Astana qalalyq mäslihattyŋ kezektı tūraqty komissiia otyrysy ötıp, onda qalanyŋ damuyna serpın beretın mäseleler talqylandy.
Aldymen elordalyq Ekonomika jäne biudjettık josparlau basqarmasynyŋ basşysy Älıbi Jūmaev qalalyq mäslihattyŋ 2015 jylǧy 11 jeltoqsandaǧy «Astana qalasynyŋ 2016-2018 jyldarǧa arnalǧan biudjetı turaly» şeşımıne özgerıster engızu turaly baiandama jasady. Ol öz sözınde biylǧy jylǧy elordanyŋ damu deŋgeiı eselengenın aityp, salyq tüsımderı artqanyn jetkızdı. Sonymen bırge, qaralyp otyrǧan qosymşa qarjylardyŋ denı elordanyŋ sanitarlyq salasy men tazalyq şaralaryna jäne merekege bailanysty qalany bezendıruge baǧyttalyp otyrǧanyn baiandady. Sondai-aq, äleumettık sala da nazardan tys qalmaityndyǧyn aitty.
Komissiia otyrysynda Memlekettık qajettılıkter üşın jer uchaskelerın jäne onda ornalasqan jyljymaityn mülık obektılerın satyp alu turaly şarttardyŋ jobalaryn kelısu turaly jäne Astana äkımdıgı janyndaǧy sybailas jemqorlyqqa qarsy ic-qimyl jönınde vedomstvoaralyq komissiiasynyŋ qūramy men elorda äkımdıgınıŋ janyndaǧy mal şaruaşylyǧy salasyndaǧy mäseleler jönındegı komissiianyŋ qūramy jaiynda äŋgıme örbıdı.
Jiynda taǧy bır maŋyzdy mäsele söz boldy. Ol – keşe ǧana Parlamenttıŋ qos palatasy qabyldaǧan el üşın erek, saiasi mazmūny bölek Täuelsızdıgımızdıŋ 25 jyldyǧyna arnalǧan deklarasiianyŋ qabyldanuy. Mäslihat deputattary būl maŋyzdy qūjatty bırauyzdan qoldap, öz oilarymen bölıstı.
– QR Parlamentı qabyrǧasynda qabyldanǧan Täuelsızdık deklarasiiasy biylǧy tarihi jylda qabyldanyp otyrǧan maŋyzdy qūjat dep baǧalaimyn. Täuelsızdık – eldıŋ ülken baqyty. Bızdıŋ memleketımız jas qairatty jıgıttıŋ jasyna kelgen uaqytynda qanşama jetıstıkterge jetıp, älem tanyǧan elge ainaldy. Ekonomikamyzdyŋ quaty artyp, äleumettık sala damydy. Jaŋa baǧdarlamalar qabyldandy. Qazaqstandy mekendegen ūlttardyŋ barlyǧy bır maqsatqa bırıgıp, eŋbektıŋ körıgın qyzdyrdy. Astanamyz köz aldymyzda äsem qalaǧa ainaldy. Qanşama oqu oryndary aşyldy. Jaŋa mektepter boi köterdı. Bılımdı jastardyŋ legı qalyptasty. Sonyŋ barlyǧy Elbasynyŋ saliqaly saiasatynyŋ jemısı dep bılemın. Sondyqtan Täuelsızdık deklarasiiasyn tolyq qoldaimyn! – dedı mäslihat deputaty Zäure Jüsıpova.
Al elordalyq mäslihattyŋ jas deputaty Ashat Oralov egemendıktıŋ 25 jyldyq tarihynda qabyldanǧan Täuelsızdık deklarasiiasyn jastar da qoldaityndyǧyn jetkızdı. «Elımızdıŋ osy uaqyt aralyǧynda jetken jetıstıkterı men jeŋısterı Qazaqstannyŋ Tūŋǧyş Prezidentı – Elbasy Nūrsūltan Nazarbaevtyŋ sarabdal saiasatynyŋ arqasynda jüzege asty dep senımmen aita alamyz. Sondyqtan Memleket basşysynyŋ erık-jıgerı men köregendılıgı el damuynyŋ tabysty jolyn aiqyndap, respublikamyzdyŋ ösıp-örkendeuıne mümkındık berdı» dedı ol.
Azamat ESENJOL
