Keşe Astanada Nūrsūltan Nazarbaevtyŋ töraǧalyǧymen QR Prezidentı janyndaǧy Şeteldık investorlar keŋesınıŋ 26-plenarlyq mäjılısı öttı. Onda elımızdıŋ 2020 jylǧa deiıngı tehnologiialyq-innovasiialyq damuy talqylandy.
Elbasy investorlarmen bırlesken jūmystyŋ basym baǧyttaryna toqtala kele:
– Memlekettıŋ «jasyl» ekonomikaǧa köşuıne elordada ötkızıletın «EXPO-2017» halyqaralyq mamandandyrylǧan körmesı qozǧau salady. Sondyqtan bız älemdegı eŋ üzdık tehnologiialardy özımızge tartumen qatar, Qazaqstanda ne jasalǧanyn da körsete aluymyz kerek, – dedı.
Jūmysşy mamandardyŋ bılıktılıgınıŋ tömendıgı, öndırıstıŋ talabyna tatymaityndyǧy baiaǧydan aitylyp kele jatqan jäit. Ony Düniejüzılık banktıŋ zertteuı taǧy da naqtylai tüstı. Sondyqtan Elbasy memlekettık bılım beru mekemelerınıŋ bır bölıgın şeteldık investorlardyŋ konsorsiumy men otandyq kompaniialardyŋ senımdı basqaruyna berudı ūsyndy. Iаǧni, biznes-qauymdastyq oqu jospary men ädıstemesın qalyptastyruǧa qatysady, şetelden aldyŋǧy qatarly oqytuşylardy tartuǧa septıgın tigızedı, al memleket būl mekemelerge baiaǧysynşa bılım granttaryn böludı jalǧastyra beredı.
Sonymen qatar, Elbasy Ükımetke investorlarmen bırge auylşaruaşylyq salasyn zertteitın älemdık deŋgeidegı institut qūrudy tapsyrdy. Baza retınde Astanadaǧy Agrotehnikalyq universitettı ūsyndy. İnstitut bılım berumen qatar, ǧylymi-zertteu jūmystaryn atqaryp, täjıribelık şaruaşylyqtardy jürgızuı tiıs.
Ǧalymdardy yntalandyru üşın Äl-Farabi atyndaǧy memlekettık syilyq taǧaiyndaldy.
– Syilyq jyl saiyn serpındı ǧylymi zertteu men innovasiialyq jaŋalyq üşın jetı nominasiia boiynşa berıledı. Alǧaşqy kezde kölemı 100 myŋ dollar bolady, – dep mälımdedı Nūrsūltan Nazarbaev.
«Ǧylymǧa qamqorlyq jasaudan investorlar da syrt qalmauy tiıs» dei kelıp, Elbasy şeteldık kompaniialardy halyqaralyq maŋyzy bar jobalardy zertteu üşın venchurlyq innovasiialyq qordy qarjylandyruǧa şaqyrdy.
– Zaŋ boiynşa jer qoinauyndaǧy tabiǧi bailyqty igeruşıler jyldyq tabysynyŋ 1%-yn zertteulerge, täjıribelık-konstruktorlyq jūmystarǧa jūmsauy tiıs, – dedı ol, – Bıraq, ony barlyǧy bırdei oryndap jatqan joq. Sondyqtan osy qarjynyŋ basyn bırıktırıp, alǧaşqy kapitaly 200 mln dollar bolatyn venchurlyq qor qūru kerek.
Basqosuda aitylǧan taǧy bır jaŋa bastama «Üş jetılık» dep atalady. Eger Elbasy sözın tarata aitsaq, bırınşıden, Qazaqstanǧa aty älemge mäşhür 7 ǧalymdy tartu kerek, ekınşıden, 7 qazaqstandyq kompaniiany joǧary tehnologiialyq tapsyryspen qamtamasyz etuımız kerek, üşınşıden, 7 innovasiialyq startapty qoldauymyz kerek. Būl maqsatty jüzege asyru Şeteldık investorlar keŋesı men Ükımetke jükteldı.
Erkejan SÄTIMBEK
