Nūrlan ERMEKBAEV, Dın ısterı jäne azamattyq qoǧam ministrı : Dınnıŋ dūrys tüsınıgın mektepte qalau kerek
Qoǧamda radikaldyq dıni aǧymdardyŋ destruktivtı ideialarynyŋ taraluy köpşılıktı alaŋdatady. Olarmen qalai küresu kerek? Dıni ahual jäne basqa da mäseleler jönınde Dın ısterı jäne azamattyq qoǧam ministrı Nūrlan Ermekbaevpen äŋgımelesken edık.
– Nūrlan Baiūzaqūly, elımızdegı dıni ahual ötken jyldarmen salystyrǧanda qalypty. Desek te, zaiyrly memlekettıŋ zaŋ talaptaryn moiyndaǧysy kelmeitınderdıŋ qatary köbeiıp keledı degen pıkırmen kelısesız be?
– Būl jerde mındettı türde basyn aşyp alatyn mäsele bar, ol – dıni ahual ūǧymy. Dıni ahualdyŋ tūraqtylyǧy elımızdegı memlekettık-konfessiialyq qarym-qatynas, konfessiialar arasyndaǧy özara ärekettestık, azamattardyŋ ar-ojdan bostandyǧynyŋ deŋgeiı, dın salasyn retteitın qoldanystaǧy zaŋnama talaptarynyŋ saqtaluy, azamattardyŋ dın salasyndaǧy saiasatqa qatynasy men dın salasyndaǧy ahualdy baǧalauy tärızdı köp qatparly ölşemderdıŋ nätijesınen qūralady.
Būl jaǧynan alǧanda elımızdıŋ dın salasynda şeşımın tappai otyrǧan mäsele joq. Memlekettık-konfessiialyq tūrǧydan däiektı qatynas ornatylyp, azamattardyŋ dıni bostandyǧy tolyǧynan qamtamasyz etılgen.
Ökınışke qarai, dındı bırjaqty tüsınetın radikaldyq aǧymdardyŋ ideialaryn ūstanuşylar tarapynan elımızde soŋǧy 5-6 jylda bırqatar jantürşıgerlık oqiǧalardyŋ oryn alǧany mälım. Desek te, osyndai oqiǧalardyŋ özı elımızdegı dıni ahualdyŋ tūraqtylyǧyna syzat tüsıre almaidy. Kerısınşe, mūndai laŋkestık oqiǧalar qoǧamda berık ornyqqan konfessiiaaralyq kelısım men auyzbırşılıktıŋ baǧa jetpes qūndylyq ekenıne közımızdı jetkıze tüsedı. Sondyqtan elımızdegı dıni ahual tūraqty ekendıgın jäne dıni sebepterdı bürkenıp, radikaldardyŋ qatysuymen oryn alǧan bırdı-ekılı oqys jaǧdailar oǧan tübegeilı äser etpedı dep tolyq senımmen aita alamyz.
Ärine, būl elımızdıŋ dın salasynda eşqandai mäsele joq degendı bıldırmese kerek… Bızdıŋ qoǧamymyzda radikaldyq dıni aǧymdardyŋ destruktivtı ideialarynyŋ taraluynan körınıs tauyp otyrǧan jäne köpşılıktı alaŋdatyp otyrǧan mäselelerdıŋ bar ekenı sözsız. Men byltyrǧy jyly qazan aiynda ötken brifingte salafizm ideologiiasyn elımız üşın müldem jat ärı terıs dıni aǧym dep sanaitynymyz turaly Ükımettıŋ ūstanymyn bıldırdım.
Zaiyrly zaŋnamalarmen rettelgenı jön
– Salafizm ideologiiasynyŋ terıstıgı nede?
– Radikaldyq dıni aǧymdardyŋ ūstanuşylary öz ideialaryn bızdıŋ ūlttyq mädenietımızden, ruhani dästürlerımız ben qūndylyqtarymyzdan joǧary qoiady jäne dıni talaptarmen ömır süretın memlekettı qoǧamdyq qūrylystyŋ «eŋ dūrys jüiesı» dep esepteidı. Al mūndai şetın ideialardyŋ bızdıŋ memleketımızge jäne san ǧasyrlyq tarihymyz ben mädenietımızge qaişy keletını aitpasa da tüsınıktı.
