Nūr-Sūltan qalasynyŋ äkımı Altai Kölgınov juyrda «Habar» telearnasyndaǧy «Ūlttyq müdde» baǧdarlamasyna sūhbat berıp, elordadaǧy tüitkıldı mäselelerdıŋ tüiının tarqatty.
Ülken Taldyköl saqtalady
Elorda äkımdıgı Ülken Taldyköl su qoimasyn saqtap qaludy qoldaidy. Būl turaly qala äkımı Altai Kölgınov aitty:
– Bız būl su qoimasyn saqtaudy qoldaimyz. Jalpy Ülken Taldyköl qala damuynyŋ barlyq kezeŋındegı sarqyndy su jinaǧyş bolyp keldı. Esterıŋızde bolsa, ondaǧy qolqany qabatyn iıske qatysty bıraz syn aityldy. Sol sebeptı Elbasynyŋ tapsyrmasymen kärız-tazartu qūrylǧylary salyndy. Qazır iıs joq. Tazartu qondyrǧylary jaqsy jūmys ıstep tūr. Barlyq su tazartylady.
Qala äkımı Ülken Taldyköldıŋ su arnasy soŋǧy jyldary 5 ese tüskenıne nazar audardy. Bırer jyl būryn mūnda 54 million tekşe metrden astam su saqtalsa, qazır onyŋ kölemı 10 million tekşe metrge de jetpeidı.
Ülken Taldyköldıŋ aumaǧyn abattandyru boiynşa qala äkımınıŋ öz jospary bar.
– Bız köldıŋ özı bulanbaǧanyn qalaimyz. Ondaǧy batpaq tūzdy bolǧandyqtan, būtalar öspeidı. Sonda da ol jerge rekreasiialyq aimaq qūrǧymyz keledı. Kezdesken qiyndyqtarǧa qaramastan bızdıŋ mamandar osy baǧytta jūmys ıstep jatyr. Qalanyŋ ekologiiasy üşın su toltyryp, Ülken Taldyköldı saqtap qaluymyz kerek. Jaǧasynda jaiau jürgınşıler joldary men jasyl jelekter boluy tiıs, – dedı Altai Kölgınov.
Aldaǧy uaqytta ekologiia talaptaryna säikes qala aumaǧyndaǧy qalǧan su qoimalary da qalpyna keltırıledı. Qala äkımı būl jūmystardyŋ barlyǧyn aqylmen dūrys jasaluy kerektıgın atap öttı.
2 jylda elorda tolyǧymen gazdandyrylady
Nūr-Sūltan qalasyn gazdandyru jūmystary 2023 jyly tolyq aiaqtalady. Qazırdıŋ özınde aumaǧynda jalpy ūzyndyǧy 645 şaqyrym bolatyn gaz qūbyry tartylǧan. Elordanyŋ Almaty jäne Saryarqa audandaryndaǧy «Köktal-1», «Köktal-2» jäne «Agroqalaşyq» tūrǧyn alaptarynyŋ 150 myŋdai tūrǧyny «kögıldır otynnyŋ» qyzyǧyn körude. Qala äkımınıŋ aituynşa, qazır gaz qūbyryn ärbır üige jetkızu baǧytynda jūmys jürgızılıp jatyr.
– Qazır tūrǧyn alaptardy gazben qamtu üşın injenerlık jelıler tartylyp jatyr. Bız tūrǧyndardyŋ gazǧa qoljetımdılıgın qamtamasyz etemız. Sonymen qatar «kögıldır otynǧa» ärbır üidıŋ qosyluyna küş salamyz. Bügınge deiın bır ǧana Saryarqa audanynda 500-den astam abonent gazǧa qosyldy. Olardyŋ rizaşylyǧynda şek joq, – dedı Altai Kölgınov.
Qamdanǧan qapy qalmaidy
Elorda äkımı Altai Kölgınov qalada kömır qory jetkılıktı ekenın aitty. Jalpy şaharda jylytu mausymyna erte qam jasalady.
– Kömır qory jetkılıktı. Qysqa daiyndyq auqymdy jūmystardan tūrady. «Qys şanaŋdy jaz saila» degendei, kelesı jylytu mausymyna daiyndyqty bız aǧymdaǧy jylytu mausymy aiaqtalǧan sätten kırısemız. Osy aralyqta jylu-elektr stansalaryn jaŋartyp, jöndeu jūmystaryn jürgızu kerek. Osy tehnikalyq jūmystar qalanyŋ tynys-tırşılıgın toqtausyz qamtamasyz etuge mümkındık beredı, – dedı qala äkımı.
Qala äkımı tūrǧyn üi qūrylysy qarqynynyŋ artuymen jylytu nysandaryn salu qajettılıgı tuyndaǧanyn jetkızdı. Tek biyldyŋ özınde jalpy kölemı 3,2 million tekşe metr bolatyn tūrǧyn üi paidalanuǧa berıledı.
– «Tūrǧyn üi qūrylysynyŋ qarqyny artty. Salynyp jatqan, paidalanuǧa berılgen tūrǧyn üilerde jylu berumen mäsele bolmas üşın bız №3 jylu-elektr ortalyǧyn ıske qosuymyz kerek. Jaŋa ortalyqtyŋ ıske qosyluy arqyly jaŋa nysandardy jylumen qamtamasyz ete alamyz. Gazdandyru arqyly Ülken Taldyköl, «Jaǧalau» jäne jaŋa temırjol beketı aumaǧynda gazben jylytylatyn qazandyqtar paidalanuǧa berıledı. Kelesı jylytu mölşerınde bız jylu mölşerın 1000 Gkal-ǧa deiın arttyra alamyz. 2024 jylǧa qarai būl mölşer 1500 Gkal-ǧa jetedı, – deidı Altai Kölgınov.
