Keşe Ortalyq kommunikasiialar qyzmetınıŋ brifingıne kelgen «Damu» käsıpkerlıktı damytu qory» basqarma töraiymy Läzzat İbragimova «Biznestıŋ jol kartasy – 2020» baǧdarlamasynyŋ üş jylǧy qorytyndysymen jäne 2014 jylǧy josparlarymen bölıstı.
Atalmyş baǧdarlama ıske qosylǧan 2010 jyly käsıpkerlermen 135 joba boiynşa subsidiia turaly şart jasalsa, üş jylda būl san toǧyz ese ösıp, 1271 jobaǧa jetken. Läzzat Erkenqyzynyŋ aituynşa, bastapqy jyly baǧdarlamaǧa otandyq käsıpkerlerdı tartu jūmysy jürgızılse, būdan keiıngı uaqyttarda baǧdarlama elımızdıŋ barlyq öŋırlerınde tolyqqandy jūmys ıstei bastaǧan.
2011 jyly käsıpkerlerge eŋ tiımdı tetık – subsidiialau bolsa, baǧdarlama 2012 jyly kepıldendıru tetıgımen tolyqty. Eŋ jemıstısı 2013 jyl boldy. Osy jyly memleketımızdıŋ barlyq oblys ortalyqtarynda Käsıpkerlerge qyzmet körsetu ortalyqtary aşylyp, «Bır tereze» qaǧidaty boiynşa tegın keŋester aluǧa qol jetkızdı. Sondai-aq, biyl «Biznes aumaǧy» atty bıryŋǧai memlekettık portal ıske qosyldy. Odan bölek mümkındıgı şekteulı azamattarǧa käsıpkerlıkpen ainalysuǧa järdem beretın «Damu-Kömek» baǧdarlamasy jüzege asyryla bastady. Arnauly www.damu-komek.kz saity arqyly kömekke mūqtaj mügedek jandarǧa ırı biznes qūrylymdaryndaǧy äleuettı demeuşıler qolūşyn sozdy. Sonyŋ arqasynda aǧymdaǧy jyldyŋ jeltoqsan aiyna kelgende saitqa 1254 ötınış tüsıp, olardyŋ 863-ı boiynşa järdem berıldı.
2010 jyldan berı jalpy qūny 22 mlrd teŋge 251 kelısımşartqa qol qoiylǧan
Memleket subsidiialau kölemın jyl saiyn ūlǧaituda
Kelesı jyldyŋ josparlaryna kelsek, Käsıpkerlıktı qoldau ortalyqtary elımızdıŋ barlyq audandarynda aşylmaq. Sonymen bırge subsidiialarǧa 32,4 mlrd teŋge bölınıp, subsidiialanatyn jobalardyŋ sany 1,5 myŋǧa jetuı tiıs. Odan bölek kepıldendıru tetıgımen qoldau körsetıletın käsıpkerlerdıŋ sanyn 500-ge jetkızu közdelude.
Amanǧali ŞMİTŪLY
