Bügın Halyq Qaharmany, Keŋes Odaǧynyŋ batyry, qazaqtan şyqqan tūŋǧyş ǧaryşker, äskeri ūşqyş, aviasiia general-maiory Toqtar Äubäkırov 70 jasqa keldı. Qazaqtyŋ daŋqty ūlynyŋ mereitoiyna orai Astana qalasynda saltanatty keş ūiymdastyryldy.
Aqmola öŋırlık garnizonynyŋ äskeri qyzmetşılerı, Qazaqstan äskeri aviasiiasynyŋ ardagerlerı, Resei federasiiasy jäne Euroodaq elderınıŋ maŋdai aldy ūşqyş ǧaryşkerlerı qatysqan saltanatty jiynǧa Memleket basşysy Nūrsūltan Nazarbaev qūttyqtau hatyn joldady.
«Qūrmettı Toqtar Oŋǧarbaiūly! Jetpıs jasqa tolǧan mereitoiyŋyz qūtty bolsyn! Sız halqymyzdyŋ bırtuar, maqtan tūtar daŋqty ūldarynyŋ bırısız. Sızdıŋ esımıŋız kosmonavtika tarihynda qazaq halqynyŋ ǧaryş kögıne köterılgen tūŋǧyş ökılı retınde endı. Eŋbekterıŋız būrynǧy Keŋes Odaǧy men elımızdıŋ eŋ joǧarǧy nagradalarymen atalyp ötıldı. Sızge ärdaiym myqty densaulyq, otbasyŋyzǧa amandyq pen bereke tıleimın!» delengen Elbasynyŋ qūttyqtau hatynda.
Resmi qūttyqtaulardan keiın märtebelı meimandar äskeri-tarihi muzeidıŋ körme zalyna qoiylǧan Halyq Qaharmanynyŋ ǧaryş salasyna aiaq basqan künderınen bastap bügınge deiıngı sanaly ömırınen syr şertetın fotokörmemen tanysty. Şara soŋynda mereitoi iesınıŋ qūrmetıne elımızdıŋ estrada jūldyzdarynyŋ qatysuymen konsert öttı.
Toqtar Äubäkırov – äskeri ūşqyş qana emes, ol otandyq ǧaryş salasyna jol bastaǧan tūŋǧyş ǧaryşker. Ol Qazaqstandaǧy ǧaryştyq zertteulerdıŋ negızın qalasyp, otandyq Qaruly Küşterdıŋ äskeri daiarlyǧyn jetıldıruge, äskeri patriottyq tärbie jūmystaryn jolǧa qoiuǧa belsene aralasty.
7 kün 22 saǧat 13 minutqa sozylǧan ǧaryş saparynda biotehnologiia, metallurgiia, medisina salalary jäne Aral aimaǧy boiynşa ǧylymi-zertteu jūmystaryn jürgızgen. Zertteu nätijesınde Aral üstındegı tūzdy şaŋ dauylynyŋ paida bolu prosesı men sol ziiandy boramanyŋ Qazaqstan men Resei aimaqtaryna taraluynyŋ ǧaryştyq suretterın tüsırdı. Sonymen qatar, Qazaqstan aumaǧyndaǧy atmosfera qabaty men jer bederın zerttep, astrofizikalyq baqylau jūmystarymen ainalysqan.
