Astana qalasy äkımdıgınıŋ ūiymdastyruymen Memleket basşysynyŋ «Qazaqstandyqtardyŋ äl-auqatynyŋ ösuı: tabys pen tūrmys sapasyn arttyru» atty biylǧy Joldauyn tüsındıru maqsatynda respublikalyq aqparattyq top müşelerınıŋ oqu oryndary men eŋbek ūjymdarymen, ziialy qauym ökılderımen jäne qalalyq mäslihat deputattarymen kezdesuı öttı.
Jiynǧa Astana qalasy äkımınıŋ orynbasary Ermek Amanşaev, Ūlttyq ekonomika ministrınıŋ bırınşı orynbasary Ruslan Dälenov, Bılım jäne ǧylym vise-ministrı Ashat Aimaǧambetov, Qarjy ministrlıgınıŋ Işkı audit komitetınıŋ töraǧasy Azamat Ahmetov, Syrtqy ıster ministrlıgı Halyqaralyq aqparat komitetınıŋ töraǧasy Talǧat Jūmaǧūlov, Strategiialyq zertteuler instituty direktorynyŋ orynbasary Sanat Köşkımbaev, «Jaina, Astana» qoǧamdyq bırlestıgınıŋ töraǧasy Mūhtar Erketaev qatysty. Alǧaşqy bolyp söz alǧan Ermek Amanşaev Joldaudyŋ Astana qalasyna qandai özgerıster men jaŋalyqtar äkeletının atap öttı.
– Aldaǧy bes jylda 37 jaŋa mektep pen 10 qosalqy qūrylys aiaqtalatyn bolady. Sonyŋ ışınde 4 nysan osy jyldyŋ soŋyna deiın paidalanuǧa berıledı. Al keler jyldyŋ aiaǧyna deiın taǧy da 14 nysandy paidalanuǧa beru közdelıp otyr. Būl mektepter qazırgıdei 1200 oryndyq emes, 2500-3000 balaǧa arnalǧan, keŋeitılgen standarttarmen salynady. Osynyŋ nätijesınde üş auysymdy mektepter sany da barynşa azaiady. Astanada bırınşı ret bılım berudı jaŋalandyru ortalyǧynyŋ bazasy şeŋberınde memlekettık jäne jekemenşık balabaqşa tärbieşılerınıŋ bılıktılıgın arttyru, metodikalyq kömek körsetu jūmystary bastaldy. Būl jūmystarǧa qala biudjetınen 350 million teŋgeden artyq qarajat bölındı. Qazırdıŋ özınde 1500-den asa tärbieşı osyndai bılıktılıgın arttyru kurstarynan ötkızıldı. Al kadrlardy sapaly daiyndau maqsatynda biyl 13 joǧary oqu ornyna myŋnan asa grant bölındı, – degen ol medisinalyq kömek körsetu sapasyn arttyru maqsatynda jyl soŋyna deiın medisina salasynda tolyqtai qaǧazsyz jūmys ısteu ädısıne köşetının, keler jyly taǧy da 5 emhananyŋ salynatynyn atap öttı. – Būl emhanalar kezektı azaitady. Naqtyraq aitqanda, bır därıgerge qaralatyndardyŋ sanyn 1700-1800 adamǧa deiın qysqartady. Al bügıngı taŋda būl san 2200-dı qūrap otyr. Sonymen qatar, osy jyldyŋ aiaǧyna deiın taǧy da 48 uchaske aşu josparda bar. Sondai-aq jiyn barysynda käsıpkerlıktı damytu baǧytyndaǧy şaralar turaly da söz boldy.
