Aziia bırınşılıgınen – 10 altyn
Bokstan jastar arasynda Tailandtyŋ astanasy – Bangkok qalasynda ötken Aziia chempionatynda Qazaqstannyŋ jıgıtter jäne qyzdar qūramalary 10 altyn medal jeŋıp alyp, aidy aspannan bır-aq şyǧardy. Söitıp, ekı ūjym da komandalyq esepte bırınşı oryndy jeŋıp aldy.
Säuırdıŋ 21-27-sı aralyǧynda şarşy alaŋdy şaiqaǧan şaiqastarda Ǧalymbek Kenjebaevtyŋ
ūlandary 6 altyn, 1 kümıs jäne 1 qola medaldı qorjynǧa saldy. Qorjynynda 3 altyn, 2 kümıs jäne 2 qola medalı bar tailandtyqtar ekınşı bolsa, 1 altyn, 4 kümıs jäne 2 qola medal alǧan özbek boksşylary üşınşı orynǧa ornalasty.
Bızden Aziia chempiony degen ataqqa Mahmud Sabyrhan (49 kg), Talǧat Şäikenov (64 kg), Ermahan Jaqpekov (69 kg), Saǧyndyq Toǧambaev (81 kg), Aibek Oralbai (91 kg), Damir Toibai (+91 kg) qol jetkızdı. Al kümıs medal Nūrbek Oralbaidyŋ (75 kg), qola jülde Beibarys Jeksennıŋ (56 kg) enşılerıne jazyldy.
Almas Quatbek jattyqtyratyn qyzdar komandasy tügel jüldelı oryndardan körındı. Olar 4 altyn, 3 kümıs jäne 3 qola medaldı qanjyǧaǧa bailady. Ekınşı orynǧa ündı qyzdary köterılse, üşınşı orynǧa tai boijetkenderı jaiǧasty.
Jerlesterımızden Jansaia Äbdıraiymova (51 kg), Nadia Riabes (75 kg), Guzaliia Sadyqova (81 kg), Dina İslambekova (+81 kg) qūrlyq chempiondary atandy. Kümıs medal Aizada İslamǧali (54 kg), Erkejan Däuletqyzy (57 kg), Maiia Beisebaeva (69 kg) syndy qyzdarymyzǧa būiyrdy. Qola medaldı Änel Qūdaibergen (48 kg), Mariia Gladkova (60 kg), Jūldyz Toikova (64 kg) moiyndaryna orady.
Endı osynda jüldeger atanǧan sportşylardyŋ bärı aldaǧy tamyzda Vengriiada jalau köteretın jastar arasyndaǧy älem bırınşılıgıne qatysady.
Damir QOJAMQŪL