Darhan MYŊBAI, QR Ūlttyq muzeiınıŋ direktory: Ūlttyq muzei – halyqtyŋ ruhani qazynasy
Muzeidıŋ basty mındetterınıŋ bırı – Qazaqstannyŋ materialdyq, ruhani jäne mädeni mūrasyn nasihattau, Astanany mädeni jäne halyqaralyq deŋgeidegı gumanitarlyq ortalyq retınde jäne Qazaqstandy tūtastai köne tarihy men bai mädenietı bar qarqyndy damyp kele jatqan zamanaui memleket retınde tanytu
– Elbasy Nūrsūltan Nazarbaevtyŋ «Mädeni mūra» baǧdarlamasy aiasynda, mädeni örkendeu men ılgerıleuge baǧyttalǧan bastama negızınde Ūlttyq muzei aşylǧany esımızde. Jūmys ıstei bastaǧanyna ekı jyl endı ǧana tolǧan ruhani oşaqtyŋ qysqa merzımdegı qadamdaryna köŋıl quanady. Endı äŋgımemızdı muzeidegı jädıgerlerdıŋ salmaǧy men maŋyzy, maqsat-mındetterıŋızden bastasaŋyz…
– Muzei – kez kelgen eldıŋ tarihi jadyn jaŋǧyrtuşy qasterlı oryn. Ol ūrpaqtar arasyn jalǧaidy, mädenietter arasyn jaqyndatady. Qazaqstan Respublikasynyŋ Ūlttyq muzeiı Elbasynyŋ tıkelei tapsyrmasymen jüzege asqan mädeni oşaq ekenı mälım.
Esterıŋızge sala ketsem, 2008 jyly «Mädeni mūra» baǧdarlamasyn jüzege asyru boiynşa Qoǧamdyq keŋestıŋ otyrysynda Memleket basşysy Astana qalasynda Qazaqstan tarihyna qatysty öte qūndy mädeni mūralardy, artefaktılerdı, özge de muzei būiymdaryn maqtanyşpen körsetetın halyqaralyq deŋgeidegı muzei salu jönınde tapsyrma berdı. Osylaişa 2014 jyly Astana künı qarsaŋynda aşylǧan Qazaqstan Respublikasy Ūlttyq muzeiı bügınde eldıŋ ǧylymi, ruhani ärı mädeni ortalyǧy bolyp ülgerdı. Reseidegı Ermitaj, Tretiakov galereiasy, Fransiiadaǧy Luvr, Niderlandtaǧy Reiksmuzeum, Koreianyŋ Ūlttyq muzeiı, AQŞ-taǧy Metropoliten, Fransiiadaǧy Şyǧys önerlerınıŋ Ūlttyq muzeiı – Gime muzeiı syndy älemnıŋ daŋqty muzeilerımen ūqsastyqtar keltırgen kezde, bız taiau arada älemnıŋ eŋ ırı mädeni oşaqtarynyŋ arasynan laiyqty oryn aluǧa mümkındık beretın özımızdıŋ «qazaqstandyq joldy» taŋdap, baǧdar etken muzeiımızdıŋ qūndylyqtarymen şyn mänınde maqtana alamyz.
Muzei qyzmetı özın Euraziiadaǧy bıryŋǧai keŋıstıkte zamanaui, mädeni jäne ǧylymi ortalyq retınde oryn aluǧa baǧyttalǧan. Būl nysan bıregei jädıgerlerge jaqyndauǧa, tarihty tereŋ zertteu üşın olardyŋ mänın jete tüsınuge, Qazaqstan halqynyŋ ūlttyq mädeni qūndylyqtarǧa degen qyzyǧuşylyǧyn jandandyruǧa mümkındık beredı. Damudyŋ ǧylymi tūjyrymdamasyna sai, muzeidıŋ basty mındetterınıŋ bırı – Qazaqstannyŋ materialdyq, ruhani jäne mädeni mūrasyn nasihattau, Astanany mädeni jäne halyqaralyq deŋgeidegı gumanitarlyq ortalyq retınde jäne Qazaqstandy tūtastai köne tarihy men bai mädenietı bar qarqyndy damyp kele jatqan zamanaui memleket retınde tanytu. Bızdıŋ basty mındetımız – elımızdıŋ ötkenı men bügının jäne keleşekke degen ūmtylysyn körsetu.
