Jer betınde adam sany artqan saiyn adamgerşılık te azaiyp bara jatqandai. Indettıŋ şyrmauynan şyǧa almai, meiırım men mahabbatqa mūqtajdyq artqan tūsta janyŋdaǧyǧa jai ǧana ızet körsetudıŋ özı igı ıs sanaldy. Odan būryn bügıngı naryq zamanynda adami qasietter artta qalyp, peiılı tarylǧandardyŋ köbeigenın eşkım joqqa şyǧarmas. Bıraq aramyzda erıkkennen emes, öz erkımen qinalǧannyŋ qoltyǧynan demep, auyrtpalyǧyn bırge arqalaityn azamattar bar. Olar – eŋbegı eren erıktıler.
Ötken jyldyŋ mamyr aiynda Qostanaida ötken Qazaqstan-Resei jastarynyŋ forumynda «Ūlttyq erıktıler jelısı» ūiymynyŋ töraiymy Vera Kim 2020 jyldy Erıktıler jyly dep jariialaudy ūsyndy. Memleket basşysy Qasym-Jomart Toqaev qaiyrymdylyqtyŋ qadırın äspettep, osydan on ekı ai būryn Erıktıler jylyn jariialady. Būl on ekı ai oŋaiǧa soqpady.
Jyl basynan Arystaǧy jaǧdai, Maqtaaraldaǧy su tasqyny, pandemiiamen küreste volonterlerdıŋ eŋbegı orasan. Negızgı jūmys «Birgemiz» jalpyūlttyq jobasy şeŋberınde közdelgen 7 baǧyt – «Sabaqtastyq», «Saýlyq», «Taza álem», «Asyl mura», «Qamqor», «Umit», «Bilim» jobalary boiynşa jüzege asyryldy. 17 öŋırlık infraqūrylymnan tūratyn respublikalyq volonterler front-keŋsesı aşyldy.
Täjvirus beleŋ alyp, älemdı alaŋdatqan alasapyran şaqta erıktıler şahardaǧy blokbeketterde qalaǧa kelıp jatqan ärbır azamatqa saqtyq şaralaryn tüsındırıp, betperdeler taratty. Onsyz da jūmysy jeŋıl emes erıktılerge qauıp pen jauapkerşılık jügı artyldy. Sandardy söiletsek, pandemiiamen küreske 500 myŋnan asa erıktı atsalysqan eken. 63 myŋnan astam azyq-tülık jiyntyǧy, 4,4 million medisinalyq betperde taratyldy, 1 mln adamǧa kömek körsetılgen.
Bügıngı taŋda elımızde volonterlerdıŋ basyn bırıktırıp, qoǧam üşın tegın qyzmet etıp jatqan bırneşe ükımettık emes ūiym bar. Jyl basynda mūndai ūiym sany 224 bolsa, qazır resmi mälımet boiynşa 500-den asady. Halyqtyŋ qoǧamdyq jūmystarǧa erıktı türde aralasu belsendılıgı artyp keledı. Osy ūiymdarmen jūmys ısteitın volonterler 30 myŋnan 95 myŋǧa jetıp otyr. Jyl basynda josparlanǧan volonterlıkke 50 myŋ adamdy tartu boljamynan asyp tüsken. 1 jylda jalpyūlttyq jobalar aiasynda 7 baǧyt boiynşa 18 qoldau ortalyǧy, 6 myŋ daiyndyq ortalyǧy aşyldy. Osy uaqyt aralyǧynda 2 myŋnan asa şara öttı.
Sonymen qatar Qazvolunteer.kz onlain platformasy ıske qosyldy, onda 42603 volonter, 3063 ūiym jäne 977 joba tırkelgen. 5600-den astam volonter arnaiy oqudan ötıp, 50 bastamaşyl top qūryldy. Jalpy qūny 150 million teŋgenı qūraityn 500-den astam şaǧyn grant ülestırıldı. Pandemiiamen küreske qosqan ülesı üşın elımızdıŋ 5 myŋǧa juyq azamaty «Halyq alǧysy» arnaiy medalımen marapattaldy. «Jyl volonterı» halyqaralyq syilyǧy taǧaiyndaldy. 7 otandasymyz BŪŪ Erıktıler tobyna qosyluǧa mümkındık aldy. Olardyŋ 4-euı Türkiiada, bırı İordaniiada, qalǧan ekeuı Keniia jäne Tailand elderımen karantindık şekteuge bailanysty onlain formatta jūmys atqaruda.
Däl osy jyly elımızde qoǧamdyq baqylauşy jäne ekolovolonter degen terminder paida boldy. Belsendı jastar ekologiia baǧytynda bıraz ıstıŋ basyn qaiyrdy. Ekomädeniettı nasihattaityndardyŋ qatary köbeidı. Al respublika kölemınde 10 myŋ volonterdıŋ qatysuymen 75-ten asa ekoaksiia ūiymdastyrylypty.
Memleket basşysy Erıktıler jylynyŋ resmi jabyluynda barlyq bılım beru mekemelerınde erıktılıktı därıptep, qaiyrymdylyq turaly taqyryptyq sabaqtar men fakultativtık saǧattar engızudı ūsyndy. Aldaǧy uaqytta jaŋa volonterlık ūiymdar aiaqqa tūryp ketuı üşın jeŋıldetılgen nesie berıledı. Sondai-aq biznes ökılderı men jeke tūlǧalardy qaiyrymdylyq jobalarǧa tartu üşın memlekettık qoldau qarastyrylyp, igı ıspen ainalysatyn bırlestıkterge berıletın qarjylai kömek ūlǧaiady. Prezident pärmenımen «Qaiyrymdylyq turaly» arnaiy zaŋ äzırlenıp jatyr. Volonterlık ūiymdardyŋ zaŋdy märtebesı anyqtalyp, qaiyrymdylyq qyzmet zaŋmen retteledı. Erıktıler jyly aiaqtalǧanmen, qaiyrymdylyqqa toqtau joq.
Naima Nūralyqyzy
