Astana qalasy Tılderdı damytu jäne arhiv ısı basqarmasynyŋ qoldauymen elordada «Bilimmen bolis» atty jobanyŋ bastalǧanyn ötken nömırlerımızdıŋ bırınde jazǧan edık. Sonyŋ aiasynda jaqynda elımızge belgılı qoǧam qairatkerı, Astanadaǧy Memlekettık qyzmet salasyndaǧy öŋırlık habtyŋ basqaruşy komitetı töraǧasy Älihan Baimenov därıs oqydy.
«Memlekettı basqaru men futboldyŋ ūqsas jaǧy bar. Älemdegı milliardtaǧan adam özı futbol oinamasa da, üiınde otyryp alyp futbolşylardy synaidy. «Ana jerde pas beruı kerek edı, mynany qorǧanystan görı şabuylǧa qoimai ma?!» dep. Memlekettı basqaru ısı turaly da köp kısı osylai pıkır aita alady. Iаǧni ekeuı de – qoǧamda ülken tolqu tudyratyn närseler» dep sözın bastaǧan spiker memlekettık basqaruǧa qatysty paiym-parasatyn ortaǧa saldy.
– Bız äl-Farabidı tanyǧanmen, onyŋ eŋbekterın onşa oqymaimyz. Osydan on jetı jyldai būryn İspaniianyŋ Qazaqstandaǧy sol kezdegı elşısı menen «Sızder äl-Farabidıŋ suretın teŋgelerıŋızdıŋ betıne şyǧardyŋyzdar. Äl-Farabi atyndaǧy universitetterıŋız bar. Al qanşa qazaq sonyŋ eŋbegın oqydy?» dep sūrady. Onyŋ būlai sūrauynyŋ mänı, Batysta äl-Farabidıŋ eŋbegın köp adam bıledı. Jalpy, memlekettık basqarudy, saiasattanudy, äleumettanudy oqyǧysy keletın adam äl-Farabidıŋ eŋbekterımen tanysuy tiıs. Ol qaiyrymdy basşynyŋ boiynda boluy kerek on ekı qasiet jaily jan-jaqty jazǧan. Būdan bölek, Jüsıp Balasaǧūnnyŋ «Qūtty bılıgınde» de memlekettı basqaru ısındegı maŋyzdy tūlǧalardyŋ mındetterı turaly öte tereŋ taldanady, – degen Ä.Baimenov būdan soŋ nelıkten keiıngı uaqyttary elımızde memlekettık basqaru turaly zertteulerdıŋ tolastap qalǧanyn söz qyldy.
– Būl mäselede bızdıŋ ūzaq jyldar boiy keŋes ükımetınıŋ qol astynda boluymyz qatty äser ettı. Keŋes ükımetı qorǧanysqa qatysy joq salalardyŋ tügelge juyǧynda älemdık üderısten oqşaulanyp qaldy. Sol şaqta eŋ bedeldı sanalatyn oqu oryndarynyŋ bırı Mäskeudegı avtomobil-jol institutynyŋ özınde doktorlyq jūmystaryn qorǧap jatqandardyŋ ǧylymi jaŋalyqtaryn «Mersedes», «Toiota» siiaqty kompaniialar 20-30 jyl būryn aşyp qoiǧan. Bıraq sonda da olarǧa komissiia müşelerı «Ei, sen būryn bıreudıŋ jasap ketken närsesın nesıne aityp tūrsyŋ?» dep söilemeidı. Öitkenı şetelmen qarym-qatynas ornatpaǧandyqtan, özderıne de ol tanys emes. Mūndai problema memlekettık basqaru salasynda da boldy. «Memlekettı basqaru ısınıŋ mamandaryn daiyndau – ǧylymnyŋ emes, partiianyŋ ısı» dep tüsıngen Ortalyq komitettegıler menedjment siiaqty mamandyqtardyŋ aşyluyna, būl baǧyttaǧy ǧylymi zertteulerdıŋ jazyluyna qatty qarsylyq bıldırdı, – dep baiandap berdı.
Jiyn barysynda Ä.Baimenov Qytai, AQŞ, Ūlybritaniia, Şveisariia elderınıŋ memlekettık basqaru täjıribelerıne de toqtaldy. «AQŞ-tyŋ ekınşı prezidentı turaly «Djon Adams» atty teleserial kördım. Otandyq televiziia paidasyz serialdardyŋ ornyna osyndai dünielerdı körsetse, halyqtyŋ qazırgı qajettılıgın öter edı» degen ūsynysyn da aitty. Būdan keiın spiker Qazaqstandaǧy memlekettık basqarudyŋ bügıngı jai-küiı men problemalaryn sipattady. Onyŋ aituynşa, elımızde kadrlardy ırıkteu boiynşa ädıldıkke älı de basa nazar audaru qajet.
Eske sala ketsek, mūndai därısterdı tyŋdaǧysy kelgen kez kelgen kısı şaraǧa tegın qatysa alady. Al qandai da sebeppen kele almai qalǧandar üşın leksiianyŋ beinenūsqasy YouTube jelısıne jükteledı.
Botagöz MARATQYZY
