Jaqynda asqaraly alpys jasqa tolǧan Nūrlan Önerbaevty jūrt akter, änşı retınde jaqsy bıledı. Janǧa jaǧymdy qoŋyr dauysymen talai jürektı jaulaǧan öner iesınıŋ qazaq ruhaniiatynda alar özındık ülken orny bar. Biyl ǧasyrlyq mereitoiyn atap ötken Qazaq radiosynda aiqyn qoltaŋbasy qaldy. Kezınde IV şaqyrylymdaǧy Parlament Mäjılısınıŋ deputaty retınde mädeniet salasyna qatysty özektı mäselelerdı köterdı. Nūrlan Ältaiūly – örelı önerpaz ǧana emes, önerdıŋ şyn janaşyry. Juyrda ony mereitoiymen qūttyqtap, äŋgımelesıp qaittyq. Sol äŋgımenı oqyrmandarymyzǧa ūsynamyz.
«ŞALQAR» RADİOSY ÄUE TOLQYNYNA QALAI ORALDY?
– Nūrlan aǧa, öner jolyŋyz teatrdan bastaldy. Qara şaŋyraq – Mūhtar Äuezov atyndaǧy teatr janyndaǧy akterler studiiasyn bıtırdıŋız. Sonda kımderden sabaq aldyŋyz, sızdıŋ ūstazdaryŋyz kımder?
– Menıŋ negızgı ūstazym – Qazaqstannyŋ halyq ärtısı Säbit Orazbaev. Qazır būl kısı – teatrdyŋ abyz aqsaqaly, Äuezov teatrynyŋ eŋ ülkenı de Säbit aǧamyz. Ekınşı ūstazym – Orazhan Kenebaev. Ol da sol teatrdyŋ akterı. Osy adamdardan oqyp, därıs aldym. Oqu bıtırgennen keiın sol teatrda qyzmetke qaldym.
– Sol kezde Änuar Moldabekov pen Änuar Boranbaev siiaqty sahna saŋlaqtarymen aralasyp, teatrda bırge oinaǧan şyǧarsyz…
– İä, bız oquǧa tüsken jyly Änuar Moldabekov Şekspirdıŋ «Üşınşı Richard» degen pesasy boiynşa qoiylǧan spektaklde basty röldı somdady. Būryn aǧamyzdy kinodan Şegenıŋ obrazynda körıp jürsek, sahnadaǧy keiıpkerdı somdauyna bırınşı ret kuä bolyp, taŋ-tamaşa boldyq.
Änuar Boranbaevpen de bırge jūmys jasadyq. Ol kısı öte talantty, naǧyz dramanynyŋ akterı bolatyn. Bıraq soǧan qaramastan kinoǧa öte köp tüstı. Boranbaevty el-jūrt kino arqyly da jaqsy bıledı. Onyŋ kino keiıpkerlerı öte keremet şyǧatyn.
Jalpy Äuezov teatrynda osyndai daryndy akterler köp boldy. Men 1978 jyly teatrdyŋ tabaldyryǧyn attadym. 1991 jyly radioǧa diktor bolyp auysyp ketkenge deiın osy teatrdyŋ otymen kırıp, külımen şyqtym. Tek akter ǧana bolǧan joqpyn, bas rejisser Äzırbaijan Mämbetovtıŋ kömekşısı, truppa jetekşısı boldym. Jauapty jūmystardy jasai jürıp, bıraz spektaklde röl oinadym. Teatrda jürıp än aita bastadym. Muzykalyq qoiylymdarda keiıpkerlerdı somdadym. Keiın änşılık menı tarta bastady. Än aityp, änşı retınde elge tanyldym. Keiın änşılık jaǧyna bırjola auysuǧa tura keldı.
– Jaqynda alpys jasqa toluyŋyzǧa bailanysty sız turaly Facebook-te bıraz post jazyldy. Sonda radioǧa kelgenıŋızde jabylyp qalǧan «Şalqar» radiosyn qaita aşqanyŋyz jaiynda oqyp qaldym. Būl qalai jüzege asty? Sony özıŋız aityp berıŋızşı.