Ūlttyq muzeide sonau köne däuırlerden bastap, bügıngı künge deiıngı ūltqa qatysty qūndy mūralardyŋ köbısı jinaqtalǧan. Olardyŋ aldyŋǧy legı arheologiialyq qazba jūmystary kezındegı mūralar bolsa, odan keiıngı Qazaq handyǧy däuırınıŋ jädıgerlıkterı, Keŋes ükımetı tūsyndaǧy eksponattar, Täuelsızdık jyldaryndaǧy tarihi maŋyzy erekşe qūjattarǧa deiın bar.
– Darhan Qamzabekūly, Ūlttyq muzeidıŋ tabaldyryǧyn attaǧan jan ondaǧy soŋǧy tehnologiiany bırden baiqaidy. Zaman talabyna sai jasaqtalǧan būl dünienı, älbette, qoldaimyz. Muzei ısındegı osyndai sony jaŋalyqtar jäne olardyŋ artyqşylyqtary jaiynda äŋgımelep berseŋız.
– Jädıgerlerdı körsetu üşın aldyŋǧy qatarly tehnologiialardy qoldanu airyqşa maŋyzdy. Tehnika turaly aitqan kezde mümkındıgı şekteulı jandar üşın yŋǧaily pandustar, keluşılerdıŋ qyzyǧuşylyǧy men yqylasy erekşe tüsken baǧytta ekskursiia jasauǧa mümkındık beretın IT-tehnologiialar, multimediialyq gidter turaly aitpai ketuge bolmaidy. Muzei barlyq zamanaui talaptarǧa jauap beredı. Sondyqtan onyŋ eksponattary men ekspozisiialarymen tanysu öte qolaily ärı ūnamdy. Sonymen qatar, QR-kod, audio gid siiaqty zamanaui jaŋa qūrylǧylar bar. Būlardaǧy aqparattar – qazaq, orys, aǧylşyn tılderınde. Būl qūrylǧylardyŋ kömegımen muzeidegı barlyq ekspozisiiamen tanysyp şyǧuǧa bolady. Oǧan eşqandai da ekskursovodtyŋ qömegı qajet emes.
Ūlttyq muzeige keluşıler qai jasta bolmasyn, öz oiynan şyǧatyn ekspozisiia tauyp alady. Bızdıŋ astanamyzda 10 şaqty muzei qyzmet ısteidı. Jalpy, men Qazaqstandaǧy muzei ısın jüielı türde damytu qajet dep sanaimyn.
Sankt-Peterburgtıŋ bır özınde 200-ge juyq muzei bar. Ermitajben qatar, jeke menşık türındegı jäne memorialdy mekemeler de jūmys ısteidı.
Muzei – būl tarihi jadynyŋ qoimasy. Muzeige kelu – būl mäŋgılıkke janasuǧa mümkınşılık alu, ūlttyq qūndylyqtardy, öz halqyŋ men ūltynyŋ qazynasyn baǧalau. Ūlttyq muzei halyq jadynyŋ ruhani ortalyǧy bolu arqyly memlekettıŋ damuyna özınıŋ laiyqty ülesın qosatynyna senımdımın.
– «Bızde muzei mädenietı qalyptaspaǧan» degen pıkırdı estıp qalamyz aragıdık. Elımızdegı muzei ısınıŋ damuyna köŋıl tolmauşylyq ta joq emes. Keibır memleketterdıŋ aituly ruhani oşaqtary memleket qazynasynyŋ bır büiırın tompaituǧa jarap jatqanyn tılge tiek etedı olar. Al osy salanyŋ mamany retınde Qazaqstandaǧy muzeilerdıŋ damu deŋgeiı, osynyŋ ainalasyndaǧy problemalar, şeşımın kütken mäseleler turaly ne aitasyz?
– İä, bızdıŋ keibır adamdar muzeidı köne zattar qoimasy, küŋgırt jaryqtanǧan oryn dep tüsınuı de mümkın. Şyn mänınde olai emes. Özderıŋızge mälım, qazır Ūlttyq muzei zamanaui ozyq tehnologiiamen jasaqtalǧan. Ol jerge kelgen adamdar eksponattardy körıp qana qaitpai, audio, video qūraldary arqyly da mol maǧlūmat jinap qaituǧa mümkındıgı bar. Keluşılerge el mūrasyn barynşa tüsınıktı ärı qyzyqty etıp körsetuge barlyq jaǧdai jasalǧan. Sonymen qatar, muzei keluşılerge eksponattardy ǧana ūsynbai, ūiymdastyruşylyq, aǧartuşylyq, tärbielık jäne köpşılıkke ortaq ıstermen de ainalysady. Mūnyŋ barlyǧy – zaman talaby.
