Keşendı jospar qabyldandy
Elorda äkımdıgınde kezektı äkım apparat jiyny öttı. Onda qala basşysynyŋ orynbasarlary özderınıŋ jauapty salalary boiynşa qysqaşa şolu jasady.
Aldymen şahar äkımınıŋ bırınşı orynbasary Sergei Horoşun qaladaǧy Tūrǧyn üi qūrylysyndaǧy üleskerlerdıŋ mäselelerı boiynşa söz aldy.
« Ötken aptada osy mäselege bailanysty otyrysta 24 nysan qaraldy. Sondyqtan «Nūrly jer» baǧdarlamasy aiasynda jūmys jürgızu mehanizmderın tūrǧyn üi qūrylys kooperativterımen bırlesıp qolǧa aldyq» dedı S.Horoşun.
Odan keiın Qosman Aitmūhametov qalanyŋ tötenşe jaǧdaidyŋ aldyn alu, sanitarlyq-epidemiologiialyq ahual jäne jylytu mausymynyŋ qalypty jaǧdaiy turaly baiandady. Äkım orynbasary Ermek Amanşaev densaulyq salasy turaly, ony ışınde därı-därmekter men olardyŋ qajettı qory jaiynda söiledı. Malika Bektūrova janar-jaǧar mai men kömır naryǧy turaly aitty. Ol öz sözınde bügınde elordada kömır naryǧy tūraqty baqylauda ekendıgın jetkızdı.
Qalalyq Işkı ıster departamentınıŋ bastyǧy Marat Qojaev bas şahardaǧy qūqyqtyq tärtıptı qamtamasyz etu boiynşa qabyldanǧan şaralarǧa toqtaldy. « Astanada qūqyqtyq jaǧdai ornyqty. Ötken aptada 659 qylmys tırkeldı. Būl ötken jyldyŋ osy kezeŋımen salystyrǧanda 305 oqiǧaǧa az» dedı ol.
«Bügın bız 2018-2019 jyldarǧa arnalǧan elordada qylmystyŋ aldyn aludyŋ keşendı josparyn qabyldadyq. Onyŋ maqsaty – qaladaǧy qylmystyq ahualdy jaqsartu» dedı Astana äkımı Äset İsekeşev. Onyŋ aituynşa, keşendı jospar elorda äkımdıgı, ışkı ıster departamentı jäne qalalyq prokuraturamen bırlesıp äzırlengen.
Soǧan bailanysty elorda basşysy qalalyq äkım apparatyna osy jospardyŋ oryndaluyn baqylaudy tapsyrdy. «Astana LRT» JŞS-nyŋ töraǧasy Bekmyrza İgenberdinov qoǧamdyq kölıktıŋ jaǧdaiyna şolu jasady. Qalany abattandyru jūmystary boiynşa Almaty, Esıl, Saryarqa audandarynyŋ äkımderı esep berdı.