– Būl jerde jalǧyz menıŋ ǧana emes, köp azamattyŋ eŋbegı bar. Būǧan teleradiokorporasiia basşylyǧyna kelgen azamattar ülken üles qosty. Ǧalym Dosken, Tūrsynjan Şapai, Slambek Täuekel, Esetjan Qosybaev syndy tūlǧalardyŋ tıkelei eŋbegınıŋ jemısı. Menı korporasiia töraǧasynyŋ orynbasary jäne radionyŋ bas direktory etıp taǧaiyndady. Sonda aldymyzdan şyqqan ülken bır kürdelı mäsele – «Şalqar» radiosy.
Radionyŋ baiyrǧy tyŋdarmandary äue tolqynyna qaitadan şyǧaru turaly bızge hat jaza bastady. Sebepsız, qarajattyŋ tapşylyǧynan jabylyp qalǧan radio ǧoi. Bız qarajatty syrttan nemese Ükımetten sūramai, ışkı qarajatymyzdy ünemdep, FM tolqynynda «Şalqar» radiosyn 13 oblysqa taratuǧa mümkındık jasadyq. Korporasiia töraǧasynyŋ orynbasary retınde de menıŋ mındetım öŋırlerdegı filialdarǧa bas-köz bolu bolatyn. Oblystardy aralap jürıp, radionyŋ jandanuyn özım qadaǧaladym. Basşylyqtyŋ tıkelei tabandylyǧynyŋ arqasynda ana tılımızde söiletın «Şalqar» radiosy 100 paiyz äue tolqynyna qaita oraldy.
QAZIR DİKTORLAR JOQ, BÄRI – JÜRGIZUŞI
– Radioda körkemdık keŋespen de köp jūmys ıstegen ekensızder. Qazır būl keŋestı jandandyru turaly jiı aitylady. Osy künderı efirden berıletın estradalyq änderge köŋılıŋız tola ma?
– Radioǧa qyzmetke kelgende būl da aldymyzdan şyqqan ülken mäsele bolatyn. 1991-1996 jyldary diktor bolyp jūmys jasadym. Radioda ekı ülken orkestr boldy: estradalyq-simfoniialyq orkestr men kameralyq orkestr. Radionyŋ ştatynda İlia Jaqanov, Äset Beiseuov, Keŋes Düisekeev, Eskendır Hasanǧaliev sekıldı körnektı kompozitorlar, Nūrǧali Nüsıpjanov syndy ülken änşıler boldy. Osylardyŋ bärı radionyŋ qyzmetkerlerı bolatyn. Eger elımızdıŋ bır qiyr şetınde jaqsy än şyqty dese, sol än aldymen radionyŋ qorjynyna kelıp tüsetın. Körkemdık keŋes ony tyŋdap, talqyǧa salatyn. Sodan ötken än orkestrge tüsırılıp, jazylatyn. Mūny radionyŋ ştatyndaǧy änşıler oryndaityn. Söitıp qanşama süzgıden ötıp baryp, radiotolqyn, televidenie arqyly elge taraityn.
Qazır endı ondai emes qoi. Kez kelgen adam änın alyp kelıp, efirden ötkıze beredı. Bız radioǧa kelgende körkemdık keŋeske Nūrǧali Nüsıpjanovty töraǧa etıp sailadyq. Sol kezde Roza Baǧlanovanyŋ közı tırı edı. Men «Eger Roza apamyz jaŋa än jazdyrypty dese, ol körkemdık keŋeste tyŋdalyp, sodan keiın ǧana efirge şyqsyn» degen talap qoidym. Mūndaǧy maqsat – änderdıŋ tazalyǧyn, sözderınıŋ maǧynasyn saqtau. Sebebı öŋırlerde ǧana oryndalatyn jäne respublikaǧa taraluy tiıs änder de bolady. Eldıŋ aldyna şyǧyp jatqan änşılerdıŋ tıl tazalyǧyna da öte mūqiiat qarau talaby qoiyldy. Öitkenı keibır jas änşılerdıŋ «ŋ», «ǧ», «q» ärıpterıne tılı kelmeitın. «Ä» ärpın aita almaityn änşıler de boldy.
