Keşe Ortalyq kommunikasiialar qyzmetınıŋ alaŋyna kelgen «Astana EKSPO-2017» ūlttyq kompaniiasy basqarma töraǧasynyŋ keŋesşısı Qanaǧat Tılemısov Körme keşenınıŋ qūrylysy aldaǧy şılde aiynda bastalatynyn mälımdedı.
Onyŋ aituynşa, qazırgı taŋda qūrylysqa qajet qūjattar daiyndalyp, saraptamadan ötkızılude. «Qūrylystyŋ negızgı qūrylymdary ekı bölıkten tūrady. Bırınşısı – 25 gektar aumaqty alatyn körme ötetın alaŋ. Onyŋ jalpy audany 240-250 myŋ şarşy metr. Būnyŋ syrtynda 750 myŋdai şarşy metrge qosalqy qūrylymdar salynady. Mysaly, körme qatysuşylaryna tūrǧyzylatyn tūrǧyn üi, meimanhana özge de tūrmysqa qajet ǧimarattar» dedı ol.
Sonymen bırge Q. Tılemısov körmege qatysuşy elderdıŋ sany men atauy 2015 jyldyŋ ekınşı jartysynda belgılı bolatynyn, Halyqaralyq körmeler biurosynyŋ talaptaryna säikes är el 250 şarşy metrden 1000 şarşy metrge deiın aumaqqa tapsyrys bere alatynyn aitty.
Ekspo qalaşyǧynda körme qatysuşylaryna arnalǧan köp qabatty üilerdı investorlar salatynyn, äzırge 4 myŋ päterlık üilerdı salu josparlanǧanyn, körme keşenınıŋ qūrylysy 2016 jyldyŋ 31 jeltoqsanyna deiın aiaqtalu kerektıgın atap öttı.
Körme keşenı jobasyna arnalǧan konkursqa 20-dan astam elden 50-ge juyq kompaniia qatysqan. Onyŋ qorytyndysynda AQŞ-tyŋ Adrian Smith+Gordon Gill Architecture arhitekturalyq kompaniiasy jeŋıske jetken. Mūndai mälımettı Säulet departamentınıŋ direktory Qanat Mūqaşev keltırdı. Körmenıŋ simvoly diametrı – 80 metr, biıktıgı – 100 metr bolatyn sfera tektes qūrylys ekenın aitqan ol körmenıŋ jalpy audany 173,4 gektardy alatynyn jetkızdı.
Belgılı mesenat Sapar Ysqaqov taiauda älemnıŋ 27 memleketın aralap kelgen eken. 120 kündık saparynda ol Qazaqstandy jäne «Astana EKSPO-2017» körmesın nasihattap jürıptı. Brifingte sol saparlardan alǧan äserlermen bölısken ol EKSPO arqyly bızder kım ekenımızdı älemge tanytuymyz kerek» dedı. «Tılep Qobyz» saraiynda ornalasqan, 29 qazaq ūlttyq aspaptarynda oinaityn ansambl de körme kezınde elımızdıŋ önerın tanytuǧa atsalysatynyn aityp, kompaniia ökılderıne şetel azamattarynyŋ qoly qoiylǧan EKSPO jalauyn tabys ettı.
Amanǧali QALJANOV
