– Qazaqstan täuelsızdık alyp, naryqtyq qatynastarǧa köşkennen keiıngı mezgıl – qiynşylyqtan el eŋsesın endı tıktep, alǧa ūmtylyp jatqan şaq. Şyndyǧynda, sol bır jyldar tüiını tarqatylmaǧan kürdelı kezeŋ edı.
Elbasy astanany Aqmolaǧa beker köşırgen joq. Onyŋ türlı sebepterı bar. Aqmola – toǧyz joldyŋ torabynda, elımızdıŋ geografiialyq ortalyǧynda ornalasqan şahar. Ärine, oǧan geosaiasi, demografiialyq jäne etnomädeni jaǧdailardyŋ äserı de tidı dep oilaimyn. Sondai qym-quyt şaqta, türlı qiyndyq pen kedergıge qaramastan, ūtymdy şeşımderdı tauyp, astanany auystyru öte batyl şeşım boldy. Qūlagerdı tanyǧan Küreŋbai synşydai keleşektı köre bılgen köregendılıkpen jüzege asqan igılıktı ıs.
Basqasyn bylai qoiǧanda, memleketımızde sauyryna qamşy saldyrmaityn tūlpar uaqytpen sanasqan zamanaui körkem qala salyndy. Ol eldıŋ saiasi, mädeni, ruhani ortalyǧy ǧana emes, el ekonomikasyn alǧa süiregen lokomotivke ainaldy. Elbasynyŋ ūiǧarymymen äuelı Aqmola oblysynyŋ äkımı, odan keiın Ükımet basşysynyŋ orynbasary retınde osy qazaq elı tarihyndaǧy jūldyzdy joba – täuelsız Qazaqstan özı taŋdaǧan bas qalasynyŋ qūrylysyna azdy-köptı üles qosqanymdy taǧdyrymnyŋ eŋ bır maŋyzdy şeşuşı sätı dep oilaimyn. Esılıp aqqan Esıldıŋ jaǧasynda boi kötergen elordanyŋ az merzım arasynda qyran qūstai tülep, älem tanyǧan äsem şaharǧa ainalǧanyn közben körıp, köŋılımız süisınıp otyrady. Arqa tösınde aidai sūlu bolyp, boijetken astananyŋ bolaşaǧy jarqyn, odan ärı qūlaşyn keŋ jazyp damidy. Būǧan kämıl senemın. Täuelsızdıgımız mäŋgılık baiandy bolyp, el üşın qyzmet ıstep jürgen azamattardyŋ eŋbekterı jemıstı bola bersın!
Jänıbek KÄRIBJANOV,
memleket jäne qoǧam qairatkerı