– Änşılerdıŋ tıl tazalyǧy jaily aityp jatyrsyz. Qazır diktorlardyŋ, tele jäne radio jurnalisterınıŋ tılı köp synalady. Jaŋalyqty jetkızu mänerlerı dūrys emes. Özıŋız diktor boldyŋyz. Keiınnen änşılerdıŋ arasynda habar jürgızetınder qaptap kettı. Osyǧan közqarasyŋyz qandai?
– Menıŋ közqarasym qandai boluy mümkın? Men alty jyl Qazaq radiosynda diktor bolyp jūmys jasaǧan adammyn. Onyŋ aldynda teatrda jürgenımde on jylymdy «Qazaqfilm» kinostudiiasyndaǧy dubliajǧa arnadym. Sol kezde dubliaj ülken seh edı. Qanşama redaktorlar, qanşama ukladchikter jūmys ısteitın. Ekrannyŋ aldynda rejisser men akterdıŋ dybystau jūmystarynan būryn köp daiyndyq jürgızıletın. Men osyndai ülken täjıribeden ötıp, radioǧa diktor bolyp keldım. Diktorlyq – öz aldyna ülken mektep. Bızdıŋ kezımızde jurnalist nemese redaktor bır söilem jazsa da, ony diktor oqityn. Jurnalisttı de, redaktordy da efirge jıbermeitın. Öitkenı mätındı mänerlep oqyp beretın arnaiy diktorlar boldy. Qazır endı zaman basqa, diktorlar joq, bärı – jürgızuşı. Jurnalist te, änşı de, ärtıs te efirge şyǧa beredı. Al odan būryn sapaly jūmys jürgızıldı me, baǧdarlamany jürgızetın adamnyŋ tılı, diksiiasy dūrys pa, söilemdı jetkızerde dauysynyŋ yrǧaǧy, tembrı qalai – oǧan qarap jatqan eşkım joq. Ysyldap ta, qyryldap ta jürgıze beredı.
OTANDYQ ÖNER MEN ÖZIMIZDIŊ ÖNERPAZDARDY QOLDAU JETISPEIDI
– Bızde «Mädeniet turaly» zaŋ bar. Osy zaŋǧa köŋılıŋız tola ma?
– Parlamentte üş jyl jūmys ıstedım ǧoi. Onda zaman talabyna sai zaŋdarǧa özgerıs engızılıp tūrady. Bızdıŋ tūsymyzda «Mädeniet turaly» zaŋǧa özgerıster engızıldı. Özım bırneşe ūsynys engızdım. Bır-ekı ūsynysym öttı, köp ūsynysym ötpei qaldy. Keiıngı şaqyrylym deputattary da osy zaŋǧa qaiyrylyp, tüzetu engızgenın estıdım. Bıraq älı künge deiın özım ūsynǧan baptar boiynşa zaŋ tiıstı jūmysyn atqaryp jatqan joq. Mysalǧa, otandyq önerpazdar men otandyq önerdı qoldau. Būl özı bırneşe tarmaqqa bölınedı. Qandai qoldau, qalai qoldau körsetu kerek, qandai jeŋıldıkter körsetıluı kerek? Osynyŋ bärı eskerılgen jön. Mysaly, kommersiialyq maqsatta şetelden keletın ärtıster men otandyq önerdı nasihattap jürgender arasynda konsert ūiymdastyrudaǧy aiyrmaşylyqtar qandai boluy kerek? Qazır barlyq konsert qoiylatyn ǧimarattar, ülken sarailar bärı jaldau qūnyn alady. Mıne, şetelden keletın änşıler de, otandyq önerpazdar da bır baǧany töleidı. Osy jerde aiyrmaşylyq boluy kerek. Şeteldık änşılerdıŋ biletınıŋ baǧasy qandai, bızdıŋ önerpazdardyŋ öner keşterınıŋ baǧasy qandai – ǧimaratty jaldau qūny osyǧan säikes qoiyluy kerek. Osyǧan bailanysty ūsynystarymdy aitqanmyn, bıraq olar ötpei qaldy. Būl tarapta älı künge deiın otandyq önerge, özımızdıŋ önerpazdarymyzǧa memleket tarapynan qoldau körıp otyrǧan joqpyn. Mūny zaŋmen retteu qajet.
