Nūr-Sūltan qalasy boiynşa balabaqşaǧa kezekke tūrudyŋ ekınşı kezeŋı 27 mausymda bastalady.
– Būǧan deiın habarlanǧandai, 10 mausym künı elordalyq balabaqşalarǧa kezekke tūruǧa arnalǧan elektrondy jüie ıske qosylǧan bolatyn. Alǧaşqy lekpen 116 ötınış qanaǧattandyrylyp, olarǧa tiıstı oryndar bölındı. Köp ötpesten jüiege kiberşabuyl jasaldy. Sonyŋ kesırınen 500 myŋnan asa jalǧan sūranys tüsıp, jüie ısten şyqqan-dy. Qazır sol aqaulardy jöndep, jüienıŋ kiberqauıpsızdıgın küşeitu maqsatynda şaralar jasalyp jatyr. Jüie 27 mausymda paidalanuǧa qaita daiyn bolady, – deidı qalalyq Bılım basqarmasynyŋ basşysy Änuar Janǧozin.
Atalǧan vedomstvodaǧy mektepke deiıngı tärbie jäne oqytu bölımınıŋ basşysy Läzzat Razbekova-Töleuhanovanyŋ aituynşa, biyl 17 myŋnan asa bala mektepke barady. Būl degenımız – balabaqşadaǧy sonşa oryn qoljetımdı bolady degen söz.
Balabaqşaǧa kezekke tūru räsımı kezeŋ-kezeŋımen ıske asyrylady. Mäselen, 27 mausymda – 2017 jyly, 1 şıldede – 2016 jyly, 4 şıldede – 2015 jyly, al 9 şıldede 2014 jäne 2013 jyly tuǧan balalar tırkeledı.
Aita keteiık, qazırgı taŋda elordada balabaqşa jasynda, iaǧni 3-6 jas aralyǧynda 18 myŋnan asa büldırşın bar.
