Elordadaǧy müsınder pışınımen ǧana emes, keŋ auqymdy kompozisiialarymen de nazar audartady. Osydan onşaqty jyl būryn J.Täşenov köşesındegı skverde ornalasqan «Astana» obrazyndaǧy qazaq qyzynyŋ müsınıne toqtai qalyp qaraitynbyz. Odan basqa oŋ jaǧalaudan oryn tepken qytai jūldyz joramaly negızındegı januarlar beinesındegı kompozisiia, muzykaly fontannyŋ ainalasyndaǧy sirk ärtısterı men januarlardyŋ jäne ortasynda altyn tüstı ekvilibrist ūldyŋ müsınınen tūratyn «Sirk» kompozisiiasy bas qalaǧa erekşe körık beredı.
Būl künde elorda köşelerınde qala tūrǧyndary men qonaqtary üşın köz toqtatyp qaraityn şaǧyn müsınder köp. Onyŋ köbı «Qazaqstannyŋ şaǧyn arhitekturalyq formalary jäne Astananyŋ sändık müsını» baiqauynyŋ nätijesınde paida bolǧany belgılı.
Sol jaǧalauǧa kelsek, «Ǧaşyqtar saiabaǧyndaǧy» qyz ben jıgıt, «Altyn jürek» müsını turisterdıŋ süiıktı ornyna ainalǧan. «Qalalyqtar» seriiasy müsınderınen Bäiterektıŋ maŋyndaǧy basyna beisbolka kiıp, molbertke berıle suret salyp otyrǧan «Suretşı qyzben» suretke tüsetın jastardyŋ qarasy äste azaimaidy. Sondai aq döŋgelek alaŋdaǧy «ǧaşyǧymen kezdesuge asyqqan qyz», syrlasyp otyrǧan ǧaşyqtar, demalyp otyrǧan adam – qala ömırın beineleidı. Köpırdıŋ astynan dalaǧa şaba jöneletındei bop tūrǧan bır üiır jylqy, qobyz tartqan baqsy, köşpendıler – türkılerdıŋ ötken tarihynan äser beredı.
«The Ritz-Carlton» qonaqüiı aldyndaǧy aibarly arystandar, «Hilton Garden» aldyndaǧy qūmyrsqanyŋ müsını erekşe körıktı. «Rixos» qonaq üiı aldyndaǧy altyn tögılgen qūmyra elımızdıŋ bailyǧyn, ūly jıbek jolyn beineleidı. Ortalyq saiabaqtaǧy oryndyqqa jaiǧasqan üş maimyl, Astana sirkı aulasyndaǧy Qaŋbaq şal, Aldar köse, Qojanasyr, Maqta qyz ben mysyq, Künıkei qyz bastaǧan ertegı keiıpkerlerı qala qonaqtary men şeteldıkterdı jaǧymdy äserge böleidı.
Jadyra ŞAMŪRATOVA
