QR Qarjy ministrlıgı Memlekettık kırıster komitetı qazaqstandyq käsıpkerlerdıŋ jūmysyn jeŋıldetu üşın E-Salyq Business jaŋa mobildı qosymşasyn äzırledı. Qosymşa jeke käsıpkerdı tırkeuden bastap, arnaiy salyq rejimderın taŋdau, esep-qisap pen kırısterdı jürgızu tärtıbıne qatysty barlyq jūmysty oŋai jürgızuge kömektesedı.
Komitet töraǧasynyŋ orynbasary Jaidar Iŋkärbaevtyŋ aituynşa, būryn şaǧyn käsıpkerlık subektılerı üşın aitarlyqtai qiyndyq tuǧyzatyn räsımder köp boldy. Atalǧan qosymşada barlyq qyzmet qarastyrylyp, ol kassa apparatynyŋ funksionalymen jetıldırılgen. Kassa tübırtekterı bazasynda käsıpkerdıŋ kırısı qalyptasady jäne osy tabystyŋ bazasynda avtomatty türde salyq deklarasiiasy toltyrylady. «Qosymşany paidalanatyn käsıpkerge memlekettık kırıster basqarmasy bölımşelerıne barudyŋ qajet joq. Barlyq qyzmetter avtomatty türde jüzege asyrylady. Qosymşa servister türlı anyqtamalardy berudı qarastyrady. Salyq organdary tarapynan qajet bolǧanda eskertpeler kelıp tüsedı» deidı J.Iŋkärbaev. Mobildı qosymşany 400 myŋ jeke käsıpker qoldana alady jäne ony Play market-ten jükteuge bolady. Qazır App store-de atalǧan qosymşany jükteu üşın berılgen ötınımge jauap alu räsımderı jürıp jatyr.
