Ala jazdai jügırıp jarysatyn Astananyŋ belsendı jūrtynyŋ aptyǧy qysta da basylmaidy. Qar tüsse, tabandaryna şaŋǧysyn şaptap alyp dene şynyqtyrudy toqtatpaidy. Osylai bır qysty dumandatyp ötkızgen elordalyqtar ötken senbıde Esıl özenınıŋ aidynyna jinalyp, «Būrqasyn-2019» festivalımen mausymdy qorytyndylady.
Dästürlı festival biyl on toǧyzynşy ret saltanat qūrdy. Oǧan 2000-ǧa juyq äuesqoi sportşy qatysty.
Köpşılıktı belsendı ömır saltyna ündeitın «Būrqasyn» şarasyn qala äkımdıgıne qarasty Būqaralyq sport ıs-şaralaryn ötkızu direksiiasy ūiymdastyrdy. Şahar halqyn sport merekesımen qūttyqtauǧa Mädeniet jäne sport basqarmasynyŋ basşysy Bolat Majaǧūlov pen onyŋ orynbasary Berık Marjyqpaev keldı.
Merekenıŋ körıgın qyzdyrǧan qatysuşylar sporttyŋ 8 türı, atap aitqanda, şaŋǧy jarysy, gır tasyn köteru, armrestling, şaibaly hokkei, belbeu küresı, qysqy şaǧyn futbol, arqan tartu jäne motosporttan şeberlıkterın körsettı. Sonymen, şaŋǧy jarysyna 1200 adam qatysyp, solardyŋ ışınen 2,5 şaqyrymdy eŋserıp, bırınşı bolǧan – Dmitrii Tanichenko. Al äielderdıŋ ışınen Vera Masan aldyna jan salmady. Būǧan qosa, būl saiystyŋ jüldegerlerı jas erekşelıkterıne qarai anyqtaldy.
Sodan keiın komandalyq jarystar da tartysty ötıp, bırlıgı bekem, küşı basym toptardyŋ mereiı tasydy.
Al motosport jarysy balalar men jasöspırımderdıŋ qūlşynyp qatysqan bäsekesı boldy. Sondai-aq būl jarysta käsıbi sportşylar da boi körsettı.
Är jarystyŋ qorytyndysy boiynşa jüldegerler marapattalyp, olarǧa baǧaly syilyqtar men medaldar, kuboktar tabystaldy.
