«Aqyldy Astana» jobasy qolǧa alynǧaly elordada «Open Wi-Fi», «Bolaşaqtyŋ mektebı» syndy tyŋ bastamalar qoldanysqa engızıldı. Endı «İntellektualdyq kölık jüiesı» men «Qauıpsız qala – Astananyŋ tırşılıgın qamtamasyz etetın keşendı jüie» atty ekı bırdei ırı joba qolǧa alynbaq.
Jalpy, europalyq «aqyldy» qalalardyŋ damu modelı «aqyldy ekonomika», «aqyldy ömır», «aqyldy mobildılık» syndy bas-aiaǧy 6 sipattamaǧa negızdelse, olardyŋ barlyǧy eŋ ozyq tehnologiiamen engızıluı basty nazarǧa alynady. Osy ürdıstı özıne ülgı etken astanalyq joba innovasiialyq bastamalardy keşendı türde jüzege asyrmaqşy. Äŋgımemızge arqau bolyp otyrǧan «İntellektualdyq kölık jüiesı» bırneşe kezeŋ boiynşa ıske asyrylady. Osy jobanyŋ alǧaşqy nätijesın elordalyqtar kelesı jyldyŋ basynan köre bastaidy. Ärı būl tūrǧyndarǧa naǧyz kerektı joba bolǧaly tūr.
Qazır qalanyŋ bır şetınen ekınşı şetıne jetu üşın avtobuspen uaqytymyzdy saǧattap şyǧyndap jatamyz. Tüskı jäne keşkı keptelısterde, tıptı, mejelı jerge jetudıŋ özı mūŋ. Uaqyt tapşylyǧynan amal joq, taksidıŋ qyzmetıne jügınıp jatamyz. Al eger joǧaryda atalǧan joba ıske asyrylsa, qalanyŋ bır jerınen ekınşısıne ortaşa eseppen, 20 minutta-aq jetetın bolamyz. Kölık keptelısınen «köz aşpai tūrǧan» qazırgı kezde būl ertegıdei körınuı mümkın. Bıraq, şyndyǧy solai. Astana qalalyq Jolauşylar kölıgı jäne avtomobil joldary basqarmasynyŋ mälımetıne süiensek, joba barysynda kölıktık aǧyndarǧa monitoring jürgızu, baǧdarşamdar jūmysyn basqaru, jolauşylar kölıgınıŋ jūmysyn baqylau oŋtailandyrylyp, tek qoǧamdyq kölıkterdıŋ jüruıne arnalǧan jeke jolaqtar belgılenedı. Sonyŋ arqasynda jeŋıl maşinalar sarylyp keptelıste tūrǧanda, avtobustar zyryldap, jolauşylardy dıttegen jerıne jyldam aparatyn bolady.
Joba şeŋberınde 500-ge juyq mekemenıŋ maŋaiynda barlyǧy 30 myŋǧa tarta beinebaqylau kamerasy ornatylady. Avtobustar da beinekameralarmen jabdyqtalady. Osylaişa är tūrǧynnyŋ jäne onyŋ ämiiany, qalta telefony sekıldı zattarynyŋ qauıpsızdıgı saqtalmaq.
Baǧdarşamdar da «aqyldy» bolady
«İntellektualdyq kölık jüiesı» jobasy şeŋberınde kelesı jyldan bastap, elordanyŋ köşelerı men qiylystarynda «aqyldy baǧdarşamdar» paida bolady.
Jolauşylar kölıgı jäne avtomobil joldary basqarmasynyŋ basşysy Raşid Amanjolovtyŋ taratqan mälımetıne sensek, kelesı jyldyŋ alǧaşqy toqsanynda Saryarqa, Tūran daŋǧyldary men Qonaev, Dostyq, Saraişyq, Syǧanaq köşelerınde 42 baǧdarşam ıske qosylady. Olar bır ortalyqtan basqarylyp, keptelısterdı azaituǧa septıgın tigızedı. Aldynda aityp ötkenımızdei, qalanyŋ bır şetınen ekınşı şetıne avtobuspen 20 minutta jetu baqytyna osy baǧdarşamdar ornatylǧannan bastap qol jetkızetın bolamyz. Sebebı, qondyrǧylar jeŋıl maşinalardyŋ emes, qoǧamdyq kölıkterdıŋ yŋǧaiyna qarai jūmys ısteidı de avtobustardyŋ kedergısız, toqtamai jüruıne jaǧdai jasaidy.
«İntellektualdyq kölık jüiesı» jobasy EKSPO halyqaralyq körmesı bastalǧanǧa deiın tolyq jüzege asyrylady. Osy kezde qalanyŋ ortalyq köşelerındegı 304 jol qiylysy, al 2017 jyldan keiın şaǧyn audandardaǧy 56 jol qiylysy «aqyldy baǧdarşamdarmen» jabdyqtalatyn bolady.
Qymbat TOQTAMŪRAT
