Ötken demalys künderı bolǧan järmeŋkede Qostanai oblysynyŋ tauar öndıruşılerı elordalyqtarǧa öz önımderın ūsyndy. «Han Şatyr» sauda, oiyn-sauyq ortalyǧynyŋ janyndaǧy arnaiy ūiymdastyrylǧan alaŋda Qostanai oblysynyŋ 14 audany men üş qalasynan 50-den asa käsıpker öz önımın saudaǧa şyǧardy.
Qostanai öŋırınıŋ käsıporyndary bas-aiaǧy 270 tonna kölemınde 100-den asa önım türın äkeldı. Olardyŋ arasynda 50 tonna et, 31 tonna süt önımı, 20 tonna şūjyq önımı men jartylai fabrikattar, 27 tonna jarma men makaron önımderı, sol siiaqty 60 tonna kartop pen kökönıs, 20 tonna ūn önımderı boldy. Būdan bölek, önımderdıŋ arasynda nan-toqaş, konditerlık önımder, bal jäne t. b. basqa azyq-tülık ūsynyldy.
– Mal şaruaşylyǧymen ainalysamyz. Biyl öŋırde mal jaiylymy jaqsy boldy. Bärı semız. Etımızdı alǧan jūrt dämdı ekenın aityp jatady. Qostanai oblysymen ǧana şektelıp qalmai, elorda tūrǧyndaryna da jetkızıp otyrǧanymyzǧa quanyştymyz. Memleket käsıpkerlerge barynşa jaǧdai jasap otyr. Osyndai mümkındık bergen Nūr-Sūltan men Qostanai oblysy äkımdıkterıne alǧysym şeksız, – deidı Bekjan esımdı qostanailyq käsıpker.
Järmeŋkege jinalǧan jūrt Qostanai oblysy tūrǧyndarynyŋ arasynda asa sūranysqa ie, tanymal «Milh», «DEP», «Lider-2010», «Terra», «Prombaza 7», «Torǧai Et» JŞS-terı, «Baian Sūlu» AQ jäne basqa şaruaşylyqtardyŋ önımderın molynan satyp aldy. Al järmeŋkedegı baǧa dästürlı türde naryqtan 10-15 paiyzǧa arzan boldy.
Aita ketu kerek, biyl elordada äleumettık maŋyzy bar azyq-tülık önımderınıŋ baǧasyn tūraqtandyru maqsatynda kökönıster men jemısterdıŋ pısu uaqytyna sai 14 järmeŋke ötkızu josparlanǧan. Bügınge deiın elımızdıŋ är öŋırınen 550-den asa käsıpker elorda törınde öz önımın saudaǧa şyǧardy.
