MİLLİONER
«Kedeilık ketkende jaqsy, bailyq kelgende jaqsy» deidı halqymyz. Bügıngı qoǧamda tamyr-tanyssyz, eşqandai zaŋǧa qarsy kelmei-aq adal eŋbekpen baiuǧa bolady. Oǧan dälel köp. Künı keşe «Forbes» jurnalynda otandyq millionerler tızımınde elımızdıŋ eŋ jas käsıpkerı Marat Äbievtıŋ esımı jariialandy. Aqtöbelık jiyrma tört jastaǧy biznesmennıŋ bailyǧy 11 mln dollarǧa jetken.
Alǧaşqy sauda
Maratqa milliondaǧan dollar aspannan salbyrap tüsken joq. Osyndai deŋgeige jetu üşın 13 jyl jūmys ıstedı. Eŋ alǧaş aqşany on jasynda tapty. Kezınde el-jūrt ailyǧyn ala almai, jūmys oryndary jabylǧany belgılı. Toqyrau Äbievterdıŋ de otbasyn ainalyp ötpedı. Aiaq astynan künde «makaron» jeitın künder bastalǧan tūsta on jastaǧy Marat anasyna kelıp, «Nege etı joq tamaq jep jürmız?» dep sūraidy. Anasy bala demei, eldegı jaǧdaidy baiyppen tüsındıredı. Tek būl otbasy ǧana emes, körşılerınıŋ de, tanystarynyŋ da, tuǧan-tuystarynyŋ da jaiy osyndai ekenın aitady.
Sol kezde özımen qatarlas balalar Aqtöbenıŋ «Şyǧys» bazarynda kölık juyp, aqşa tabatyn. Ol sol topqa qosylady. Künıne bırneşe maşina juyp, alǧaşqy tabysyn alǧanda üiıne azyq-tülık äkeledı. Otbasyna äjeptäuır kömek bolǧanymen käsıbı köpke sozylmady. Aiaq astynan «kryşa» degen bäle şyǧady. Oǧan kündelıktı tapqan tabysynyŋ teŋ jartysyn ötkızu kerek eken. Äitpese, kölık judyrmaidy. Mūndai talapqa şydamaǧan Marat aqşa tabudyŋ basqa jolyn ızdeidı.
Oqu jyly aiaqtalarda barlyq oquşylar kıtaptaryn retteidı. Ol kezde skotch – taptyrmas qūral. Marat oilanbastan 2000 teŋgege jaqyn dükenderdegı skotchtardyŋ bırın qaldyrmai satyp alady. Mektepke kelgennen keiın, synyptastaryna är betın 5 teŋgege jabystyryp beredı. Bırı küledı, bırı taŋ qalady. Oǧan män beretın Marat joq. Osylaişa jetı myŋ teŋge tapqanyna quanady.
Odan keiın elımızge endı ǧana taralyp jatqan jelılık marketingpen ainalysady. Äielder qoldanatyn türlı kosmetikalyq tauarlardy jarnamalauda aldyna jan salmaidy. Keiınnen būl käsıp erkekke tän emes ekenın tüsınıp, tastap ketedı.
14 jasynda aqtöbelık rep-toptardyŋ prodiuserı bolady. Dostarymen bırlesıp «Life» atty top qūryp, änşılerdıŋ konsertın ūiymdastyryp, aqşa tapqan. «Super star KZ» jobasynyŋ jeŋımpazy Qairat Tüntekovtıŋ, «Baqai»tobynyŋ konsertıne qalai bilet satqany älı esınde. Būl jastaǧy balalardyŋ qyzdarǧa ūnaudy oilaityny belgılı. Marat ta ädemı qyzdarǧa tegın bilet taratady. Ony körıp, joldastary da solai ısteidı. Soŋynda būl käsıp te sätsızdıkpen aiaqtalady.
Täuekeldılık tabys äkeldı
Marat Äbiev mekteptı tämamdaǧan soŋ Aqtöbe kooperativtık tehnikumyn «Aqparatty öŋdeu men basqarudyŋ avtomattandyrylǧan jüielerı» mamandyǧy boiynşa bıtırgen. Mūnan soŋ kompiuterlık qyzmet körsetumen ainalysyp, internet saittaryn jasap, arnauly studiia aşady. Dosymen bırlesıp aşqan firmasy edäuır tabys äkeledı. Al, 19 jasqa tolǧanda kölık qūraldaryna sputniktık monitoring jürgızetın «Evromobail Qazaqstan» JŞS-nıŋ negızın qalaidy. Ärine, ony qūru Maratqa oŋai bolmaǧan. Reseilık kompaniia bastapqyda Maratqa senbei, tauar aqysy üşın 80 myŋ dollardy aldyn ala töleudı talap etken. Ūzaq oilana kele tym bolmasa firmanyŋ brendın özınıŋ JŞS-nyŋ atauyna tegın paidalanudy sūraidy. Alǧan betınen qaitpaǧan ol, osylaişa tauar ötkızude atalmyş brendtıŋ maŋyzdy ekenın aityp, olardy sendıredı. «Azamattar men ūiymdarǧa qyzmet türlerın ūsynǧanda, türıme qarap köbı direktor ekenıme senımısızdık bıldırdı. Sondyqtan 40 jastaǧy äieldı direktor etıp qoiyp, özımdı menedjer retınde tanystyrdym» deidı ol. Marat reseilık GPS-datchikterın ornatuşy alǧaşqy distribiuter bolǧannan keiın, käsıbı örge domalady. Naryqta bäsekege qabılettı firmany keiınnen atalmyş kompaniianyŋ özıne bır million dollarǧa satyp jıberedı.
