Bas qalada tozyǧy jetken üilerdıŋ ornyna «İlliuziia gülzary» men «Chemodan saiabaǧy» salyndy dep habarlaidy «Elorda aqparat».
Saryarqa audanynda salynǧan kreativtı gülzarlar Bırjan sal köşesı, №5 üi jäne Respublika daŋǧyly men Y.Dükenūly köşesınıŋ qiylysynda ornalasqan.
Astana qalasy Qorşaǧan ortany qorǧau jäne tabiǧatty paidalanu basqarmasy sürılgen üilerdıŋ aumaǧy tolyǧymen abattandyrylyp, jaryqtandyrylǧanyn mälım ettı. Mūnda balalarǧa arnalǧan oiyn alaŋqailary jäne sport alaŋdary paida boldy. Är gülzar özındık stilde bezendırılgen.
Respublika daŋǧyly men Y.Dükenūly köşesınıŋ qiylysynda ornalasqan şaǧyn saiabaq «İlliuziia gülzary» degen atauǧa ie. Mūnda skeitdrom, optikalyq illiuziiany jasau üşın qoldanylatyn qisyq formadaǧy eims bölmesı, syrǧanaq töbeşıgı jäne balalar alaŋy bar.
Al Bırjan sal köşesı, №5 üi mekenjaiynda ornalasqan gülzardyŋ «Chemodan saiabaǧy» dep ataluy tegın emes. Saiabaq temırjol vokzalyna jaqyn ornalasqan. Būl aumaqta chemodan formasynda jasalǧan kışı säulet formalary ornatylǧan. Joba avtory balalarǧa arnalǧan temırjol saludy josparlaǧan. Al qūrylysşylar avtordyŋ oiyn jüzege asyru üşın arnaiy temırden rels jasady.
Basqarmanyŋ tabiǧatty qorǧau jobalaryn basqaru bölımınıŋ basşysy Azamat Janataevtyŋ aituynşa, tūrǧyndar men qala qonaqtarynyŋ demalatyn oryndaryna ainalǧan jaŋa saiabaqtardyŋ ornynda būryn apattyq jaǧdaidaǧy ekı qabatty eskı üiler bolǧan.
Belgılı bolǧandai, biyl qyrküiek aiynda Saryarqa daŋǧyly, №27 üidıŋ maŋynda tastarmen kömkerılgen gülzardyŋ qūrylysy aiaqtalady. Baqtyŋ aumaǧy – 2304 şarşy metr. Būl aimaq demalysqa arnalǧan üş alaŋǧa bölınedı. Bır jaǧynda türlı sporttyq jabdyqtary bar sport alaŋy, al ortasynda alyp tastar bolady. Kelesı bölıgınde tamaqtanu men sauda pavilondary aşylady dep josparlanǧan.
