Nūr-sūltan qalasynyŋ biudjetıne aldaǧy üş jylda 1 trln 208 mlrd teŋge tüsedı dep josparlanyp otyr. Sonyŋ qomaqty bölıgı äleumettık salaǧa baǧyttalmaq.
Onyŋ ışınde aldaǧy jyly halyqty jūmyspen qamtu jäne äleumettık qorǧau mäselelerıne – 13,9 mlrd teŋge, densaulyq saqtauǧa – 8,9 mlrd teŋge, mädenietke – 7,6 mlrd teŋge, dene şynyqtyru jäne sportqa – 7,9 mlrd teŋge, bılımge 101 mlrd teŋgeden astam qarjy bölınbek.
Elordanyŋ qoǧamdyq keŋesınıŋ otyrysynda mūny mälımdegen qalalyq Ekonomika jäne biudjettık josparlau basqarmasynyŋ basşysy Qaisar Manqaraev bas şahardyŋ 2022-2024 jyldarǧa arnalǧan biudjetı jobasymen tanystyrdy.
Baiandamaşy biylǧy 10 aidaǧy elordanyŋ äleumettık-ekonomikalyq damu qorytyndylarymen tanystyra otyryp, taiau jyldary biudjettık saiasattyŋ basymdyqtary investisiialyq jobalardy qarjylandyruǧa jäne azamattardy äleumettık qoldauǧa, barlyq äleumettık kepıldıkter men halyq aldyndaǧy mındettemelerdı saqtauǧa negızdelgenın atap öttı.
Äleumettık tūraqtylyqty qamtamasyz etu üşın jalaqy boiynşa bereşektı öteu jäne qyzmetkerlerdıŋ bosatyluyna jol bermeu, azamattardyŋ jekelegen sanattaryna äleumettık kömek körsetu jäne qoldau körsetudıŋ ataulylyǧyn qamtamasyz etu jäne tiımdılıgın arttyru, halyqty jūmyspen qamtu ortalyqtaryna ötınış bergenderdıŋ ışınen erekşe qajettılıkterı bar adamdardy jūmysqa ornalastyru boiynşa jūmys 85 paiyzǧa deiın jalǧasady.
Tūtastai alǧanda, ekonomikanyŋ damuyna №1 industrialdyq parktıŋ jobalaryn jäne ūlttyq jobalardy ıske asyru arqyly qaita öŋdeu jäne servis salalarynda qabyldanatyn şaralar yqpal etetın bolady. 2026 jylǧa deiın industrialdyq park aumaǧynda 900-ge juyq jūmys ornyn qūryp, 12 jaŋa investisiialyq jobany ıske asyru josparlanǧan.
– 2022 jylǧy qala biudjetı jobasy boiynşa şyǧystar 391 milliard teŋgenı qūraidy. 2023 jyly būl somany 416 milliard teŋgege ūlǧaitu josparlanyp otyr. Al 2024 jyly şyǧystar 401 milliard teŋgenı qūraidy. Būǧan qosa, qalanyŋ damuyna respublika biudjetınen 100,5 milliard teŋge somasyna maqsatty transfertter qarastyrylǧan. Sonyŋ ışınde 2022 jyly – 89 milliard teŋge, 2023 jyly – 10 milliard teŋge, – dedı Q.Maŋqaraev.
