Berık JOLDASBEKOV, Astana qalasy IID Äkımşılık polisiia basqarmasy Jol jäne tehnikalyq inspeksiia bölımınıŋ basşysy: JAIаU JÜRGINŞILER JOLYNA QADAǦALAU KÜŞEIEDI
– Berık Allabergenūly, elordada qanşa jaiau jürgınşı joly bar jäne olardyŋ bärın qauıpsız dep aituǧa bola ma?
– Bas qalada 500-den astam jaiau jürgınşı joly bar. Olardyŋ 30%-y jyldamdyq ölşeuış qūrylǧysymen jabdyqtalǧan. Jyl saiyn äkımdıkke ūsynys bere otyryp, qalǧan jürgınşıler jolyn da qajettı jabdyqpen qamtamasyz etu josparda bar.
– Abai köşesındegı jaiau jürgınşıler joly nege alynyp tastaldy?
– Tek Abai köşesı emes, qaladaǧy rettelmeitın qiylystaǧy üş jaiau jürgınşıler ötkelı alynyp tastaldy. Naqty aitsam, Respublika daŋǧylynda Jastar saraiyna qarsy, Tūran daŋǧylynda «Duman» oiyn-sauyq ortalyǧyna qarsy jäne qalalyq äkımdıktıŋ janynda Abai daŋǧylynda ornalasqan ötkelder. Onyŋ üstıne atalmyş joldar baǧdarşam nysandarynyŋ janynda ornalasqan. Apattyq jaǧdailardy boldyrmas üşın jäne jaiau jürgınşılerdı qaǧyp ketu siiaqty jol qozǧalysy erejelerın būzudyŋ aldyn alu maqsatynda osyndai şeşım şyǧardyq. Jalpy, osy uaqytqa deiın atalmyş oryndarǧa jerasty joly nemese baǧdarşam ornatu turaly Jolauşylar kölıgı basqarmasyna ūsynys joldaǧan edık. Bıraq belgılı sebepterge bailanysty ornatu mümkın bolmady. Alty jolaqty ülken jol bolǧandyqtan, onda apattyq jaǧdai jiı tırkeledı. Sol sebeptı rettelmeitın üş jaiau jürgınşı jolyn qoldanystan şyǧardyq. Öitkenı bız üşın tūrǧyndardyŋ qauıpsızdıgı maŋyzdy. Qazırgı kezde taldau jürgızıp, qalanyŋ basqa uchaskelerın de zerttep jatyrmyz. Būdan bylai baǧdarşam nysandarynyŋ janynda ornalasqan jaiau jürgınşıler ötkelınde jol-kölık oqiǧasy jiı anyqtalǧan jaǧdaida, olar alynyp tastalady.
– Balalardyŋ qatysuymen jaiau jürgınşıler jolynda jol-kölık oqiǧalary jiı tırkeledı. Osy rette mektepter men balabaqşalar ornalasqan köşeler qajettı jol belgılermen qamtamasyz etılgen be?
– Jaŋa oqu jyly bastalar tūsta, Bılım basqarmasymen bırlese otyryp, barlyq bılım beru ūiymdaryna taldau jürgızemız. Biyl tamyz aiynda arnaiy tekserıs jürgızıldı. Jaŋadan aşylǧan mektepter men basqa da bılım beru mekemelerı maŋaiyna qajettı jol belgılerı ornatyldy.
– Elordada täjıribe retınde sary jolaqty jol paida bolǧanyn bılemız. Jaqsy nätije bar ma?
– Balalar arasyndaǧy jol-kölık oqiǧalarynan jaraqat aludy azaitu maqsatynda jaiau jürgınşıler jolaǧyna qanyq sary tüs qosyldy. Ol «Baiqa, balaqai!» jedel aldyn alu şarasy aiasynda jüzege asyryldy. Nätijesı jaman emes.
Jalpy, aşyq tüstı kiım kigen jaiau adamdy jürgızuşıler 150 metr qaşyqtyqtan köredı. Būl joba M. Ötemısūly atyndaǧy Oquşylar saraiy maŋaiyndaǧy Ä. Bökeihan köşesınıŋ tūsynda engızıldı. Būl öz kezegınde jaiau jürgınşıler jolynda bolatyn apatty azaituǧa septıgın tigızetını sözsız.
Mūndai jol belgıler aldaǧy uaqytta balalar köp jüretın maŋaiǧa, mektepterdıŋ, balabaqşalardyŋ janyna da ornatylatyn bolady.
Äŋgımelesken:
Gülmira AIMAǦANBET
