Ūlttyq akademiialyq kıtaphanada Qazaqstannyŋ halyq jazuşysy, Memlekettık syilyqtyŋ laureaty Fariza Oŋǧarsynova turaly «Bılmeisıŋder, menı älı bılmeisıŋder» atty estelık kıtaptyŋ tanystyrylymy boldy. Ädebi şaraǧa elordadaǧy ziialy qauym men Atyrau men Maŋǧystaudan kelgen delegasiia ökılderı qatysty.
Būl jinaq «Fariza Oŋǧarsynova» atyndaǧy qaiyrymdylyq qordyŋ qoldauymen jaryq kördı. Kıtapty qūrastyrǧan – jurnalist Gülsım Orazalyqyzy. Aituly eŋbekke Äbdılda Täjıbaev, Äbış Kekılbaev, Serık Qirabaev sekıldı ädebiet alyptarynan bastap, ömırde ardaqty aqynmen jaqyn syilasqan, şyǧarmaşylyǧyn qadır tūtqan zamandastary men qalamdastarynyŋ estelıkterı toptasqan.
Basqosudy Mäjılıs deputaty, belgılı qalamger Sauytbek Abdrahmanov jürgızıp, arǧy-bergı däuırde ǧūmyr keşken jaqsylardan tartyp, solardyŋ önegelı jolyn jalǧaǧan asyl aqyn turaly aqtarylyp söiledı.
«Ötken ǧasyr ortasynda halyq «qaraǧaiǧa qarsy bıtken būtaqtai» tūlǧalardyŋ töŋıregınde toptasyp, solardy qūrmetteu arqyly öz mınezın körsetkısı keldı. Bilıkke iılmegen saiyn Baukeŋdı jūrt jaqsy kördı. Sol jyldarda osyndai fenemon qūbylysty äiel balasynan jasaǧan adam – Fariza Oŋǧarsynova. Bız Farizany qazaq ädebietınıŋ jaryq jūldyzy, jyrymyzdyŋ toptan ozǧan jüirıgı dep qana baǧalaimyz. Onyŋ fenomenın ūǧu üşın babalarymyzdyŋ qyz balany qonaq dep qadırleitın erekşe qasietın tüsınu qajet. Oŋǧarsynova arqyly qazaq qoǧamynda qyz bala qadırlırek bola tüstı. Äiel adamnyŋ abyroiy artty. Öitkenı Farizanyŋ yqpaly ädebiet pen mädeniettıŋ maŋaiynan asyp, qūbylysqa ainaldy» dep parasatty oi qozǧady. Odan keiın söz kezegı tigen belgılı qoǧam qairatkerlerı Ömırbek Baigeldı men Oralbai Äbdıkärımov talantty tūlǧanyŋ adami bolmysy jaiynda äserlı estelık aitty. Jaryq düniede aiauly kısımen jaqyn bauyry bolyp aralasqan, bügıngı Mäjılıs deputaty Baqtyqoja Izmūhambetov Fariza esımın dın jolyn berık ūstaǧan atasy qoiǧandyǧyn äŋgımeledı. Al belgılı qairatker Ravil Şyrdabaev: «Ol erekşe adam boldy. Qairatkerlık qyry da bölek. Täuelsızdık alǧannan keiın ekı äiel ǧana jazuşy halyq qalaulysy atandy. Sonyŋ bırı – Fariza. Bızdıŋ öŋırdıŋ tabiǧatyn onyŋ şyǧarmalarynan bıluge bolady. Mäselen, odan Kaspiidıŋ erke tolqynyn, Naryn qūmynyŋ gülın nemese jusan men adyraspannyŋ iısın sezınesız» dei kelıp, Atyrau oblysynyŋ äkımı bolyp tūrǧanda Jūmaken men Farizaǧa eŋselı eskertkış tūrǧyzǧan B.Izmūhambetovke rizaşylyǧyn bıldırdı.
Sondai-aq, şara barysynda Bırǧanym Äitımova, Orazkül Asanǧazy aqynnyŋ qairatkerlık qyrlaryna toqtaldy. Körnektı tūlǧa Qaratai Tūrysovtyŋ zaiyby Äskergül apa daryndy jannyŋ qaisar mınezın därıptedı. Halqymyzdyŋ taǧy bır qairatker qyzy Zäure Qadyrova onyŋ syrqattanyp jürgendegı soŋǧy sätterınen syr şerttı. Belgılı satirik Köpen Ämırbek Fariza apamyzben Türkımenstanǧa barǧan saparyndaǧy bır oqiǧany aityp, jinalǧandardy du küldırdı.
Qysqasy, oiymyzdy Sauytbek aǧanyŋ «būl kıtap tūtastai derlık adam Farizany aşuǧa arnalǧan» degen sözımen tüiındesek bolady.
