Keşe Nūr-Sūltan qalasy mäslihatynyŋ kezektı sessiiasynda elordany gazdandyru, 2021-2023 jyldarǧa arnalǧan qala biudjetın bekıtu sekıldı maŋyzdy mäseleler qaraldy. Biylǧy qorytyndy sessiiaǧa qatysqan qala äkımı Altai Kölgınov osy jyly pandemiiaǧa, karantinge bailanysty türlı şekteulerge qaramastan qalada auqymdy jūmys atqarylǧanyn, būl jūmystarǧa mäslihat deputattary da ülken ülesterın qosqanyn atap öttı.
– Elbasynyŋ bes äleumettık bastamasynan tuyndaǧan negızgı maqsattardyŋ bırı – elordany gazdandyru. Būl – şyn mänınde tarihi joba. Memleket basşysy Qasym-Jomart Toqaev Nūr-Sūltan qalasyn odan ärı damytu jönındegı keŋeste bırqatar tapsyrmalardy berıp, osyǧan da nazarymyzdy audardy. Gazdandyrudy ıske asyru üşın mäslihat deputattarymen bırge jeke sektorǧa baryp, tūrǧyndarmen kezdestık. Olardyŋ ötınışterın tyŋdap, sol orynda şeşım şyǧardyq. Qorytyndysynda az jūmys jasalǧan joq. Sonyŋ arqasynda 300 şaqyrymdy qūraityn ışkıoramdyq gaz taratu jelılerı salyndy. Qazır tehnikalyq şarttardy berıp, jeke sektordy gazǧa qosu jūmystary jürgızılıp jatyr. Būl jūmys ekologiia mäselesımen, tūrǧyndardyŋ densaulyǧymen tyǧyz bailanysty. Aldymyzǧa qoiylǧan maqsat-mındetterdı oryndadyq, – dedı A.Kölgınov.
Qalanyŋ şet aimaqtaryn damytuǧa qatysty Memleket basşysynyŋ tapsyrmalaryna toqtalǧan qala äkımı 300 myŋ adam tūratyn on alty tūrǧyn alapta 104 köşege asfalt töselgenın, 17 qoǧamdyq keŋıstık salynǧanyn aityp öttı.
– Būryn üş auysymmen oqytatyn 8 orta mektep bolsa, olardyŋ sanyn ekı esege qysqarttyq. Qazır osyndai 4 mektep qaldy. Aldynda 22 mektepte oquşylar sany şamadan tys köp bolsa, bügınde osyndai 16 mektep bar. Eger jaŋa mektepterdıŋ qūrylysyn jalǧastyrmasaq, jaǧdai kürdelene tüser edı, – dedı A.Kölgınov.
Alda tūrǧan maqsattyŋ bırı 3-JEO qūrylysyn aiaqtau ekenın aitqan qala basşysy özektı mäselelerdıŋ qatarynda sorǧy tazartu stansasyn salu da bar ekenın jetkızdı. Kärızderdı tazartu qūrylǧylary da salynuy kerektıgın aityp öttı.
– Osy üş jüielı mäselenı qalanyŋ qarqyndy ösuın, tūrǧyndar sanynyŋ artuyn esepke alyp, şeşuımız kerek. Barlyq jobalar daiyn. 3-JEO boiynşa jobalyq-smetalyq qūjattama osy jeltoqsan aiynyŋ aiaǧynda şyǧady. Sorǧy tazartu stansasy boiynşa da tiıstı qūjattar daiyn bolyp qaldy. Men būl jobalardy jüzege asyrylu barysy jaily memleket basşylyǧyna baiandadym. Olardyŋ tarapynan qoldau bar, – dedı A.Kölgınov.
Aǧymdaǧy jūmystarǧa toqtalǧan qala basşysy biyl 150 aula abattandyrylǧanyn, 60 qoǧamdyq keŋıstık salynǧanyn aityp öttı. Abattandyru men joldardy salu jūmysy, mektepter qūrylysy jalǧasatynyn jetkızdı.
– Kelesı jyly täuelsızdıgımızge 30 jyl tolady. Būl – el tarihyndaǧy aituly oqiǧa. Sondyqtan aldaǧy jyly da naqty ısterdı atqaruymyz kerek. Biyl 3 million şarşy metr tūrǧyn üidı paidalanuǧa berdık. Būl – ülken körsetkış. Salystyrmaly türde aitqanda, ötken jyly 1 million 700 myŋ şarşy metrdı tapsyrǧan edık. Endı jedel türde eskı, apatty üiler mäselesın şeşemız. Qalada sondai 200-den astam üi bar, – dedı A.Kölgınov.
Tūrǧyndardy jūmyspen qamtu mäselesıne toqtalǧan äkım biyl «Jūmyspen qamtudyŋ jol kartasy» memlekettık baǧdarlamasy arqyly 15 myŋnan asa adam jūmysqa tūrǧyzylǧanyn jetkızdı.
– Alda atqarar mındetterımız älı de köp. Keşe «qyzyl aimaqqa» qaitadan kırdık. Sondyqtan şekteu şaralary jalǧasady. Qazır bärımız qauıptıŋ aldyn alu üşın olardyŋ maŋyzyn halyqqa tüsındıruımız kerek. Basty maqsatymyz – halyqtyŋ bızge artqan senımdı aqtau, jüktelgen jūmysty nätijelı atqaru, – dedı A.Kölgınov.
Qalany gazdandyru barysymen qala äkımınıŋ orynbasary Ermek Qizatov, 2021-2023 jyldarǧa arnalǧan qala biudjetımen Ekonomika jäne biudjettık josparlau basqarmasynyŋ basşysy Qaisar Maŋqaraev tanystyrdy.
