryn qysqy uaqytty belsendı ötkızuge şaqyramyz. Aiaz ata ordasy jūmys künderı 13.00-den keşkı 18.00-ge deiın, al demalys künderı 12.00-den 19.00-ge deiın aşyq» deidı ol.
Oiyn-sauyq merekege arnaiy orailastyryp, astanalyqtardy quantu maqsatynda tegın ūiymdastyrylyp otyr.
Aita keterlıgı, saiabaq aumaǧynda mūz aidyny salynyp, biık syrǧanaq pen «Bubble tab» qysqy attraksiony jasaldy. Ädette, tek jaz aiynda körkeie tüsetın attraksion endı qys mezgılınde de jūmys ısteitın bolady. Mūzdan jasalǧan syrǧanaqtyŋ biıktıgı – 4 metr, al ūzyndyǧy 50 metrden asady. Ainalasy aǧaşpen qorşalǧan mūz aidynynyŋ kölemı – 600 şarşy metr. Keşkı jäne tüngı uaqytta şamdar jaǧylyp, keluşıler keremet romantikalyq atmosferaǧa bölenedı. Mūz aidyny men syrǧanaq ta barşaǧa tegın.
Mūnymen qosa, konki men şanany jalǧa beru orny, stasionarlyq dämhana men meiramhana jūmys ısteidı.
Astanalyq saiabaq – qala tūrǧyndarynyŋ süiıktı demalys oryndarynyŋ bırı. Al-
leianyŋ basty artyqşylyǧy sol, ainalasy tolyqtai aǧaşpen qorşalǧan saiabaq Saryarqanyŋ esken jelınen qorǧap, demalysqa jaily jaǧdai jasaidy.
Güldana TALǦATQYZY
