QR Ūlttyq muzeiınde «Volonterlık bastamalardy qoldauǧa baǧyttalǧan» şaǧyn granttar konkursynyŋ jeŋımpazdaryn marapattau räsımı öttı.
«Erıktılerdıŋ bastamasyn qoldau maqsatynda granttar ūiymdastyrǧan bolatynbyz. Komissiia 200-den astam jobalardy qarap şyqty. Sondai erekşe bastamalardyŋ bırı – Lider.kz ūsynǧan joba. Volonterlık ūiym joǧalǧan adamdardy ızdeidı. Izdeu jūmystary üşın olarǧa dron, teplovizor, 3 km-ge deiıngı aralyqta oryn körsetetın rasiia siiaqty kömekşı qūraldar kerek. Osy sekıldı köp jaqsy jobalar keldı. Aldaǧy uaqytta volonterler özderınıŋ igı ısterın jüzege asyrady dep oilaimyz» deidı Nūr-Sūltan qalalyq Jastar saiasaty mäselelerı basqarmasynyŋ basşysy Däulet Kärıbek.
Baiqau nätijesınde üzdık dep tanylǧan 22 volonterlık ūiym 300 myŋ teŋge kölemınde qarjylai kömek aldy. Basqarma basşysynyŋ aituynşa, būl maqsatqa 6 mln teŋgeden astam qarjy bölıngen. Volonterlık ūiymdar alǧan qarjylyq kömektı öz jobalaryn odan ärı damytu üşın qajettı qūraldar men jabdyqtardy satyp aluǧa baǧyttauy tiıs.
