Maqsat – aiqyn, mındet – zor

Iske asyru jospary qabyldandy

QR Premer-Ministrı Asqar Maminnıŋ töraǧalyǧymen ötken QR Ükımetınıŋ selektorlyq otyrysynda QR Prezidentınıŋ «Cyndarly qoǧamdyq dialog – Qazaqstannyŋ tūraqtylyǧy men örkendeuınıŋ negızı» Joldauyn ıske asyru jönındegı Jalpyūlttyq ıs-şaralar josparynyŋ jobasy qabyldandy, dep habarlady Elorda Aqparat primeminister.kz saityna sılteme jasap.

Qūjat 81 tarmaqtan tūrady: zaman talabyna sai tiımdı memleket – 11 tar­maq, azamattardyŋ qūqyq­tary men qauıpsızdıgın qamtamasyz etu – 15 tarmaq, qarqyndy damyǧan jäne inkliuzivtı ekonomika – 27 tarmaq, äleumettık jaŋǧyrudyŋ jaŋa kezeŋı – 18 tarmaq, quatty öŋırler – quatty el – 10 tarmaq.
«Barlyq memlekettık organdar men äkımdıkter atalǧan qūjatty Prezident maqūldaǧannan keiın bırden alǧa qoiylǧan mındetterdı oryndaudy bastauy kerek. Bız alǧa qoiylǧan mındetterdı tiımdı şeşu bo­iynşa üilesken jūmysty qamtamasyz etuımız qajet» dedı A. Mamin.
Memleket basşysynyŋ Joldauyn ıske asyru jönındegı Jalpyūlttyq ıs-şaralar josparynyŋ qabyldanǧan jobasy QR Prezidentı Q.Toqaevqa bekıtuge jıberıledı.

Eŋbek ūjymdarynda talqylanuda

Memleket basşysy Qasym-Jomart Toqaevtyŋ Joldauy men onda körsetılgen mındetterdı jüzege asyru mäselesı eŋbek ūjymdarynda talqylanuda. Taiauda sondai otyrystyŋ bırı «Astanalyq sirk» MKQK-da öttı, dep habarlaidy Elorda Aqparat.

Joldaudy talqylauǧa arnalǧan jiynǧa eŋbek ūjymyndaǧy 50 adam qatysty. Joldauda Prezident kötergen mädeniet salasyna, äleumettıŋ äl-auqatyna qatys­ty mäseleler jönınde «Astanalyq sirk» MKQK bas direktorynyŋ mındetın atqaruşy jäne «Nur Otan» partiiasy bastauyş ūiymy töraǧasynyŋ orynbasary Mūrat Bekeev, zaŋ keŋesşısı Ömırbek Qaldybekov söz söiledı.
Spikerler Prezident Joldauyndaǧy qala men auyldy damytu, qaryz jüktemesınıŋ tömendeuı, qoljetımdı tūrǧyn üi, medisinalyq saqtandyru, elordaǧa gaz tartu siiaqty mäseleler jönınde aitty. Atap aitqanda, kepıldı äleumettık kömektı tūrmysy tömen otbasylardyŋ qalai alatyny, «Baqytty otbasy» baǧdarlamasy arqyly 2 paiyzdyq jeŋıldetılgen mölşerlememen baspanaǧa qalai qol jetkızuge bolatyny aityldy.
Būdan bölek, zeinetaqy jüiesıne engızıletın özgerıster, «Auyl – el besıgı» baǧdarlamasy, 2020 jyldyŋ 1 qaŋtarynan bastap elımızde ıske qosylatyn mındettı äleumettık medisinalyq saqtandyru, tūrǧyn üi qoryn jöndeu, Nūr-Sūltan qalasyna gaz tartudyŋ bastaluy turaly keŋınen maǧlūmat berıldı.

