Astana IT universitetınde Halyqaralyq qaiyrymdylyq künıne orai ötken ıs-şarada el azamattary men jastar kezdestı. Is-şaranyŋ bır maŋyzy – Memleket basşysy Qasym-Jomart Toqaevtyŋ Joldauynda jastar saiasatyn damytuǧa baǧyttalǧan tūjyrymdar talqylandy.
1997 jyly 5 qyrküiekte ūzaq jyldyq dertten Tereza ana qaitys boldy. Onyŋ qaiyrymdylyq eŋbegın eskergen BŪŪ Bas assambleiasy 5 qyrküiektı atauly kün retınde belgıledı. Sodan berı volonterler jinalyp, qaiyrymdylyq qozǧalysyn damytu mäselesın talqylap, aldaǧy jūmystardy mejelep keledı.
Kezdesuge Senat deputaty Sūltanbek Mäkejanov, Nūr-Sūltan qalasy äkımınıŋ orynbasary Eset Baiken, qoǧam belsendılerı qatysyp, volonterlık qozǧalysty damytudyŋ maŋyzy turaly oiymen bölıstı. Eset Baiken qazaq qoǧamynda ejelden qalyptasqan «asar» dästürınıŋ jaŋǧyrǧan türı volonterlık qozǧalysty damytu – eldıktıŋ myzǧymas tūǧyry ekenın atady.
Rasynda qazaq qoǧamy myŋjyldyqtar köşınde nebır qiyn-qystau kezeŋderdı baǧyndyruda qaiyrymdylyq prinsipterıne negızdelgen asar ädısı şeşuşı röl atqardy. Qostanai oblysynda tılsız jau – ört jalmaǧan eldı meken tūrǧyndaryna qoldau körsetu maqsatynda jer-jerde arnaiy ştabtar qūrylyp, qaiyrymdylyq aksiiasy bastalyp kettı. Arys qalasyndaǧy jarylys, Maqtaaraldaǧy su tasqyny jäne t.b. tosyn jaǧdailar kezınde Ükımet pen jergılıktı bilıkten bölek, «jūmyla kötergen jük jeŋıl» degendı ūstanǧan el azamattary volonterlık qyzmet körsetıp, eldıŋ eŋse tıkteuıne üles qosty, – dedı äkım orynbasary.
Esterıŋızde bolsa, ekı jyl būryn Prezident Qasym-Jomart Toqaev «Birgemiz» atty respublikalyq Volonterler front-ofisın aşyp, erıktıler qozǧalysynyŋ damuyna memlekettık deŋgeide jaǧdai jasady.
Volonterlerdı daiyndau üderısı jäne olarmen jūmys ısteu täjıribesı turaly «Astana jastary» resurstyq ortalyǧy erıktıler qozǧalysyn damytu bölımınıŋ basşysy Elvira Esmūhanova:
– Qoǧamnyŋ ılgerıleuın volonterlık qozǧalystyŋ belsendılıgınen baiqauǧa bolady. Nūr-Sūltan qalasynda soŋǧy 10 jylda volonterlık qozǧalys qarqyndy damyp, ai saiyn 30-40 myŋ jastar volonterlık qozǧalysqa qatysady. Jalpy belsendı 5 myŋ volonter aptasyna 2-3 ıs-şaraǧa qatysady. Olardyŋ arasynda mekteptıŋ joǧary synyp oquşylary, kolledj jäne JOO studentterı bar, – dedı.
Volonter jastar eldegı ırgelı bastamalardy qoldap, halyqaralyq ıs-şaralardyŋ joǧary deŋgeide ötuıne üles qosady. Basqosu barysynda Älemdık jäne dästürlı dınder liderlerınıŋ sezı erıktı jastardyŋ qosatyn qomaqty ülesı turaly da söz boldy.
Nūrlat BAIGENJE