– Jaqynda bilet baǧasyna qatysty äleumettık jelıde bıraz pıkırtalas tuyndady. Türkıstan muzykalyq-drama teatry «Börte» spektaklın elordaǧa äkelıp körsettı. Sonda bilet baǧasy 25 myŋ teŋgeden qoiyldy. Bıraq būl VIP-orynnyŋ baǧasy bolyp şyqty. Būl baǧa, bälkım, sız aityp otyrǧan ǧimaratty jaldau qūnynan tuǧan şyǧar?
– Öner adamy bolǧannan keiın keşterdı ūiymdastyruǧa da köp atsalystym. Bıraz keştı basqardym, jürgızdım. Qazaqtyŋ otbasylyq merekelerı de bolady, kezınde olardy da ūiymdastyrdym. Sol keşterge otandyq änşılerdı qatystyrǧan kezde ūiymdastyruşylardan syrttan bıreulerdı şaqyryp jatyrsyzdar ma dep sūraitynmyn. Eger, mysalǧa, Galkin nemese Kirkorov sekıldı şetelden keletın änşı-ärtıster şaqyrylǧan bolsa, qazaqstandyq önerpazdarynyŋ baǧasyn solarmen bırdei bolmasa da, jeteqabyl qoiuǧa tyrysatynmyn.
Osydan mynandai mäsele tuyndaidy: eger bızdıŋ körermen önerge şyn janaşyr bolsa, şetelden keletınderge aqşasyn aiamaidy. Al özımızdıŋ önerge kelgende qaltasy nege tarylyp qaluy kerek? Eger özımızdıŋ önerımızdı jūrttyŋ köŋılınen şyǧatyndai deŋgeide ūsyna alsaq, onyŋ baǧasy da soǧan säikes boluy kerek. Bilettı 25 myŋ teŋgeden emes, tıptı 50 myŋnan satsyn, önerdı baǧalaityn adam ony alady. Önerımızdıŋ baǧasyn osylai köteruımız kerek. Ony tömendetuge bolmaidy. Bız tegın konsert te qoiyp körgenbız. Tegın konsertke jūrt «ortaŋqol dünie şyǧar, erteŋ teledidardan köre salamyz ǧoi» dep oilap, kelmeidı.
– Byltyr fonogrammany qoldanu mäselesı Parlamentte qaraldy. Önersüier qauym da ännıŋ jandy dauysta oryndalǧanyn qalaidy. Osyǧan sızdıŋ közqarasyŋyz qandai? Özıŋız konsertterde jandy dauysta aitasyz ba?
– Ärine, jandy dauysta. Osy mäselenı köterıp, talqyǧa salyp jürgender bır närsenı eskermeidı. Sahnada ötetın ülken keşter, ülken konsertter bolady. Osy jerde şyn önerpaz özınıŋ önerın elge şynaiy, adal tūrǧydan ūsynuy kerek. Būl talqyǧa salatyn mäsele emes. Al korporativtık merekelerde jūrt dastarqannyŋ basynda otyrǧanda nege janymdy saluym kerek? Ondai jerlerde änşıler fonogrammany paidalanatyny ras. Qalai bolǧanda da būl özınıŋ dauysy ǧoi.