Rasul JŪMALY, saiasattanuşy:

KADR TAŊDAUDA AŞYQTYQ BOLUY TİIS

– Memleket basşysy Qasym-Jomart Toqaevtyŋ osy Joldauynda köpten berı halyqtyŋ kökeiınde jürgen bırtalai naqty bastama köterıldı. Solardyŋ bırı – şendılerdıŋ sanyn qysqartu mäselesı. Jalpy, Memleket basşysynyŋ (Tūŋǧyş ­Prezident N.Nazarbaevtyŋ jäne qazırgı Prezident Q.Toqaevtyŋ) Joldau­larynda qoǧamdaǧy asa kürdelı, şeşımın tappaǧan mäseleler aitylady. Ūtymdy ūsynystar, baiypty baǧdarlamalar jariialanady. Alaida, ökınışke qarai, köpşılık jaǧdaida osy uädeler ıske aspai jatady.
Prezident būl jolǧy Joldauda şendılerdıŋ sanyn aldaǧy 4 jylda 25 paiyzǧa (būǧan de­iıngı Prezident Joldau­larynda 30 paiyzǧa deiın qysqartu turaly aitylǧan) qysqartu jönınde mälımdedı. Bızdıŋ elımızde şendılerdıŋ sany öspese, qysqarǧan emes. Mäselen, resmi türde qysqarady da, bıraq kvazimemlekettık sektorǧa, ūlttyq kompaniialarǧa ötıp ketedı. Söitıp qala beredı. Bıraq osy Joldauda būl mäsele taǧy köterıldı. Halyqtyŋ ümıtı zor. Qasym-Jomart Kemelūlynyŋ özınıŋ de osy mäselenı naqty şeşuge degen saiasi erık-jıgerıne senıp otyr. Qazır äleumettık jelılerdı qarasaŋyz, Joldauǧa qatysty aitylǧan eŋ negızgı uäj – Prezidenttıŋ bergen uädelerı qūr söz bolyp qalmai, ıske asa ma, älde aspai ma degenge alaŋdauşylyq. Menıŋşe, bilıktıŋ halyqtyŋ özıne degen senımın qaitaru, abyroiyn saqtap qalu tūrǧysynan osy uädelerdıŋ eŋ bolmasa bırqatary keşendı türde oryndala bastasa, būl bilıktıŋ abyroiyn ösıredı. Sondyqtan osyndai ümıt bar.
Al şendılerdıŋ sanyn 25 paiyzǧa qysqartu degen mäsele baiaǧydan-aq pısıp-jetılgen. Sebebı bız­dıŋ sarapşy-mamandar halyqaralyq täjıribenı eskere otyryp, osy mäselenı kezınde taldady. Mysaly, jan basyna şaqqanda Japoniia, Germaniia siiaqty elderde şendılerdıŋ sany qanşa bolu kerek, olardyŋ az-köp boluy qanşalyqty ūtymdy, oŋtaily degen mäselenı zerttedı. Osy kriteriilerge qaraǧanda, Qazaqstanda şendılerdıŋ sany şyn mänısınde öte köp. Ökınışke qarai, olardyŋ sanynyŋ köptıgı ūtymdy, sapaly basqarudy bıldırmeidı. Şendıler köp bolǧannan keiın özınıŋ paidasy bar ekendıgın körsetu üşın, keide tıptı ekonomikalyq reformalarǧa, käsıporyndardyŋ, joǧary oqu oryndarynyŋ jūmysyna kedergı keltıredı. Ärtürlı jaŋa qajetsız qūjattar oilap tabady, tekserısterdı üdetedı. Qoǧamnyŋ, memlekettıŋ damuyna järdemdesudıŋ ornyna, kerısınşe, kedergı, tūsau jasaidy. Sondyqtan olardyŋ sanyn qysqartu qajet. Būl – reformalardyŋ bır jaǧy.
Bıraq memlekettık qyzmet degende basqa da kürdelı problemalar jetkılıktı. Mäsele tek şendılerdıŋ sanyn qysqartuda emes. Qūr qysqartumen mäsele şeşılmeitını anyq. Iаǧni memlekettık qyzmetke sapaly, täjıribelı, memleketşıl, qolynan ıs keletın azamattardy jinau kerek. Eger de kadrlardy qabyldau mäselesı aşyq, aiqyn bolmasa, bilıkte sol bügıngıdei tamyr-tanystyq keŋ etek alyp, kezdeisoq adamdar qala beredı. Sondyqtan kadrlardy jasaqtau, ırıkteu, taŋdau, qabyldau mäselesı aiqyn, ädıl boluy tiıs. Sebebı qolynan ıs keletın mamandar jetkılıktı. Ökınışke qarai, jūmysqa olar emes, basqa bır kezdeisoq adamdar qabyldanady. Prezidenttıŋ būl mäselenı kötergenın bärımız maqūldaimyz. Sonyŋ oŋ şeşıletınıne ümıttenemız. Al nätijenıŋ qandai bolatynyn uaqyt körseter.