– Osy mäselege bailanysty naqty qandai şaralar jürgızılude?
– Ministrlık qazırgı künde müddelı memlekettık organdarmen bırlese otyryp, dıni sipattaǧy radikaldyq jäne ekstremistık ideialarǧa tosqauyl qoiu baǧytynda keşendı jūmystar jürgızude jäne ol aldaǧy uaqytta küşeie tüsetın bolady.
Jalpy, zaiyrly memleket bolyp tabylatyn bızdıŋ elımızde qandai da bır resmi nemese mındettı dın joq. Kerısınşe, zaiyrly memlekette dınnıŋ damuyna jäne azamattardyŋ dıni senım bostandyǧyna keŋ mümkındıkter berıledı. Būǧan alysqa barmai-aq bızdıŋ elımızdıŋ täjıribesın alsaq ta jetkılıktı. Osy oraida, bızdıŋ elımızde äleumettık qatynastar, sonyŋ ışınde bılım beru, densaulyq saqtau, otbasy jäne neke instituttary dıni normalarmen emes, zaiyrly zaŋnamalarmen retteletındıgın basa aita ketkım keledı. Dın būl salalarǧa aralasa almaidy jäne aralaspauy tiıs.
Sondai-aq, terıs dıni aǧymdardyŋ ideialaryn ūstanuşylar ortasynda, tıptı dästürlı hanafi mazhabyn ūstanuşylardyŋ arasynda da zaŋdy nekege tūruǧa nemqūrailylyq tanytu jaittary kezdesedı. Būl dūrys emes. Elımızdıŋ zaŋyna säikes nekege tūru mındettı türde memleket tarapynan tırkeledı. Būl – nekege tūrǧan azamattardyŋ qūqyqtary zaŋdy türde qorǧalady degen söz. Säikesınşe, nekelerın dıni jolmen qidyryp, ony zaŋdastyrmaǧan qyzdardyŋ, mūndai otbasynda düniege kelgen balalardyŋ qūqyqtaryn memleket qorǧai almaidy.
Jalpy, salafilerge ǧana emes, barlyq radikaldarǧa tän bır erekşelık – olar özderınıŋ jalpy sauattarynyŋ jäne ziiatkerlık deŋgeilerınıŋ tömendıgınen ruhani qūndylyqtardy emes, kerısınşe, adam men qoǧamnyŋ tūrmys-tırşılıgın, jürıs-tūrysyn, kiım kiısı men basqa da syrtqy körınısterın retteitın hadisterdı däl sol küiınde sözbe-söz tüsınedı jäne sol talaptardy tolyqtai oryndauǧa tyrysady.
Osyndai keleŋsız mäseleler elımızdıŋ damuynyŋ zaiyrly qaǧidatyn ılgerıletuge jäne zaiyrly ömır süru qūndylyqtaryn keŋınen nasihattauǧa baǧyttalǧan jūmystardy küşeite tüsudı qajet etedı. Men elımızdıŋ dındar azamattary, eŋ bırınşıden, öz elınıŋ patriottary boluy tiıs dep sanaimyn. Olar jaqsy bılım alyp, adal eŋbek etudı, özderın ünemı jetıldırıp otyrudy, zaŋ talaptaryn saqtaudy basşylyqqa alulary kerek. Sondyqtan zaiyrly memlekettıŋ zaŋ talaptaryn moiyndaǧysy kelmeitınderdıŋ qatary köbeiıp kele jatyr degen tūjyrymmen kelıspeimın.
Dındı mektep qabyrǧasynda dūrys tüsındıru kerek
– Olai bolsa, jastardyŋ dıni aǧymdarǧa tez tartylu sebebı nede dep oilaisyz?
– Qoǧamnyŋ eŋ köp jäne belsendı toby retınde jastardyŋ qandai mäselege bolsa da qyzyǧuşylyqtary joǧary. Būǧan qosa, jūmyssyzdyq, qūqyqtyq jäne dıni sauatsyzdyq, jastarǧa arnalǧan memlekettık baǧdarlamalardan habarsyzdyǧy siiaqty ärtürlı faktorlardy atap ötuge bolady.