Sosyn, bızdıŋ muzei salasyndaǧy mäselelerımız elımızdıŋ «Mädeniet turaly» zaŋynda ışınara ǧana körınıs tapqan. Būl, bızdıŋ pıkırımızşe, muzeilerdıŋ barlyq tüitkıldı mäselelerın şeşuge mümkındık bermeidı. Al elde memlekettık, vedomstvolyq jäne jeke muzeilerdıŋ boluy, jalpy muzei jūmysynyŋ tolyq auqymyn retteitın zaŋnamalyq aktını äzırleudı talap etıp otyr. Qazırgı jaǧdaida märtebesı men zaŋdyq qorǧaluy mardymsyz muzeilerdıŋ köptegen qūndy zattary memleket nazarynan tys qalyp jatyr. Elımızdegı barlyq muzeilerdegı eksponattardy esepke alu, saqtau, olardyŋ ainalymyn, qozǧalysyn, basqa da reglamentterın standartty nūsqaulyqtar men qūjattardyŋ negızınde jürgızu – otandyq mädeniettıŋ baqylauyndaǧy jäne qamqorlyǧyndaǧy ortaq ısıne ainaluy tiıs. Dälırek aitqanda, muzei mäselesıne bıryŋǧai sauatty közqaras qajet. Dei tūrǧanmen, elımızdegı muzei salasynda alǧa jylju, damu baiqalady dep aituǧa negız bar. Elordanyŋ ortalyq alaŋynan boi kötergen Ūlttyq muzeidıŋ özı Qazaqstannyŋ mädeniet salasynda, sonyŋ ışınde muzei salasynda jetken zor jetıstık.
Qazırgı taŋda bızdıŋ muzeige keletın qonaqtardyŋ qatary molaiyp keledı. Äsırese, köktem-jaz mezgılınde elımızdıŋ tükpır-tükpırınen kelgen meimandar Ūlttyq muzeige mındettı türde bas sūǧady. Olardyŋ barlyǧyn muzeige äkeletın, elımızdıŋ tarihyna, muzeige degen qyzyǧuşylyqtary dep oilaimyn. Taǧy bır aita ketetın jait, bız jyl saiyn «Muzeidegı tün» aksiiasyn ūiymdastyramyz. 2015 jyly aksiiaǧa bır künnıŋ ışınde 23 myŋ adam kelgen. Al biylǧy körsetkış 32 myŋdy qūrap otyr. Sondyqtan elımızde muzeige degen qyzyǧuşylyq artyp keledı dep aituǧa bolady.
– Qazaqstanda muzeiler jeterlık. Dese de, köpşılıktıŋ Ūlttyq muzeige degen yqylasy airyqşa. Bälkım, Astanada oryn tepkendıkten, bälkım, säuletınıŋ airyqşa äsemdıgımen tartar… Sızdıŋ oiyŋyzşa, būl nysannyŋ atap aitarlyq qandai erekşelıkterı bar?
– Kez kelgen memleket turaly alǧaşqy äser men tüsınık onyŋ tarihymen tanysudan bastalady. Sondyqtan osy maŋyzdy missiia Ūlttyq muzeige jüktelgen. Baitaq Otanymyzdyŋ bai tarihyn tügendeu, dästürımen tanystyru, könenı bügınge jetkızıp, qazırgı qūndylyqtardy qasterleu arqyly Qazaqstannyŋ töl mädenietın älemge tanymal etu – Ūlttyq muzeidıŋ aldyna qoiylǧan kezek küttırmes mındetterdıŋ bırı.
Ūltymyzdyŋ jauhar jädıgerlerı men mädeni mūralarynyŋ bır parasy arqyly memlekettıgımız ben eldıgımızdı ūlyqtaityn Ūlttyq muzei dästürlı qyzmet körsetu aiasymen ǧana şektelmei, qoǧamnyŋ bar salasyna qajettı mädeni-aǧartu, ǧylymi-ädıstemelık, tanymdyq-ūiymdastyru jūmystarynyŋ qainaǧan ortasyna ainaluda. Älemdık standartqa sai salynǧandyqtan, mūnda jaŋaşyl tehnologiia jetıstıkterıne negızdelgen ǧylymi kıtaphana, türlı käsıbi şeberhanalar jūmys ısteidı. Jūmys jüielı jürıp, sabaqtastyq saqtalu üşın muzei bılıktı ǧalymdarmen jäne jas ızdenuşılermen tyǧyz qarym-qatynas ornatqan.
