QOS KOREIа OLİMPİADANY BIRGE ÖTKIZUI MÜMKIN
Seul men Phenian 2032 jyly ötetın Olimpiada oiyndaryn bırıgıp ötkızuı mümkın.
Yonhap agenttıgınıŋ habarlauynşa, Oŋtüstık Koreia tarapy Soltüstıktegı körşılerıne Olimpiada oiyndaryn bırıgıp ötkızu turaly ūsynys jasamaq. Būl turaly Oŋtüstık Koreianyŋ sport ministrı Do Chon Hvan mälımdedı.
– Men būl ūsynysty Korei tübegındegı jaǧdaidy retteu üşın ūsynǧaly otyrmyn. Seul men Phenian būl oiyndardy bırıgıp ötkızuı mümkın, – dedı ministr.
Onyŋ aituynşa, biylǧy Phenchhanda ūiymdastyrylǧan qysqy oiyndarǧa KHDR-dyŋ qatysuy Korei tübegındegı şielenıstı azaitty. Bır aitarlyǧy, osy jyly qysqy Olimpiadaǧa hokkeiden qos eldıŋ qyzdar qūramasy bırıgıp şyqqan bolatyn.
Do Chon Hvan tek qysqy oiyndarmen şektelmeitının, 2030 jyly futboldan ötetın älem chempionatyn Qytai, Japoniia jäne Soltüstık Koreia elderımen bırıgıp ötkızu josparda baryn aitty. Osyǧan deiın sport ministrı Tokioda ūiymdastyrylǧaly otyrǧan jazǧy Olimpiadaǧa Soltüstıktegı körşılerımen bır komanda şyǧarudy ūsynǧan bolatyn.
BALANY QŪTQARYP, AZAMATTYQ ALDY
Fransiiaǧa Mali elınen qonys audarǧan Mamudu Gassama esımdı bosqyn jūrttyŋ ystyq yqylasyna bölendı. Ol osydan bırneşe ai būryn köp qabatty tūrǧyn üilerdıŋ bırıne örmelep şyǧyp, balkonnan qūlaiyn dep tūrǧan büldırşındı qūtqaryp qalǧan bolatyn.
Osy oqiǧadan keiın el prezidentı Emmanuel Makron «örmekşı» jıgıttı Elisei saraiynda qabyldap, bükıl Fransiia halqynyŋ atynan alǧys aitqan. Jaqynda Mamudu Gassamaǧa Fransiia azamattyǧy berıldı.
– Ol batyldyǧynyŋ, erjürektılıgınıŋ arqasynda ülgı bolarlyq qadamǧa bardy, – dedı Fransiianyŋ premer-ministrı Eduard Filipp.
Aita keteiık, 22 jastaǧy bosqyn ötken jyldyŋ qyrküiek aiynda Mali elınen zaŋsyz köşıp kelgen.
EŊ KÖNE SURET TABYLDY
Ǧalymdar älemdegı eŋ köne surettı anyqtady. Ol Oŋtüstık Afrika Respublikasyndaǧy Blombos üŋgırınde 73 myŋ jyl būryn salynǧan eken.
Arheologtar mikroskopiialyq jäne himiialyq zertteu jürgızıp, nätijesınde surettıŋ arnaiy äzırlengen boiaumen daiyndalǧanyn anyqtady. Būǧan qosa, surettıŋ tolyq küide saqtalmaǧany da belgılı boldy.
– Būl suret sol kezeŋdegı halyqtyŋ tūrmysynan syr şertıp tūr. Tuyndyǧa män berıp qarasaq, bärıne tüsınıktı belgını baiqauǧa bolady. Sondai-aq, surettıŋ kelesı bır tūsy üzılıp qalǧanyna qarap, tolyq saqtalmaǧanyn anyqtap otyrmyz, – dedı arheolog Kristofer Henşilvud.
Aian ÄBDUÄLİ
