QR Eŋbek jäne halyqty äleumettık qorǧau ministrı Bırjan Nūrymbetov QR Prezidentı janyndaǧy Ortalyq kommunikasiialar qyzmetınde ötken baspasöz mäslihatynda 2020 jyldyŋ 1 qaŋtarynan bastap barlyq köpbalaly otbasyna tabysyna qaramastan järdemaqy tölenetının mälım ettı.
Ministrdıŋ aituynşa, biylǧy toǧyz aida 417 myŋ otbasyna AÄK taǧaiyndalǧan. «Bız respublikalyq biudjetten jekelegen memlekettık järdemaqy engızudı josparlap otyrmyz. Ol elımızdegı barlyq köpbalaly otbasylarǧa tölenedı. Ortaşa eseppen bır balaǧa 10-11 myŋ teŋgeden berıledı. Jalpy mölşerı 2018 jyldan toqtatylǧan osyndai järdemaqy mölşerınen 4-7 ese artyq» dedı ministr Bırjan Nūrymbetov. Atap aitqanda, 4 balasy bar otbasyna – 42500 teŋge, 5 balasy barlarǧa – 53125 teŋge, 6 balasy bar üige – 63750 teŋge, 7 balasy bar otbasyna 73370 teŋge kölemınde järdemaqy tölenetın bolady. Eger köpbalaly otbasy tabys mölşerıne qarai tūrmysy tömen otbasy sanatyna jatsa, onda būl otbasyǧa AÄK-pen qosa balalarǧa kepıldı äleumettık paket taǧaiyndalady. Söitıp köpbalaly tūrmysy tömen otbasy memleket tarapynan üş äleumettık kömek paketıne ie bolady.
Sonymen bırge ministr AÄK alatyn eŋbekke qabılettı otbasy müşelerı jūmys ısteuı tiıs ekenın atap öttı. Eger ūsynylǧan jūmystan nemese jūmyspen qamtu şarasynan bas tartatyn bolsa, onda tek oǧan ǧana emes, bükıl otbasyǧa tölem toqtatylady. Olardy jūmysqa ornalastyru üşın nätijelı jūmyspen qamtuda, käsıpkerlıktı damytuda «Eŋbek» memlekettık baǧdarlamasynyŋ barlyq mehanizmderı paidalanylatyn bolady. «Mektepke deiıngı jastaǧy balalar üşın balalar taǧam, gigienalyq qūraldar, bılım beru qyzmetterı ūsynylady. Mektep jasyndaǧy balalar üşın ystyq tamaq, mektep kiımderı, jol şyǧynyn töleu, medisinalyq qyzmet körsetu qarastyrylǧan» dedı ministr. Almatynyŋ barlyq audanynda ükımettık emes ūiymdar tarapynan qūrylǧan «Baqytty otbasy» ortalyqtarynda analary kurstan ötıp jatqanda balalardyŋ qarausyz qalmauyna jaǧdai jasalǧan. Kurstan ötken analarǧa käsıbın jürgızuge qaitarymsyz granttar berılmek. B.Nūrymbetov QR Eŋbek ministrlıgı arqyly ärbır otbasynyŋ äleumettık kartasy jasalǧanyn, ol memlekettık organdardyŋ aqparattyq jüielerınen avtomattandyrylǧan derekter negızınde otbasylardyŋ naqty märtebesın anyqtauǧa mümkındık beretının atap öttı.
Jadyra ŞAMŪRATOVA
