Sanksiia nege äser etpeidı?
Älemge joiqyn qaruymen ses körsetıp otyrǧan Soltüstık Koreianyŋ türlı halyqaralyq sanksiialardan qalai aman otyrǧany belgılı boldy.
Būl turaly BŪŪ habarlady. Ūiymnyŋ mälımetı boiynşa, Soltüstık Koreia reseilık jäne qytailyq biznesmender arqyly kün körıp otyrǧan körınedı. Osynyŋ arqasynda halyqaralyq sanksiialar Kim Chen Yn bastaǧan elge tiıstı deŋgeide äser etpei otyr.
Halyqaralyq tyiymdarǧa qaramastan qytai kompaniialary KHDR-dan türlı önımder satyp alyp otyr. Būǧan qosa Resei men Qytai teŋız arqyly Phenianǧa ırı kölemde janarmai jetkızedı eken. NBC News basylymynyŋ habarlauynşa AQŞ tarapy jedel türde BŪŪ otyrysyn ötkızudı talap etude.
Osyǧan deiın The Wall Street Journal basylymy Soltüstık Koreianyŋ Siriia, Iemen, Liviia sekıldı elderge qaru-jaraq satatynyn habarlaǧan. Osyǧan ūqsas türlı halyqaralyq aiyptaularǧa bailanysty 2017 jyldyŋ jeltoqsanynda BŪŪ-nyŋ Qauıpsızdık Keŋesı KHDR-ǧa salynǧan sanksiialardy küşeitıp, nätijesınde būl elge janarmai jetkızudı şektegen.
Zeinetkerlık jas 68-ge deiın ūlǧaitylady
Meksikanyŋ jaqynda sailanǧan prezidentı Andres Manuel Lopes Obrador halyqty zeinetke 68 jasynda şyǧarudy qarastyryp otyr.
Būl bastama turaly ötken jūma künı Meksikanyŋ qarjy ministrınıŋ orynbasary Herardo Eskivel mälım ettı. Būǧan qosa ol jaŋa özgerıster prezidenttıŋ altyjyldyq merzımınıŋ ekınşı jartysynda, iaǧni 2021 jyldan keiın jüzege asyrylatynyn mälım ettı.
Aita keteiık, Meksikada er adamdardyŋ ortaşa jasy 76-ny, al äiel adamdardıkı 80 jasty qūraidy. Al zeinetke qazırdıŋ özınde tek 65 jasynda şyǧa alady.
Poiyz sutegımen jüredı
Sutegı otynmen jüretın älemdegı eŋ alǧaşqy poiyz bırer kün būryn Germaniiada synaq tärtıbınde jürgızıldı. Deutsche Welle basylymynyŋ aqpary boiynşa Coradia iLint poiyzy jaqyn uaqytta tolyǧymen ıske kırıspek.
Aldaǧy künderı jaŋa kölık Kukshafen, Bremerhafen jäne Bukstehude qalalarynyŋ arasynda qatynaidy. Mälımetterge säikes, poiyzdyŋ töbesıne sisterna men otyn elementı ornatylǧan. Ol sutek energiiasyn elektrlı toqqa ainaldyrady. Ekologiialyq jaǧynan taza bolyp eseptelgendıkten, qorşaǧan ortaǧa ziianyn tigızbeidı.
Jaŋa qūrylǧy saǧatyna 140 şaqyrym jyldamdyqpen jüre alady. Sondai-aq sutek otynyn bır ret toltyryp qoisa 1000 km-ge deiın jetedı. Ekologiialyq taza transportty fransuzdyŋ Alstom kompaniiasy Germaniianyŋ Zalsgitter qalasynda qūrastyryp şyǧardy.
Aldaǧy üş jyl ışınde osyǧan ūqsas 14 poiyz qoldanysqa engızıledı dep josparlanyp otyr. Būǧan qosa osy ädıs arqyly dizelmen jüretın poiyzdar almastyrylmaq. Būǧan qazırdıŋ özınde 81,3 mln euro bölınıp otyr.
Aian ÄBDUÄLİ
