Ötken jyly elorda biudjetı 99,8 paiyzǧa igerıldı. Şyǧys kölemı jospar boiynşa 431 mlrd 747 mln teŋge bolu kerek bolsa, naqty ıs jüzınde şyǧystar 431 mlrd 070 teŋgenı qūrady. Nūr-Sūltan qalasy mäslihatynyŋ tūraqty komissiialarynyŋ bırlesken otyrysynda osylai dep mälımdegen qalalyq Qarjy basqarmasynyŋ basşysy Älıbi Jūmaev būl qarjyǧa qandai jūmystar atqarylǧanyn baiandady.
Byltyrǧy biudjet qarjysynyŋ basym bölıgı äleumet igılıgıne – bılım, densaulyq saqtau, äleumettık kömek, qala infraqūrylymyn damytu syndy maŋyzdy salalarǧa bölındı. Atap aitqanda, 15 mektep pen 3 balabaqşanyŋ qūrylysy jalǧasty. Būǧan qosa, 23 orta bılım beru men mektepaldy daiarlyq nysanynyŋ jobasy jasaldy. Sonyŋ ışınde 15 nysan boiynşa memlekettık saraptama oŋ şeşım şyǧardy.
Qartaly-Oqjetpes, №41–M.Jūmabaev, Abai–T.Bigeldinov, J.Näjımedenov–Ş.Qaldaiaqov köşelerı qiylystarynda tört orta mektep jäne Bögenbai batyr daŋǧyly boiynda, ört söndıru deposy janynda 800 orynǧa arnalǧan käsıptık-tehnikalyq mektep salyndy. Ä.Jūmaevtyŋ aituynşa, būl bılım nysandary jūmysyn bastaǧanda mektepterdegı oryndardyŋ tapşylyǧy 5300 oquşyǧa qysqarady.
Qorǧaljyn tasjolynan oŋtüstıkke qarai 240 orynǧa şaqtalǧan balabaqşanyŋ qūrylysy aiaqtalyp, «Komsomolskii» tūrǧyn alabyndaǧy Qyz Jıbek-Baian sūlu köşelerı qiylysynda mektepaldy daiarlyq mekemesınıŋ injenerlık jelılerı salyndy.
Qazır qalada «Nūrly jer» baǧdarlamasy boiynşa 18 köpqabatty tūrǧyn üi keşenınıŋ qūrylysy jalǧasyp jatyr. Osy künderge deiın 635 päterı bar 4 üi paidalanuǧa berıldı. Toǧyz tūrǧyn üidıŋ jobasy jasalyp, olardyŋ beseuın memlekettık saraptama maqūldady.
Jalpy, ötken jyly 9 nysan paidalanuǧa berılıp, qūrylysy jalǧasqan 11 nysan boiynşa memlekettık saraptama oŋ şeşım şyǧardy. Joldyŋ 21,6 şaqyrymy qaita jaŋartylyp, 53,78 şaqyrymynda ortaşa jöndeu jürgızıldı, 162,842 şarşy metr aumaqta köşelerdı aǧymdaǧy jöndeu jasaldy. 36 baǧdarşam, 55 aialdama ornatyldy. Baǧdarşamnyŋ 20-sy rettelmeitın ötkelderge qoiyldy.
Qalany damytu jäne abattandyru baǧdarlamasy boiynşa 8 joba jüzege asty. Atap aitqanda, S.Seifullin, Bırjan sal köşelerındegı gülbaqtar jaŋalandy. Kenesary köşesınde – «Egemen Qazaqstan» gazetı – B.Beisekbaev köşelerı aralyǧynda, Puşkin köşesındegı №15 üi, Abai daŋǧylynda – Ä.Sembinov köşesınen «Egemen Qazaqstan» gazetı köşesıne deiın jäne Respublika daŋǧyly men Y.Dükenūly köşesı qiylysar tūsta, Saryarqa jäne R.Qoşqarbaev daŋǧyldarynda gülbaqtar salyndy.
