Elbasynyŋ biznes salasynda memlekettık organdardyŋ baqylauyn azaitu jäne tekserudı oŋtailandyru jönındegı tapsyrmasy käsıpkerlık salasynda bırqatar jeŋıldıkterdı alyp keldı. Būryn käsıbın aşqysy keletınder talai tabaldyryqty tozdyryp, äurege tüsse, endı üiınde otyryp-aq maqsatyna jete alady.
Elımızde jeke käsıbın aşqysy kelgen jeke tūlǧa käsıp aşu üşın Salyq komitetıne ötınışın ötkızıp, memlekettık tölemdı tölese jetkılıktı. Bır aptanyŋ ışınde patentke ie bolady. Būdan keiın bankten esepşotyn jäne käsıporyn mörın alady. Al jauapkerşılıgı şekteulı serıktestık bolsa, säl özgeşeleu, bıraq būl da qiyn emes. Olar aldymen Ädılet departamentıne, sosyn Salyq komitetıne barady. Eger qūjattary tügel bolsa, bırer aptanyŋ ışınde käsıpkerlıkke qol jetkızedı.
Biyl 9 qaŋtardan bastap, «Qazaqstan Respublikasynyŋ keibır zaŋnamalyq aktılerıne zaŋdy tūlǧalardy memlekettık tırkeu jäne filialdar men ökıldıkterdı eseptık tırkeu mäselelerı boiynşa özgerıster men tolyqtyrular engızu turaly» Zaŋy qabyldanyp, küşıne engenı belgılı. Osyǧan bailanysty bügınde är azamat üiınde otyryp-aq, biznesın 15 minuttyŋ ışınde aşa alady. Ol üşın elektrondyq ükımettıŋ portalyna kırıp, qajettı saualdarǧa jauap berıp, zaŋdy tūlǧa retınde tırkeledı. Tırkeu qorytyndysynda sūranys jıbergen azamat zaŋdy tūlǧa bolyp tırkelgenı jönındegı anyqtama alady.
Zaŋdy tūlǧany tırkeu üşın ötınış beru, oǧan elektrondyq sifrlyq qoltaŋba qoiu, atalǧan qyzmettı tölem şliuzı arqyly töleu – portaldaǧy «Zaŋdy tūlǧalar» memlekettık derekter qorynda jürgızıletının esterıŋızge salamyz.
Aǧymdaǧy jyldyŋ alǧaşqy toqsanynda 600-ge juyq şaǧyn käsıpkerlık subektısı osy portal arqyly tırkelıp, uaqyty men qarajatyn ünemdegen eken.
Ärine, bügınde käsıpkerlıktı aşu oŋai, bıraq, ony jabu qiiamettıŋ qiyny bolyp tūr. Sondyqtan tiıstı organdar būl mäselenı de jeŋıldetu üşın zaŋǧa özgerıster engızudı ūsynatynyn jetkızdı.
Qymbat NŪRǦALİ