Sonymen qatar, Ūlttyq muzeide ūlttyq deŋgei bar. Sondyqtan da būl jerde memlekettık maŋyzǧa ie eksponattar ǧana saqtalady. Elımızdıŋ aumaǧynan tabylǧan kez kelgen qūndy jädıgerdıŋ tüpnūsqasyn osy muzeiden köruge bolady. Onyŋ üstıne Ūlttyq muzei materialdyq jäne ruhani-mädeni eskertkışterdıŋ tabiǧi, tarihi nūsqalaryn jinaqtap qana qoimai, olardy saqtap, zerttep, halyqqa körsetıp, nasihattap otyrady. Qūndy mūralar qory saqtalǧan şaŋyraqqa kelgen ärbır adam halyqtyŋ qūnarly mädenietınıŋ käusaryna qanady.
Ūlttyq muzei – Qazaqstannyŋ qazırgı bedelı men märtebesıne sai nysan. Mūndaǧy jūmystyŋ barlyǧy älemge äigılı muzeiler täjıribesımen käsıbi talapqa sai atqarylady. Bır ǧana mysal, muzeige keluşılerdıŋ jädıgerler jaily qosymşa aqparatty interaktivtı qūrylǧylardan aluyna mümkındıgı mol. Qazır Ūlttyq muzeide 85 mediaqondyrǧy jūmys ıstep tūr. Muzeide ejelgı zaman men orta ǧasyrlar, Ūly Jıbek jolynyŋ mol mūrasy keiıngı kezeŋderdegı jädıgerlermen sabaqtasyp, etnografiia, müsın, körkemsuret, keskındeme jäne ūlttyq qoldanbaly öner tuyndylary özara üilesım tapqan. Eŋ basty qūndylyǧymyz – täuelsızdık bolsa, mūnda elımızdıŋ jaŋa däuırındegı oqiǧalar jönınde maǧlūmattar da keŋ qamtyldy. Halqymyzdyŋ tarihy men mädenietın tereŋ tanyǧysy keletın kez kelgen adam jädıgerlerdıŋ erekşelıgı men airyqşa tarihi orny turaly jan-jaqty maǧlūmat ala alady.
Muzei qorlarynyŋ kolleksiialary otandyq jäne älemdık qoǧamdastyqqa keŋınen mälım sonau tas ǧasyryndaǧy materialdar men qoladan jasalǧan būiymdardan, saq-skif däuırındegı bai qazynadan, qazaqtyŋ dästürlı zergerlık, halyqtyq-qoldanbaly önerınıŋ üzdık ülgılerınen, Qazaq handyǧynan bastap qazırge deiıngı qūndy materialdardan, sondai-aq Täuelsız Qazaqstannyŋ qalyptasuy men nyǧaiuynyŋ kuäsı sanalatyn bıregei jädıgerlerden tūrady.
Ūlttyq muzeidıŋ taǧy bır erekşelıgı retınde Astana jäne Täuelsız Qazaqstan zaldaryn aituǧa bolady. Astana zaly men Täuelsız Qazaqstan zaly keluşılerdıŋ barlyǧyn derlık bei-jai qaldyrmaidy. Atalǧan ekı zal da qūndy eksponattarǧa bai. Naqtyraq aitsaq, Täuelsız Qazaqstan zalynda maŋyzdy qūjattar, täuelsızdık jyldarynda türlı saladaǧy jetken jetıstıkter jönındegı maǧlūmattar jinaqtalǧan. Būdan bölek, basty qūndylyqtarymyzdyŋ bırı bolyp tabylatyn Memlekettık rämızderımızge arnaiy vitrinadan oryn berılgen. Däl osy Täuelsızdık zalyna kıru arqyly keluşıler täuelsızdıkten keiıngı jyldardaǧy aituly datalar men maŋyzdy oqiǧalarǧa köz jügırte alady. Jäne de LED ekrandardan täuelsız Qazaqstan turaly video materialdar, filmder körıp, 3D formatynda elordamyzdyŋ äleumettık-saiasi jäne mädeni ortalyqtaryna saiahat jasau mümkındıgıne ie. Astana zalyna bas sūqqan keluşıler köne däuırden bastap, bügınge deiıngı qala tarihymen keŋınen tanysa alady. Qos zaldyŋ da Ūlttyq muzei ekspozisiialarynyŋ qatarynan alar orny erekşe. Bırı Täuelsız Qazaqstannyŋ jetken jetıstıgın barşa muzei qonaqtaryna paş etse, ekınşısı älemnıŋ tükpır-tükpırınen kelgen qonaqtardyŋ taŋdaiyn qaqtyrǧan aru Astanany äspettep tūr.
