Töleubike apai ötken künderdı jiı eske alady. 1986 jyly jeltoqsanda Almatyda otarşyl, äkımşıl-ämırşıl jüiege qazaq jastary qarsylyqtaryn bıldırdı. Däl osyndai oqiǧa Aqmolada da örbıdı. Ortalyq alaŋǧa osyndaǧy joǧary oqu oryndarynda oqityn qazaq jastary jinalyp, bilıkke: «Aqmolada qazaq mektepterı, balabaqşalary aşylsyn» degen talaptar qoidy. Mıne, osy oqiǧa qamşy boldy ma, 1987 jyly şahardaǧy №3 orys mektebınen qazaq synyptaryn aşu qolǧa alyndy.
Onda Aqmolada jalǧyz ǧana Jambyl Jabaev atyndaǧy №4 qazaq orta mektebı ǧana bar bolatyn. Osyndai syndarly sätterdıŋ ortasynda Töleubike Atyǧaiqyzy Myŋjasarova da jürdı. Däl sol kezde bızdıŋ keiıpkerımızdıŋ Qorǧaljyn audanyndaǧy Sabyndyköl orta mektebınen şahardaǧy Jambyl orta mektebıne ornalaspaq oiy bolady. Bıraq ony qalalyq bılım bölımı jaŋadan aşylatyn qazaq synybyna jıberedı. Ärine, ony aşu da oŋai bolǧan joq.
Qazaq synybynda oqityn bala joq, oqulyq tapşy degen syltaular da aityldy. Bıraq sol kedergıge qaramastan Töleubike apai qiyndyqqa qasqiyp qarsy tūra bıldı. Orys mektebındegı alǧaş aşylǧan qazaq synybyna balalardy tartu üşın osyndaǧy ziialy qauym ökılderı – Mädi Hasenov, Oktiabr Älıbekov, Jomart Äbdıhalyq, Aldan Smaiyl, Bäduan İmaşev sekıldı azamattar üilerdı jaǧalap, oquşylardyŋ tızımın jasady. Alǧaş bolyp, Selinograd oblystyq atqaru komitetınıŋ töraǧasy, ūlttyŋ janaşyr azamaty Qasym Täukenov nemeresın bırınşı synypqa jetektep alyp keldı. Odan keiın tanymal aqyn Nūrǧoja Oraz nemeresın, jazuşy Nögerbek Maǧzūmov jäne Eskermes İmanbai, Jylqybai Jaǧyparūly sekıldı qalamgerler balalaryn berdı.
«Söitıp, bırınşı synypqa 25 bala jinaldy. Endı olardy oqytatyn oqulyq ta tapşy. Metodikalyq ädıstemelerdıŋ bärı orysşa jazylǧan. Kündız mūǧalım, tünde audarmaşy bolyp, solardy audardym. Bıraq oǧan sonşalyqty moiyǧan emespın. Jetkınşekterdıŋ oquǧa degen yntasy zor boldy. Olarǧa qal-qaderımşe ana tılımızdıŋ qūnaryn sıŋıruge küş saldym. Abaidyŋ, Ybyraidyŋ şyǧarmalaryn oqyttym. Bärı de qala balalary bolsa da, täp-täuır qazaqşa söileitın boldy. Sol jyldary №3 orys mektebınen basqa, №8, 26 orys mektepterınen qazaq synyptary aşyldy. Solardy aşuǧa üles qosyp, balalardy jinauǧa küş salǧan Oblystyq «Arqa ajary» gazetınıŋ jurnalisterı edı. Būl kezeŋ men üşın qiynşylyǧy men quanyşy eşqaşan esımnen şyqpaityn aŋyzǧa toly jyl boldy» dep eske alady ūstaz.
Töleubike Aǧytaiqyzy №3 orys orta mektebınde özı qabyldap alǧan oquşylaryn üşınşı synypqa deiın oqytyp, 1991 jyly Jambyl Jambaev atyndaǧy №4 orta mektebıne auysady. Osy oqu ordasynda 21 jyl tapjylmai tabandy eŋbek ettı. Būl mekteptıŋ qūrylǧanyna bır ǧasyrdan astam uaqyt ötken. Onyŋ tarihy ejelgı Qaraötkeldıŋ ötkenımen sabaqtasyp jatyr. Keŋes zamanynda tyŋ ortalyǧy sanalǧan Aqmoladaǧy qazaq balalary bılım alatyn altyn ūia atandy. Bügınde jyrau babamyz atyndaǧy gimnaziianyŋ jetken biıgın termelesek, ūzaqqa şabamyz. Elordadaǧy eŋ üzdık mektepterdıŋ bıregeiı. Onda oqityn oquşylar öz bılım ordalaryn maqtan tūtady. Ata-analar da balalaryn sonda oqytqandy qalap tūrady. Öitkenı onda ǧasyrdan ūzaq qalyptasqan parasatty dästürdıŋ ızı öşpegen. Bız söz etıp otyrǧan bılım ūiasynyŋ osyndai abyroiǧa jetuıne, sondaǧy bılıktı mūǧalımder qataryndaǧy Töleubike Myŋjasarovanyŋ da qosqan ülesı zor. Täjıribelı pedagogtyŋ köp jylǧy eŋbegı elenıp, «QR Bılım beru ısınıŋ üzdıgı» belgısın aldy. Ūly aǧartuşy atyndaǧy Y.Altynsarin belgısın ielendı. QR Bılım jäne ǧylym ministrınıŋ Qūrmet gramotasymen marapattaldy. Bärınen būryn apaidyŋ jetıstıgı – şäkırtterı baǧyndyrǧan belester. Bügınde jany jūmsaq ūstazdan tälım alǧan oquşylary elımızdıŋ är salasynda jemıstı eŋbek etıp jür. Olardyŋ arasynda şetelde oqyp, basşylyq qyzmetke köterılgen, ǧylym şyŋyn baǧyndyrǧan talantty jastar jeterlık.
Ardaqty apai zeinetkerlıkke şyqqannan keiın de mekteppen bırjola qoştasqan joq. Keşegı künge deiın №73 fizika-tehnikalyq liseiınde qyzmet ıstedı. Bır sözben aitqanda, Qorǧaljynnyŋ ūiadai ǧana Ūialy degen auylynan qanattanyp, Aqmolada şyŋdalyp, Astanada mereiı ösken Töleubike apai – şyn mänındegı ūstaz degen märtebege ie bolǧan jan.
