Astana qalasyndaǧy Daǧdarys ortalyǧynda jaŋa jyldyq şyrşa keşı öttı.
Astana qalasy äkımdıgınıŋ «Zorlyq-zombylyq nemese zorlyq-zombylyq qaupı saldarynan qiyn jaǧdaiǧa tap bolǧan adamdarǧa arnalǧan daǧdarys ortalyǧy-baspanasy» ortalyǧynyŋ qūrylǧanyna üş jyl boldy. Osy uaqyt aralyǧynda mekeme tūrmystyq qiyndyqqa tap bolǧan talai äielge äleumettık, psihologiialyq jäne medisinalyq kömek körsetıp, barynşa qoldap keledı. Osy joly ortalyq ūjymy özderın panalaǧan jandardyŋ balalaryna arnap dumandy keş ötkızıp, köŋılderın bır köterıp tastady.
Aiaz ata men Aqşaqar jäne «Mūz jürek» multfilmınıŋ basty keiıpkerlerı Anna men Elza kelıp qatysqan şara ortalyqtaǧy 45 balaǧa merekelık köŋıl-küi syilady. Bas-aiaǧy bır jarym saǧatqa sozylǧan şyrşa merekesınde ärtürlı syilyqtar tapsyrylyp, tättıge toly dastarqan jaiyldy. Sondai-aq, türlı oiyndar oinatylyp, sabyn köpırşıkterı şouy körsetıldı.