– «Daryn» memlekettık jastar syilyǧynyŋ laureaty, Qazaqstannyŋ eŋbek sıŋırgen ärtısı, eŋbek sıŋırgen qairatker sekıldı bır basyŋyzda ataq jetedı. Bıraq bızde Halyq ärtısı degen ataqty alyp tastady. Özbekstan, Başqūrtstan, Tatarstan, basqa da körşıles memleketterde osy ataq saqtaldy. Elımızde nege Halyq ärtısı ataǧyn qaitadan jaŋǧyrtpasqa? Öitkenı qazır jurnalist te, basqa da mamandyq ielerı eŋbek sıŋırgen qairatker bolyp jür. Ärtıstıŋ aty – ärtıs qoi…
– Būl mäselenı Parlamentte otyrǧanda kötergenbız. Kım, qalai, nege būl ataqty joiyp jıbergenı tüsınıksız. Kezınde qazaq teatrynyŋ ırgesın qalaǧan aqsaqaldarymyzdyŋ bırı Elubai Ömırzaqovqa Halyq ärtısı ataǧyn berdı. Al qūrdasy, jan dosy Seifolla Telǧaraevqa eŋbek sıŋırgen ärtıs ataǧy berıldı. Sonda Elubai aqsaqal «Nege maǧan Halyq ärtısın berdıŋızder? Eŋbek sıŋırgen ärtıs ataǧyn nege bermedıŋızder? Sonda menıŋ eŋbegım sıŋbep pe? Halyq ärtısı degen ne ataq?» dep jata qalyp aşulanǧan. Qazır Halyq ärtısı nemese eŋbek sıŋırgen ärtıs ataǧy adamǧa qarjylai, materialdyq jaǧynan eşqandai üsteme bermeidı. Onyŋ jeŋıldıkterı joq. Būl sonşama jyl ter tögıp, eŋbek etken ärtıstıŋ bır baǧasy, deŋgeiınıŋ ölşemı ǧana. Kım sonşama soǧan ıştarlyq jasaǧanyn bılmeimın. Halyq ärtısı ataǧyn qaitarsaq dūrys bolar edı dep oilaimyn.
QŪRMET SÖZINIŊ QADIRI KETTI
– Qazır neşe türlı ataq qaptap kettı ǧoi. Keibıreuler «Qazaqstannyŋ qūrmettı azamaty» degen ataqty alyp jatyr. Qyzyq, ne külerıŋdı, ne jylaryŋdy bılmeisıŋ. Özım būl satyp alynatyn ataq şyǧar dep oilaimyn…
– Būl – maǧan da tüsınıksız ataq. Bırden «Basqalardyŋ qūrmetı joq pa eken?» degen sūraq tuyndaidy. Jalpy keiıngı kezde qūrmet sözın oŋdy-soldy paidalana beretın boldyq. Sonyŋ qadırın ketırıp alǧandaimyz. Kımnıŋ şyn mänınde qūrmettı, kımnıŋ qūrmetke laiyq, laiyq emesın ajyrata almaityn jaǧdaiǧa jettık. Toqsanynşy jyldardyŋ basynda qardan keiıngı bäişeşek siiaqty akademiialar qaptady. Myna akademiianyŋ akademigı, ana akademiianyŋ akademigı tolyp kettı. «Qazaqstannyŋ qūrmettı azamaty» ataǧy da bır nauqandyq şarua şyǧar.
– Parlamentte üş jyl deputat bolyp otyrdyŋyz. Ol jerge qandai maqsatpen bardyŋyz? Ūsynystaryŋyz qanşa paiyz oryndaldy dep oilaisyz?
– Barǧandaǧy maqsatymnyŋ, ūsynystarymnyŋ oryndaluyn 50 paiyzǧa da jetkıze almaimyn. Men onda önerdıŋ ortasynan bardym. Onyŋ aldynda Almaty qalasynyŋ Mädeniet basqarmasyn basqardym. Azǧantai uaqyt Ahmet Jūbanov atyndaǧy muzyka mektebıne basşylyq ettım. Önerdıŋ ortasynan Parlamentke barǧandyqtan osy saladaǧy olqylyqtardy köteremın degen maqsat qoidym. Bıraq olai bolmai şyqty. Köp ūsynysym orta joldan qaiyryldy. Elenbei de qalǧan mäseleler boldy. Mädenietke, tılge, ruhaniiatqa qatysty köp mäselenı köterdık.
