«Menıŋ tüsınıgımde otbasy degenımız – qiyndyq kezınde ärdaiym bır-bırıne süieu bolu, qandai jaǧdaiǧa da qaramastan bırge bolu degen söz. Är otbasynyŋ dıŋgegı myqty bolsa, elımızdıŋ de tūǧyry berık bolady. Mūny şaŋyraq qūrǧan är jas tüsıne bıluı qajet» deidı bızben äŋgımesınde därıger-nefrolog Oryngül Narmanova.
«Mereilı otbasy» baiqauynda Qanat pen Oryngül Narmanovtar «Şuaqty otbasy» atalymynda jeŋımpaz atanǧan edı. Därıgerlık mamandyqty taŋdaǧan erlı-zaiyptylar rasymen de talai adamdy emdep jazyp, olarǧa şuaqty köŋıl syilady.
Qanat men Oryngül 1985 jyly Aqtöbe medisinalyq institutyn bıtırgen. «Ekeumızdıŋ tanystyǧymyz da qyzyq. Menıŋ äkem Jaqsybai Maidanov elımızge tanymal urolog-därıger. Ol kısı menıŋ därıgerlık oqudy taŋdauyma yqpal ettı. Onymen qoimai, muzykadan habarym bolǧanyn qalady. Äkemnıŋ sözın ekı etıp körmegen men instituttyŋ halyq aspaptar orkestrıne jazyldym. Bır künı orkestrdıŋ kezektı sabaǧynda tu syrtymnan bıreudıŋ qarap tūrǧanyn baiqadym. Jalt qarasam, dombyra men asataiaq ūstaǧan jıgıt jyly jymiiady. Ekeumız tez tıl tabysyp kettık. Keiın instituttaǧy därısten de, orkestrdegı oqudan da bırge qaşatyn boldyq (küldı). Keiın Qanat menı körıp tūru üşın amalsyzdan orkestrge jazylǧanyn moiyndady» deidı Oryngül Jaqsybaiqyzy jastyq şaǧyn bır şolyp.
Oryngül Jaqsybaiqyzy instituttyŋ betkeūstar studentı bolypty. Oquda da ozat, qoǧamdyq jūmystarǧa da belsendı atsalysatyn ol bırde institut atynan olimpiadaǧa qatysuǧa Şymkentke attanady. Sol jerde bolaşaq jary Qanattyŋ otbasymen tanysady. Qos ǧaşyq institut qabyrǧasynda jürgende şaŋyraq köteredı.
– Şymkent dese şorşyp tüsetınder sol kezde de boldy, – deidı jymiyp Oryngül apamyz. – Menıŋ Şymkentke küieuge şyǧatynymdy estıgen qūrbylarym şala bülındı. «Ol jaqqa kelın bolsaŋ, basyŋa oramal bailaidy da üide otyrǧyzyp qoiady. Taŋnan keşke deiın sol üidıŋ jūmysynan bel jazbaisyŋ. Oqyǧan eŋbegıŋ jaiyna qalady» dep, nebır sözderdı jeldırttı. Bıraq Qanat tūrǧanda, maǧan qandai qiyndyqtar da qorqynyşty emes edı. Qatelespedım de.
«Jaqsydan jaqsy tuady» demekşı. Narmanovtar otbasynyŋ tūŋǧyşy Äsel de qūrbylarynyŋ aldy. Ol – QR Prezidentı janyndaǧy Memlekettık qyzmet akademiiasynyŋ tülegı. Anasyna tartyp Äsel de oqudy üzdık bıtırdı. Aǧylşyn tılın erkın meŋgergen ol ministrlıkke jūmysqa tūrdy. Keiın Ǧalymjan atty jıgıtpen bas qosyp, ata-anasyna Aianälı atty süikımdı jien süidırıp otyr.
Qanat pen Oryngüldıŋ ekınşı qyzy Altynai da erekşe bala bolyp östı. «Bırde qasiettı Türkıstanǧa saparymda Taiqazannyŋ tübıne baryp, Alladan maǧan perzentımnıŋ aqyl-oiy kemeldı, aiaq-qoly sau boluyn sūrap, medet tılep edım. Osy tılegım qabyl bolyp, Altynaiym öte aqyldy qyz bolyp tudy. Özı näzık bolsa da sabaǧyn kıleŋ beske oqydy. Öz küşımen älemnıŋ eŋ bedeldı joǧary oqu oryndarynyŋ bırıne grantqa tüstı. 2011 jyly biologiia boiynşa ötken düniejüzılık olipiadada qola medaldı jeŋıp aldy» deidı anasy maqtanyşpen. Osy medaldı Altynaidyŋ öŋırıne Elbasy Nūrsūltan Nazarbaevtyŋ özı taǧyp bergen eken. Jüldenı ūsynarda Prezident: «Altynai, olipiadada jeŋu qiyn boldy ma?» dep sūrasa kerek. Sonda kışkentai qyz müdırmesten: «Joq. Op-oŋai» dep jauap berıptı. Qazır Altynai şetelde oquyn jalǧastyryp jür.