– Darhan Qamzabekūly, elordadaǧy jaŋalyqtarǧa qūlaǧymyz türık jüretındıkten, Sızderdıŋ şeteldık ärıptesterıŋızben bailanystaryŋyzdyŋ joǧary ekendıgınen habardarmyz. Osyndai ızgı ısterıŋızdıŋ arqasynda ūiymdastyrylǧan bırneşe şaralaryŋyzdyŋ da kuäsı bolǧanymyz bar. Naqty nätijelerdı oqyrmanymyzǧa öz auzyŋyzben äŋgımelep berseŋız.
– İä, dūrys aitasyz.Ūlttyq muzei qazaqstandyq mädeniet pen tarihty ǧana emes, jalpy adamzatqa ortaq ruhani bailyqqa män berıp otyratyny ras. Muzei aşylǧaly halyqaralyq deŋgeidegı köptegen ıs-şaralar ötıp, mädeni bailanystar jüzege asty. Älemnıŋ ırı mädeniet oşaqtarymen kelıssözder jürgızıp, memorandumdar jasastyq. Aldaǧy uaqytta da osy baǧyttaǧy jūmystardy küşeituge basymdyq berıp otyrmyz. Öitkenı Elbasynyŋ osy muzeidı saluǧa tapsyrma berıp, jeke qadaǧalauyna aluyndaǧy maqsat, öz elımızdıŋ tarihyn ūlyqtai otyryp, özge jūrttyŋ da mädenietın, tarihyn bıluge, tanuǧa mümkındık jasau boldy deuge bolady. Mysaly, byltyr ǧana Ūlttyq muzeide Ermitaj künderı öttı. Sol siiaqty Resei etnografiialyq muzeiı, «İsaakievskii sobor», Ūly Petr atyndaǧy Antropologiia jäne etnografiia muzeiı (Kunstkamera) siiaqty körşı Reseidıŋ bırneşe mädeni-tarihi oşaqtarymen bailanysymyz ornyqty. Sondai-aq, Ūlttyq muzei şyǧystaǧy körşımız Qytai elımen de tyǧyz qarym-qatynasta. Mädeni, ruhani, ekonomikalyq bailanysymyzdyŋ tamyry tym ärıde. Osydan bıraz uaqyt būryn Qytai Halyq Respublikasynyŋ Qazaqstandaǧy mädeni künderı aiasynda bızdıŋ muzeide qytai farfory körmesı jäne Qytaidyŋ ekologiialyq mädenietı taqyrybyndaǧy fotokörme ūiymdastyryldy. Körmelerde Qytaidyŋ ekskliuzivtık, zamanaui, qoldan jasalǧan farfor būiymdary, keramika qolönerı jäne Qytaidyŋ ekomädenietı men ekoauyldar qūrylysynyŋ tabysyn beineleitın fotokartinalar körsetılgen bolatyn. Sonymen qatar, osy byltyr Qytaidyŋ «Datan Sişi» batys naryǧyndaǧy Sian muzeiı direktorynyŋ şaqyrtuymen baryp, atalǧan muzeimen yntymaqtastyq jönınde uaǧdalastyqqa qol qoidyq. Jaqynda Vetnam tarih muzeiımen jäne Koreianyŋ Ūlttyq muzeiımen bailanys ornattyq. Ūlttyq muzeide soŋǧy 2 aidyŋ özınde bırneşe halyqaralyq deŋgeidegı körme ūiymdastyryldy. Mäselen, İtalian mozaikasynyŋ, Korei ūlttyq kiımderınıŋ körmesı, «Ündıstan festivalı» syndy mädeni şaralar öttı. Şeteldıŋ elşılerımen kezdesuler ötıp, olardyŋ elderımen bailanys ornatuǧa alǧyşarttar jasaluda. Saiyp kelgende, mūnyŋ barlyǧy Memleket basşysynyŋ qoldauymen jäne bızge jasaǧan ülken mümkındıgınıŋ arqasynda ıske asyp otyr.
Osyndai mädeniet ortalyǧyna merekeler men mereitoilar kezınde ǧana emes, Qūdaidyŋ qūtty künınde bas sūǧyp jatqan meimandarǧa, el-elden, jer-jerden kelıp, at basyn būrǧan aǧaiynǧa qyzmet sapasyn arttyra berudıŋ özı sauapty ıs dep bılemız.
– Äŋgımeŋızge raqmet!
Sūhbattasqan: Ashat RAIQŪL