– Ahmet Jūbanov atyndaǧy muzyka mektebın basqardym dedıŋız ǧoi. Osy mekteptıŋ jūmysynda da qiynşylyqtar bolǧan eken. Sony şeşıp berıpsız. Būl ne mäsele edı?
– Osy mektepke kelgenımde būl mekeme ūjymnyŋ ışındegı kikıljıŋderge, basşylyqtyŋ auysa beruıne bailanysty respublikalyq statustan aiyrylyp qalǧan edı. Men sol mektepten bırden Parlamentke keldım. Kelgen boida bırınşı kötergen mäselem – sol mekteptıŋ statusyn qaitaru. Uäjımdı däleldedım. Araǧa bır jyl uaqyt salyp, mekteptıŋ respublikalyq statusy qaitaryldy.
«ASAN QAIǦY» ROK OPERASY NEGE TOQTAP QALDY?
– Baiqaimyn, byltyr elordada aşylǧan, talantty rejisser Ashat Maemirov jetekşılık etetın Muzykalyq jas körermen teatryna köp qoldau körsetesız. Öner oşaǧynyŋ qoiylymdaryn körıp jüremız, aiaq alysy jaman emes. Teatrǧa oralǧyŋyz kelmei me? Jalpy belgılı bır beinenı somdasam degen armanyŋyz joq pa?
– Jalǧyz būl teatrǧa ǧana emes, astanadaǧy «Jastar» teatryna da baryp, jastarmen kezdesıp tūramyn. Mümkın Muzykalyq jas körermen teatryna jiırek baratyn şyǧarmyn. Maǧan jastardyŋ oiyny ūnaidy. Jastar öte talantty. Teatrda özım jūmys ıstegende keŋes däuırı bolatyn. Bız qatysqan spektaklderdıŋ köbı sol kezdegı ideologiiaǧa jauap beretın. Özımız jastyq jalynymyzdy, boiymyzdaǧy qabıletımızdı berıp, aŋsaǧan armanymyzǧa jete almai, kökeiımızdegı obrazdardy somdai almadyq. Al qazırgı jastarǧa qyzyǧamyn. Olarda arman joq. Qabıletterın aşatyn jaqsy qoiylymdar bar. Repertuar saiasatyn teatr özı şeşedı. Būrynǧydai joǧarydan taqyryptar tüspeidı. Sondyqtan jastar sahnada erkın. Özderınıŋ oiyn aşyq aitady. Menı osy qyzyqtyrady. Sol sebepten teatrǧa baryp, spektakl köremın. Aqyl-keŋesımdı, ūsynystarymdy aitamyn. Täjıribemmen bölısemın. Al sahnada röl somdau turaly ūsynystar tüsıp jatady. Sonda bügıngı jasymda jastarǧa ılese alamyn ba degen oi keledı. Sondyqtan būl älı de menı oilandyratyn närse.
– Jalpy qazırgı teatrlardyŋ deŋgeiıne köŋılıŋız tola ma? Öitkenı ūlttyq dramaturgiia joqtyŋ qasy, audarma spektaklder köp dep synap jatamyz.
– Teatr synşysy emespın. Barlyq teatrdy körıp jürmın, anany mynamen salystyramyn dep aita almaimyn. Pıkır aitu üşın bärın üzbei qadaǧalap, salystyrmaly türde aitu kerek. Al audarma qoiyluy kerek. Älemnıŋ ozyq dramaturgiiasyndaǧy moiyndalǧan pesalar bar. Nege jastarymyz ony oinamasqa? Gamlettı aŋsamaityn, armandamaityn akter joq. Sondyqtan älemdık şedevr bolsa, audarma boluy kerek.