Biznesın odan ärı jandandyru üşın 2011 jyly «KSP Steel» JŞS-ın qūrdy. Mūnai-gaz salasyndaǧy käsıporyndar men jer qoinauyn paidalanuşylarǧa arnalǧan joǧary sapaly bolat qūbyrlar şyǧaratyn jalǧyz öndıruşınıŋ önımın ötkızudı ūlǧaitu maqsatynda «KSP Steel Sauda üiın» de aşty. Özınıŋ aituynşa, jinalǧan aqşanyŋ basym bölıgın şetelden tapqan. Atap aitqanda, İrannan. «Parsy jerınde şielenıs oryn alyp jasta da sol jaqpen bailanystym. Eldı ekonomikalyq sanksiia buyp, älemnıŋ köptegen elderı öz azamattaryn alyp ketıp jatqanda, täuekel dep Tegeranǧa tarttym. Mūndaǧy biznesımdı aldymen azyq-tülık tauarlaryn jetkızuden bastadym. Odan keiın ol aqşaǧa bırneşe şeteldık kompaniialarmen bırge taǧy da täuekelge bel bailap tanker satyp aldym. Osy tanker arqyly Qytaiǧa mūnai tasydyq. Alǧaşqy milliondar osylai keldı» deidı jas käsıpker.
Marat byltyr «Qazaqstan tauar öndıruşılerınıŋ qauymdastyǧyn» qūruǧa bastamaşy boldy. Bügınde Londonda, Mäskeude jäne taǧy basqa elderde qazaqstandyq tauarlardy ötkızumen ainalysatyn kompaniialardyŋ qūryltaişysy bolyp tabylady.
Ūlttyq mentalitettı ūmytpaǧan jön
Osy aptada Marat Äbievtıŋ Qazaqstanda qalai baiuǧa bolatyny jönınde jazǧan «Qazaqstandyq arman» kıtabynyŋ tūsaukeserı boldy. Jurnalist Aqmaral Maiközovamen bırlesıp jazǧan kıtapta bedeldı adamdarmen bailanyspai-aq, ata-ananyŋ bailyǧyna jügınbei-aq, adal eŋbekpen million dollar tabudyŋ jolyn jazady.
«Keibır dostarym menen qaryzǧa aqşa sūraidy. Qinalyp tūrǧan soŋ beremın. Alaida köbı qaitaruǧa asyqpady. Sūrasam, «sende aqşa köp qoi» degen jauap alamyn. Ras, mende aqşa bar. Bıraq, onyŋ bärı adal eŋbekpen kelgen. «Adamǧa balyq berme, balyq aulaityn qarmaq ber» degendei, aqşa adamdy büldıredı. Sondyqtan olarǧa aqşa tabuǧa mümkındık bergen dūrys dep oiladym. Mümkındık olardyŋ da baiuyna jol aşady. Öz täjıribemnen tüigenım, aqşa tabu – qajyrly eŋbek. Men 10 jasymnan 23 jasyma deiın eŋbek ettım. Būl kıtapta jinaǧan täjıribemmen bölıstım. Ony oqyǧan jastardyŋ köbı şabyttanyp, tekke jürmeuge tyrysady degen ümıtım bar. Sonymen qatar, kez kelgen biznes bastamanyŋ tabysty boluy qazaq mentalitetı men psihologiiasyn bıluge bailanysty. Iştei biiazy bolyp, qazaqtyŋ tılın, salt-dästürı men mädenietın qūrmetteu kerek» deidı Marat Äbiev. Marat özınıŋ bailyǧyn «Forbes» basylymyna jariialaudyŋ özındık sebebı baryn aitady. Qarşadaiynan tabys tapqanymen, jasynyŋ kışkentailyǧy aldynan talai kedergı keltırgen. Soǧan qaramastan tyǧyryqtan şyǧudyŋ jolyn tauyp, aldyna qoiǧan maqsatyna jettı. Maŋdai terımen tapqan bailyǧyn paş etu arqyly elımızdegı jastardyŋ mümkındıgı mol ekenın däleldedı.
Jas bolsa da, bas bola bılgen qarapaiym qazaqtyŋ balasy halyqqa qaiyrymdylyq jasaudy da ūmytqan emes. Alaida, ony jariialaudy jany süimeidı. Käsıpker bolǧysy keletınderge arnalǧan kıtaptyŋ tirajy 7777 dana eken. Marat Äbiev kıtaptan tüsken barlyq qarjyny qaterlı ısıkpen auyratyn balalardyŋ emıne jūmsaitynyn aitty.
Gülmira AIMAǦANBET