Keşe nan qaldyǧyn jinaityn kübıdegı nandy alyp, «kepter jesın» dep jolǧa şaşyp jatqan zamandasymdy körıp taŋǧaldym.
Soŋǧy kezderı nannan mal azyǧyn daiyndap, jem jasaityn azamattar qaladaǧy qoqys jäşıkterınıŋ qasyna arnauly nan qaldyǧyn jinaityn kübıler qoiǧan edı. Käsıpker Ruslan Ubeniiazovtyŋ aituynşa, qazırge deiın qalanyŋ 40 paiyz aumaǧyna 1500 konteiner qoiǧan. Bıraq qoqysty sūryptap tastau mädenietın qalyptastyrmaǧan qala tūrǧyndary nan jinaityn konteinerlerge basqa tūrmystyq qaldyqty salyp ketetının aityp nalyǧany bar edı.
Qazır tūrǧyn üi keşenderındegı qoqys jinaityn oryndardyŋ maŋynda qyp-qyzyl nan şaşylyp jatatyny ötırık emes. Sebebı tūrǧyndar «obal bolmasyn, odan da kepter jesın» dep nan qaldyǧyn qoqys konteinerınıŋ maŋyndaǧy adam baspaityn jerge qoiady. Bıraq qatqan nandy ärı şūqyp, berı şūqyp jei almaǧan qūstar soŋynda bükıl nandy şaşyp tynady da, qoqys jinau alaŋynyŋ maŋy qyp-qyzyl nan bop jatady. Nan jinaityn konteinerler qoiylǧaly būl jaǧdai özgeretın şyǧar dep ümıttenıp edık, özgergen tügı de joq, esesıne nan jinaityn konteinerge tastalǧan nandy kepterge şaşyp «meiırımdılık» tanytatyn jandar köbeidı.
Nannan mal azyǧyn daiyndau älemdık täjıribede bar bolǧanymen, būl sala bızdıŋ Qazaqstanda mülde eskerılmegen. Tūrǧyndardyŋ qoqysty sūryptap tastau mädenietı öte tömen bolǧandyqtan, qoqysqa tastalǧan nandy sūryptap alu da öte qiyn. Onyŋ üstıne elımızde nan qaldyǧyn öŋdeitın bırde-bır zauyt joq edı. Oǧan qosymşa qarajat ta qarastyrylmaǧan. Mıne, osy jaǧdaidy özgertıp, nan qaldyǧyn kerekke jaratu quana qoldau körsetetın bastama edı. Alaida tūrǧyndardyŋ köbı mūny tüsınbeitın sekıldı. Obal bolyp, aiaqtyŋ astynda jatqan nandy jinaǧannyŋ ornyna şaşyp, nan jinaityn konteinerge basqa tūrmys qaldyǧyn aparyp tastai salu mädenietsızdıkten basqa tük te emes. Nandy ysyrap qyluǧa, ony aiaqpen basuǧa asyl dınımızde de qataŋ şekteu qoiǧan. «Qalamyz taza boluy üşın qoqysty sūryptap şyǧaryŋyzdar» degen nasihattyŋ jürıp jatqanyna da az bolǧan joq. Bıraq sony eskerıp, tūrmystyq qaldyqty sūryptap, belgılengen konteinerlerge tastap jatqan tūrǧyndar da neken-saiaq. Osynyŋ özınen qala tūrǧyndarynyŋ mädeniet öresı baiqalyp tūrǧan joq pa?!