– Äset Beiseuovpen jaqsy aralasqanyŋyzdy bılemın. Bır konsertte onyŋ «Kögıldır köktem» degen änın än jinaǧyna bes jüz bırınşı än retınde qosqanyŋyzdy aitqansyz. Körnektı kompozitordyŋ librettosyn Aitjan Baiǧojaev jazǧan «Batyr Bauyrjan» atty operasy bar eken. Būl turaly Marat Iliiasovtan estıdım. Sol operanyŋ jazylǧanyna qyryq jylǧa juyqtasa da, älı künge deiın şyqpai jatyr. Osy mäselenı gazetke jazdyq. Taǧy qozǧau kerek siiaqty.
– Men üşın būl – jaŋalyq. Özıŋnen bırınşı ret estıp otyrmyn. Radioda diktor bolǧanymda Äset aǧa sonyŋ qyzmetkerı boldy. Kompozitordyŋ qolynan bırneşe än aldym. Äset aǧanyŋ qorjynyn aqtarsa, älı talai dünie şyǧatyn şyǧar dep oilaimyn. Al jalpy osy opera siiaqty elge jetpei jatqan tuyndylar joq emes, bar. Mysaly, bıraz jyl būryn astanada «Asan qaiǧy» degen rok operany sahnaladyq. Muzykasyn Tölegen Mūhamedjanov pen Mūrat Qūsaiynov, librettosyn Qadyr Myrza Älı erterekte jazdy. Sodan qorjynda jatyp qalǧan. Bır künı astana äkımdıgı qarajat bölıp, Beibıtşılık jäne kelısım saraiynda qoidyq. Bar bolǧany bes-aq ret körsetıldı. Odan keiın qoldau bolmaǧan soŋ toqtap qaldy. Äitpese körermennıŋ yqylasy, yntasy keremet bolatyn.
– Şataspasam, taza şyǧarmaşylyq jaǧyna oiysqanyŋyzǧa on jyl bolyp qaldy. Osy jyldar ışınde ne ıstedıŋız? Qandai jaŋalyqtaryŋyz bar?
– Künı keşe ǧana alpys jas mereitoiyma orai elordada konsert ötkızdım. Onda repertuarymdaǧy tanymal, qanatty änderımdı jas buyn, qazırgı belgılı änşıler oryndady. Konserttıŋ sondai özgeşelıgı menıŋ tyŋdarmandarym üşın jaŋalyq boldy. Äzırge eŋ ülken jaŋalyǧym – osy.
– Sız oryndaityn köp ändı jūrt jaqsy köredı. Sonyŋ ışınde özım de barmyn. Bıraq bır änıŋızdı erekşe süisınıp tyŋdaimyn. «Taŋǧy tılek» änınıŋ tarihyn bılgım kelıp otyr. Būl än sızge qalai keldı? Şataspasam, osy tuyndynyŋ alǧaşqy oryndauşysy – özıŋız. Keiınnen Gülnūr Orazymbetova, Qainar Qatpai aityp jür…
– Jaqynda elordada ötken şyǧarmaşylyq keşımde būl ändı Qanat pen Sveta Aitbaevtar oryndady. Öte jarasymdy, ekeuıne qalyppen qūiǧandai qona kettı. Körermen jaqsy qabyldady. Būl – Temırälı Baqtygereevtıŋ änı. Alǧaşynda än sözderı basqaşa bolatyn. Bastapqy mätın maǧan ūnamady. Sosyn kompozitorǧa sözderın qaita jazdyrudy ūsyndym. Temırälı aǧa aqyn Däuıtälı Stambekovke qazırgı mätındı jazdyrdy. Öte ädemı, qazaqtyŋ tarihyndaǧy aŋyzǧa ainalǧan mahabattyŋ, adaldyqtyŋ, süiıspenşılıktıŋ, lirikanyŋ simvolyndai keiıpkerler – Tölegen men Jıbek, Eŋlık pen Kebek, Qozy men Baian obrazynan tamaşa tuyndy şyqty. Būl ändı üzbei otyz jyldan astam uaqyt aityp keldım. Al osy joly Qanat pen Sveta ädemı alyp şyqty.
