Bailanys jäne aqparat qyzmetkerlerı künı qarsaŋynda elordada Astana qalasy äkımdıgınıŋ ūiymdastyruymen būqaralyq aqparat qūraldary ökılderınıŋ arasynda şaǧyn futboldan turnir öttı. Q.Mūŋaitpasov atyndaǧy stadionda ötken dästürlı sport şarasyn Işkı saiasat basqarmasynyŋ basşysy Erlan Qanalimov aşyp, jurnalister qauymyn töl merekelerımen qūttyqtady.
Atalmyş turnirge qatysuǧa niet tanytqan jurnalisterdıŋ qatary köbeiıp keledı. Biyl qala äkımınıŋ kubogyn 13 komanda sarapqa saldy. Atap aitsaq, «Egemen Qazaqstan», «Qazaqstan», «Qazaq radiosy», «Qazsport», «Habar», «Habar 24», «Elarna», «Astana», «Elorda Aqparat», «Jeŋıs», «Qazmedia», «Dixinews» jäne «Körkem» komandalary tört topqa bölınıp, baq synasty.
Är toptan ūpai sanymen köş bastaǧan qos komanda şirek finalǧa şyqty. Būl synnan ötken «Egemen Qazaqstan», «Habar», «Qazaq radiosy», «Elorda Aqparat» komandalary özara jüldelı oryndardy talasty. Nätijesınde finalda «Egemen Qazaqstan» «Qazaq radiosy» komandasyn 1:0 esebın jeŋıp, chempion atandy. Al üşınşı oryn üşın bolǧan oiynda «Elorda Aqparat» «Habar» komandasyna jol berdı.
– Qatysuşy komandalar jerebe salu boiynşa 4 topqa bölındı. Komandalar aldymen toptyq kezeŋde oinap, keiın plei-off deŋgeiıne köştı. Oiyn barysynda BAQ ökılderı arasynan «Habar» telearnasynyŋ komandasy jaqsy nätije körsetıp, alǧa şyqty. Sondai-aq, «Qazaq radiosynyŋ» komandasy men «Elorda Aqparat» komandalarynyŋ qarqyny küştı boldy, –deidı turnirdıŋ bas töreşısı Daulet Hamzin.
Sonymen qatar, būl jarystyŋ üzdık oiynşylary da marapattaldy: Eŋ üzdık qaqpaşy – Quandyq Älımjanov («Elorda Aqparat»), eŋ üzdık qorǧauşy Ermek Töreniiazov («QazSport») jäne eŋ üzdık oiynşy – Marǧūlan İbraev («Jeŋıs»).
Jaqsy ürdıske ainalǧan būl turnirdıŋ jeŋımpazdaryn bır künde anyqtau oŋai bolmady. Öitkenı qatysuşylardyŋ köptıgınen taŋerteŋ erte bastalǧan doda tüs qaita tämamdaldy. Oǧan deiın üzılıssız dop tepken jurnalister aqtyq saiysqa kelgende äbden şarşap qaldy. Sondyqtan kelesı joly komandalar sanynyŋ artqanyn eskerıp, turnirdı ekı künge bölıp ötkızgen jön.
Orynbek ÖTEMŪRAT
