«Ilgerıde Sankt-peterburgte Astana qalasynyŋ künderı öttı. Osynau alqaly jiynda ekı eldıŋ belgılı tūlǧalary öz salalaryna qatysty baiandamalaryn oqyp jatty. Jüreksıngenı bolsa kerek, bärı de qaǧazǧa şūqşiǧan. Bır kezde Astana qalasynyŋ basqarmasyn basqaratyn qazaqtyŋ jas qyzy şyqty da elge qasqaia qarap tūryp, käsıpkerlıkke qatysty körsetkışterdıŋ bärın qoldan tızgendei jatqa aityp şyqty. Öz salasyn jılıkşe şaǧatyny körınıp-aq tūr. Jūrt riza bolǧany sondai, ūzaq uaqyt qoşemet körsettı» deidı gazetımızdıŋ bas redaktorynyŋ orynbasary Talǧat Batyrhan. Äŋgıme elordanyŋ Käsıpkerlık pen önerkäsıp basqarmasynyŋ basşysy Malika Bektūrova turaly edı.
Malika Erlanqyzy būl salany 2006 jyldan berı basqarady. Osynau basqarmaǧa bügınde ülken jauapkerşılık jüktelıp otyrǧany belgılı. Öitkenı orta jäne şaǧyn biznestı qoldau, öndırıstı damytu – qazırgı taŋda memleketımızdıŋ basty köŋıl bölıp otyrǧan salasy. Bylai qarasaŋyz, käsıpkerlık pen öndırıs er adamdarǧa tän siiaqty. Bıraq jas ta bolsa bılgır basşy Malika Erlanqyzy osynau kürdelı salany şaşau şyǧarmai, basqaryp otyr. Onyŋ aituynşa, Astana qai jaǧynan da köşbasşy boluy kerek. Qazırgı taŋda elordada jas käsıpkerlerdı qoldauǧa arnalǧan köptegen baǧdarlamalar bar. Qalada biznestı damytuǧa baǧyttalǧan naqty ıster atqaryluda. «Bas qalada kez kelgen käsıpkerlık bastamany jüzege asyruǧa mümkındık bar» deidı ol.
Özıne tapsyrylǧan mındettı ūzaq jyldar boiy qylausyz atqaryp kele jatqan Malika Bektūrova äiel retındegı eŋ basty mındetı – ana bolu, aiauly jar atanu ekendıgın äste esten şyǧarǧan emes. Ol – bügınde täp-tättı üş balanyŋ anasy. Ülken qyzy Daniia ekınşı synypta oqidy. Ūly Älımjan bırınşı synyptyŋ oquşysy bolsa, üşınşısı Dariia – bes jasta. «Balalarym – bailyǧym» dep bıletın Malika qanşa jūmysbasty bolsa da perzentterınıŋ tärbiesıne jıtı köŋıl böledı. Qyzdary mektepten tys uaqytta üirmelerge qatysyp, toqyma toqudy, ıs tıgudı üirenıp jür. Al ūly şahmat oinaǧandy, hokkei men futbolǧa barǧandy jaqsy köredı. Balaqaidyŋ sportpen äuestengenı sonşalyq, jattyǧudan bır kün de qalǧysy joq. Tıptı demalys künderı de kerektı qūral-jabdyǧyn asynyp alyp, üiırmege asyǧyp bara jatqany sol.
Köktemgı merekede Malika Erlanqyzynyŋ otbasynda qos quanyş bolady. Ūly ekeuı tuǧan künın bır künde toilaidy. Osy künı balasy qoldan jasalǧan syilyǧyn tabystap, anasyn ekı ese quantyp qoiatyny bar. Al joldasy Azat Bektūrov jan jaryna ol jaqsy köretın gülı – qyzǧaldaqty tartu etedı.
Elordnyŋ eŋse tıkteuıne eŋbek sıŋırıp kele jatqan Malika Erlanqyzy ūjymda tärtıp bolǧanyn talap etedı. Qyzmetkerler keibır memlekettık mekemedegıdei tünge deiın sarylyp otyrmaidy. Astananyŋ qarbalas tırşılıgıne qaramastan qoldaryna alǧan kez kelgen jūmysty uaqytyly ärı sapaly oryndauǧa tyrysady. «Jūmysta tärtıp pen jauapkerşılık bolǧanyn jaqsy köremın. Sonda ǧana ısıŋ alǧa basyp, naqty nätijege qol jetkızesıŋ».
Qymbat NŪRǦALİ
astana-akshamy.kz