Jastardyŋ arasynda ǧylymmen, sportpen, öner türlerımen tereŋ ainalysyp, dınge müldem qyzyqpaityndary da, özderın ateist sanaityndary da bar ekenın aita ketu kerek. Osy oraida, ministrlık basqa da müddelı memlekettık organdarmen, dıni bırlestıktermen, ükımettık emes ūiymdarmen bırlese otyryp, jastar arasynda dästürlı ūlttyq jäne tarihi qūndylyqtardy nasihattau, zaiyrlylyq qaǧidattaryn ılgerıletu, dındı radikaldy tūrǧydan ūǧynudyŋ qaupın tüsındıru jäne olardyŋ boiynda terıs dıni ideologiialarǧa qarsy immunitet qalyptastyru baǧytynda keşendı tüsındıru jūmystaryn jürgızude. Atap aitar bolsam, 2016 jyly aqparattyq-tüsındıru toptarynyŋ küşımen barlyq öŋırlerde jastarmen 9 myŋnan astam tıkelei ıs-şaralar ötkızılıp, onymen 700 myŋnan astam jastar qamtyldy.
Ministrlık 2016 jyly QR Bılım jäne ǧylym ministrlıgımen, elımızdıŋ jastarynyŋ aitarlyqtai keŋ tobyn bırıktırıp otyrǧan «Jas Otan» jastar qanatymen jäne Qazaqstan jastary kongresımen bırlese otyryp, jastar arasynda tüsındıru jäne aldyn alu jūmystaryn ıske asyrdy. Tūrǧyndardyŋ pıkırı boiynşa dınnıŋ dūrys tüsınıgın qalyptastyrudy jäne dıni ekstremizmnıŋ aldyn aludy mektep qabyrǧasynan bastau kerek. Būl maqsat 2016 jylǧy oqu jylynan bastap jalpy bılım beretın orta mektepterdıŋ 9-synyp oquşylary üşın engızılgen «Zaiyrlylyq jäne dıntanu negızderı» pänı şeŋberınde ıske asyryluda.
Jastarǧa qatysty bes baǧyt qolǧa alyndy
– Elordadaǧy dıni ahualdy qalai baǧalauǧa bolady?
– Astana qalasy aumaǧyndaǧy dıni ahual elımızde qalyptasyp otyrǧan dıni ahualmen qarailas. Qala äkımdıgınde Dın ısterı basqarmasy jäne Dın mäselelerın zertteu ortalyǧy jūmys atqarady.
Qazırgı taŋda Astana qalasynda 14 konfessiianyŋ müddesın bıldıretın 49 dıni bırlestık bar. Atap aitqanda, Qazaqstan mūsylmandary dıni basqarmasynyŋ 8 meşıtı, Orys pravoslavie ökılderınıŋ 6 şırkeuı, Rim-katolik şırkeuınıŋ 4 qauymy, protestanttyq baǧyttaǧy 28 bırlestık, 2 iudaistık, bır-bırden Bahai jäne Krişnaǧa tiesılı dıni bırlestıkter bar. Qala aumaǧynda tırkelgen barlyq dıni bırlestıktermen qarym-qatynas özara senımge negızdelgen dialogtyq alaŋ formaty aiasynda jüzege asyrylyp otyr. Astana qalasynyŋ Dın ısterı basqarmasy aqparattyq-tüsındıru, radikaldyq aǧymdardyŋ ūstanuşylaryna keŋes beru jäne oŋaltu ortalyqtarynyŋ qyzmetın ūiymdastyru, internettegı destruktivtı saittardy anyqtau jäne olarǧa tosqauyl qoiu siiaqty jūmystardy ıske asyruda. Jalpy, būl baǧyttaǧy jūmystar aldaǧy uaqytta pärmendı türde jalǧasa beretın bolady.
– Özıŋız basqaryp otyrǧan jaŋa ministrlıktıŋ qūramyna Bılım jäne ǧylym ministrlıgınıŋ jastar saiasaty salasyndaǧy funksiialary berıldı. Naqty qandai jūmystar qolǧa alyndy?
