KEZEKŞI PROKUROR İNSTİTUTYNYŊ KÖMEGI KÖP
Prokuratura organdary öz qyzmetınde azamattardyŋ zaŋdy qūqylary men müddelerınıŋ qorǧaluyn qanşalyqty qamtamasyz etude? Memleket basşysynyŋ «Qazaqstan älemde adamdar üşın qauıpsız jäne tūruǧa jaily eldıŋ bırıne ainaluy tiıs» degen tapsyrmasy qalai oryndaluda? Qylmystyq ıstı jürgızudıŋ sotqa deiıngı satysyn qadaǧalauda özgerıs bar ma? Osy jäne basqa da mäseleler turaly Ortalyq kommunikasiialar alaŋynda ötken brifingte Bas prokurordyŋ orynbasary Nūrmūhanbet İsaev aityp berdı.
Onyŋ aituynşa, prokuratura qyzmetındegı eŋ özektı mäsele – qylmystyq ıs jürgızudıŋ sotqa deiıngı satysynyŋ zaŋdylyǧyn qadaǧalauǧa tübegeilı özgerıs engızu. Osyǧan bailanysty jergılıktı jerlerde qadaǧalau mındetterın küşeite otyryp, prokurorlardy jaŋa «Qylmystyq ıs jürgızu kodeksınıŋ» aiasynda jūmys ısteuge daiyndyq jürgızılude.
«Qylmystardy tırkeudı tärtıpke keltıru boiynşa asa auqymdy jūmystar jüzege asyryldy. Qazırgı kezde qylmystyq ahualǧa şynaiy baǧa bere alamyz. Būl – Prezident Äkımşılıgınıŋ beiındı bölımı men Qauıpsızdık keŋesınıŋ qoldauy arqasynda jürgızılgen üş jyldyq jūmystyŋ nätijesı. Sonyŋ arqasynda qylmystyq ahualdy şynaiy bıle alatyn boldyq. Degenmen, kriminogendık jaǧdaidyŋ tym naşarlamaǧanyn da aita ketken jön» deidı N. İsaev.
Bügınde elımızde asa auyr qylmys türlerıne jatatyn kısı öltıru, tonau men qaraqşylyq edäuır azaiǧan. Qylmystyŋ tügel tırkeluın qamtamasyz etu maqsatyndaǧy jūmystar öz nätijesın berude. Iаǧni, organdar qylmysty tırkeu mäselesıne qatysty şeşımderdı jedel qabyldauǧa qol jetkızgen.
– Qazırgı uaqytta jüz aryzdanuşynyŋ toqsany üş kün ışınde özderınıŋ şaǧymdary boiynşa qandai şeşım qabyldanǧanyn bıle alady. Sonymen qatar, qylmystyq prosess barysynda azamattardyŋ konstitusiialyq qūqyn qorǧau – osy saladaǧy qadaǧalaudyŋ basty baǧyty. Osy rette kezekşı prokurorlar institutyn engızu şaralary nätijesınde azamattardy negızsız ūstau, zaŋsyz tıntu barynşa azaidy. Bızdıŋ maqsat – zaŋsyzdyqtardy müldem boldyrmau, – deidı bas prokurordyŋ orynbasary.
Esterıŋızde bolsa, byltyr qaraşa aiynda bas prokuror tūtqyndauǧa balama retınde kepıldıktı keŋınen qoldanu turaly nūsqau bergen. Būl bızdıŋ elde qoldanylmaǧan, bıraq, älemde bar täjıribe. Eger ötken jyly jiyrma ret qana kepıldık berılse, soŋǧy tört aida būl 875 adamǧa qoldanylypty. Desek te, qylmystyq ıs jürgızudıŋ sotqa deiıngı satysynyŋ zaŋdylyǧyn qadaǧalau salasynda şeşımın tappaǧan mäsele älı de köp.