Zäure JÜSIPOVA, Nūr-Sūltan qalasy mäslihat deputaty:

Özektı mäseleler qozǧalǧan

Qazaqstan Respublikasynyŋ Prezidentı Qasym-­Jomart Toqaev 2 qyrkü­iektegı Joldauynda qazırgı beleŋ alyp otyrǧan älemdık mäselelerge köŋıl böle oty­ryp, adam sanasynyŋ tūmandanyp, neşe türlı qylmystyŋ beleŋ alyp bara jatqandyǧyn, bızdıŋ elımızge de ūşqynyn tigızıp jatqan esırtkı biznesı, jeke adamdar men balalalarǧa körsetılıp jatqan zorlyq-zombylyqpen küresudıŋ maŋyzdylyǧyn basa aitty. Sanasyz äreketterge baratyn qylmyskerlerge kez kelgen sanaly azamat qarsy tūryp, jol bermeuı kerek, būl üşın tek qūqyq qorǧau organdary ǧana emes bükıl qoǧam bolyp küresuge müddelımız.
Memleket tarapynan ūstazdar da qoldau köretın kez jettı, sondyqtan bılım salasyndaǧy Prezident kötergen bastama, igı qadam naqty, şynaiy türde ıske asqany jön. Būl arnaiy zaŋdarmen bekıtıluı qajet. Kelesı bır menı oilandyratyn mäsele – memlekettık tıldıŋ jaiy. Qazırgı taŋda tılımızdıŋ halyq arasyndaǧy sūranysy müldem tömen deŋgeide. Kez kelgen basşy äleumettıŋ mektepke sūranysyn saraptap, būl mäselenı bılıp otyr.
Ekologiialyq bolsyn, ekonomikalyq bolsyn, kez kelgen saladaǧy zaŋdy qūjattar ömır talabyna sai, memleket bolaşaǧyn, ūlttyŋ, ūrpaqtyŋ bolaşaǧyn qamtuy kerek.

Külış TÖLEUHANOVA,
Qaraǧandy oblysy Qazaqstan halqy Assambleiasy Analar keŋesınıŋ müşesı,
Ybyrai Altynsarin atyndaǧy tösbelgı iegerı:

Äleumettı qoldauǧa ündeidı

Memleket basşysy Qasym-Jomart Toqaevtyŋ Qazaqstan halqyna jariialaǧan Joldauy elımızdıŋ tarihynda qalary sözsız.Prezidenttıŋ «Qazaq­stan – ortaq şaŋyraǧymyz! Men barlyǧyŋyzdy mereilı mekenımızdı örkendetuge üles qosuǧa şaqyramyn!» degen sözderınen elımızdıŋ taǧdyryna bei-jai qaramaityn, ärbır azamattaryna senım artqany baiqalady.
Prezident halyqty jan-jaqty qoldaudy eşqaşan ūmyt qaldyrmaidy. Özınıŋ Joldauynda densaulyq saqtau, bılım beru, äleumettık qorǧau, zeinetaqyny, şäkırt­aqyny, mügedektıgı men asyrau­şylarynan aiyrylǧanyna bailanysty järdemaqylardy köbeitu mäselelerı ünemı nazarynda tūratyny joldauda aiqyn körsetılgen.
Sonymen qatar Memleket basşysy öz sözınde auyr qylmystar üşın jazany qataŋdatu, azamattyq qoǧamdy qoldau, ışkı ıster organdaryna reforma jürgızu ,sonymen qatar basqa da özektı mäselelerdı de sözge tiek ettı.
Äsırese Memleket basşysynyŋ köpbalaly ana­lardy şaǧyn bizneske tartu baǧdarlamasyn äzırleu turaly ūsynysyn qoldaimyn. Öitkenı köpbalaly analarmen köptegen kezdesudıŋ nätijesınde üide otyryp tabys tapqysy keletın jas analardyŋ bar ekendıgı belgılı boldy. Osyndai sanattaǧy analardyŋ tabys tabu deŋgeiıne jetu maqsatynda Qazaqstan halqy assambleiasynyŋ janyndaǧy Analar keŋesı öz jūmysyn bastap otyr. Endı būl jūmysqa memleket tarapynan qoldau körsetılse, nūr üstıne nūr bolady.