Al Narmanovtardyŋ üşınşı qyzy Ǧaziza – 14 jasta. Özı önerlı. «Ostrov Dens» ansamblı qūramynda elımızdıŋ talai qalasyn önerımen täntı etıp jür. Qazırdıŋ özınde «Aigölek», «Şattyq» respublikalyq konkurstarynyŋ jeŋımpazy bolyp ülgerıptı. Tıptı, halyqaralyq baiqaularda da top jarǧany bar. Ata-anasy Ǧazizanyŋ bolaşaǧynan ümıttı.
Qanat pen Oryngül ülbıregen üş qyzdan keiın köpten kütken ūldy boldy. Taiyr qazır 5 jasta. «Özı kışkentai bolsa da patriot bolyp ösıp keledı» deidı ata-anasy.
«Balalaryŋyzdyŋ bärı jaqsy oqidy eken. Jetken jetıstıkterı de maqtan eterlık. Mūndai ozat balalardy tärbieleudıŋ qūpiiasy nede?» dep sūradyq bız Oryngül Jaqsybaiqyzynan. «Eŋ bastysy, balaŋnyŋ qandai salaǧa beiım ekenın der kezınde tani bılu kerek. Köp ata-analar balasynyp, onyŋ aitqan ūsynys-tılegın tyŋdai bermeidı. Qandai jaǧdai bolsyn, balanyŋ jürek qalauyna ün qosyp, qajet kezınde aqyl-keŋes berıp, dūrys baǧyt-baǧdar körsete bılu qajet. Mysaly, bız basynda Altynai şetelge baryp oqimyn degende, qinaldyq. Qai ata-ana da balasynyŋ köz aldynda jürgenın qalaidy ǧoi. Bıraq qanşa qinalsaq ta balanyŋ köŋılın qimadyq. Şükır, ümıtımızdı aqtap, qazır Oŋtüstık Koreianyŋ KAIST universitetınde ülgılı student bolyp jür. Armany – kärılıkten «qūtqaratyn» därı oilap tabu» deidı ol.
Oryngül Jaqsybaiqyzynyŋ özı «Astana» medisina universitetınıŋ professory, medisina ǧylymynyŋ doktory, büirektı auystyru boiynşa operasiialardyŋ üilestıruşısı. Öz salasynda osyndai jetıstıkke jetkenıne qaramastan ol ana ekenın, bıreudıŋ jary ekenın eşqaşan ūmytqan emes. Qyzdaryn üi şaruasyndaǧy barlyq ıske üirettı. Tıptı, keste tıgu, toqyma toqudan bastap, qonaq kütu,merekelerdı ūiymdastyruǧa da beiım etıp tärbieledı.
Al Qanat Narmanov bolsa, oqu bıtırgennen keiın Şymkent qalasyna joldamamen jol tartady. Sonda neirohirurg-därıger retınde bırtalai jetıstıkke jettı. Keiın Astanaǧa köşıp kelgende neirohirurg mamandyǧyn kompiuterlık tomografiianyŋ därıgerlıgıne auystyrdy.
Kandidattyq jäne doktorlyq dissertasiiasyn sättı qorǧaǧannan keiın ol ömırın jūbaiyna demeu boluǧa arnady. «Qazırgı taŋda elımız boiynşa 2 myŋnan asa adam büiregın auystyruǧa kezekte tūr. Sondyqtan därıger retınde Oryngüldıŋ eŋbegı halyqqa äldeqaida kerek» deidı Qanat Narmanov.
…Narmanovtar otbasynda gramotalar men alǧys hattarǧa arnalǧan erekşe albom bar. Otbasy müşelerınıŋ är jyldardaǧy jetıstıgı osynda qattalyp tūr. «Kez kelgen adamǧa jetıstık oŋailyqpen kelmeidı. Būl – talai jyldardaǧy maŋdai ter, eren eŋbektıŋ nätijesı. Eŋbek etseŋ ǧana maqsatyŋa jetesıŋ, qiyndyqtardy jeŋesıŋ. Bız qinalǧan sätterımızde osy albomdy aqtaryp, kez kelgen qiyndyq bızge berılgen uaqytşa synaq ekenın, tek qiyndyqtar arqyly jetıstıkke jetetınımızdı ūǧynamyz. Eŋ bastysy, auyrtpalyqqa moiymau kerek. Onyŋ artynda mındettı türde bır jaqsylyq tūrady» deidı Oryngül Jaqsybaiqyzy. Būl da bır Narmanovtar otbasynyŋ özgege önege eter qūndylyǧy bolsa kerek.
Qymbat NŪRǦALİ