– Özderıŋızge belgılı, jyldyŋ basynda memlekettık jastar saiasaty mäselesı joǧarǧy deŋgeide talqylandy. Ministrlık öz tarapynan bes baǧyt boiynşa jūmys jürgızudı ūsyndy. Olar – auyl men qala jastary arasyndaǧy bailanysty nyǧaitu, äleumettık satyny damytu, jas otbasylardy qoldau, jastarmen jūmys ısteitın kadr äleuetın arttyru men vedomstvoaralyq üilestırudı küşeitu. Sonymen qatar, esterıŋızde bolsa, ötken jyly jastar forumy öttı. Forumda jastar arasynda jürgızılgen saualnama nätijesınde olardyŋ 60 paiyzy qoǧamdyq-saiasi ömırge belsene aralasamyz dese, qalǧandarynyŋ saiasatqa qyzyqpai, azamattyq bastamalarǧa qatysuǧa yntaly emes ekenı belgılı boldy. Būl degenımız – jastarymyz özın qoǧamda böten sanap, jat ūiymdardyŋ jetegıne erıp ketulerı mümkın degen söz. Sondyqtan da bızdıŋ negızgı mındetımız – memleket tarapynan jüzege asyrylyp jatqan jobalar men baǧdarlamalarǧa jastardy köptep tartu.
Qoǧamdaǧy äleumettık tūrǧydan jaǧdaiy tömen jastarmen de jūmysty jalǧastyrudamyz. Köp jaǧdaida būl kategoriiadaǧy jastarǧa arnalǧan jobalardy jüzege asyru barysynda mümkındıgı şekteulı jandarmen jūmystar jürgızıledı. Al jetımder, az qamtylǧan otbasynan şyqqan balalar men bas bostandyǧynan aiyrylyp, erkındıkke şyqqan, iaǧni qiyn jaǧdailarǧa tap bolǧan jastar jetkılıktı äleumettık qoldau şaralarymen qamtylmaǧan. Osyǧan säikes, memlekettık organdarmen jūmysta äleumettık jobalardy josparlaǧanda, jastardyŋ türlı satydaǧy äleumettık tobyn keŋınen qamtudy ūsyndyq. Sondai-aq, öŋırlerde jastardyŋ bos uaqytyn tiımdı demalyspen qamtamasyz etu boiynşa jelılık qarapaiym aşyq sport keşenderın, aula klubtaryn keŋeitu men şyǧyny az nysandarǧa jastardy jappai tartu boiynşa jūmystar jürgızılude.
Qarjylandyru kölemı ūlǧaidy
– Memlekettıŋ basty strategiiasynyŋ bırı – azamattyq qoǧam qūru. Ony qalyptastyruda qoǧamdyq ūiymdardyŋ orny men belsendılıgı qandai?
– Bügıngı taŋda ükımettık emes ūiymdar azamattyq qoǧam qūruda memlekettıŋ senımdı serıktesı bolyp otyr. Täuelsızdık jyldary Qazaqstanda Azamattyq forumdar, Äleumettık jobalar järmeŋkelerı, beiresmi kezdesuler, keŋester siiaqty ärıptestıktıŋ oŋ täjıribelerı qalyptasty. Mysaly, ırı dialogtyq alaŋdardyŋ bırı Azamattyq forum bolyp tabylady. Kezektı VII Azamattyq forum 2016 jyly qaraşa aiynda ötkızıldı. Forumǧa elımızdıŋ tükpır-tükpırınen 300-den astam ÜEŪ jinaldy. Forumnyŋ qorytyndylary boiynşa 2017-2018 jyldarǧa arnalǧan ıs-şaralar jospary bekıtılıp, ıske asyryluda.
Sonymen qatar, ükımettık emes ūiymdarmen özara ärekettesu boiynşa ministrlıktıŋ janynda Üilestıru keŋesı men Jūmys tobynyŋ, sondai-aq ortalyq jäne jergılıktı memlekettık organdardyŋ janynan qūrylǧan keŋester aiasynda serıktestık mehanizmın jetıldıru boiynşa jūmystar jürgızılude.
Memleket pen ÜEŪ özara ıs-qimylynyŋ tiımdı tetıkterınıŋ bırı – memlekettık-äleumettık tapsyrys. Osylaişa, ötken jyly memlekettık äleumettık tapsyrysty ıske asyrudy qarjylandyru kölemı 20%-ǧa ūlǧaityldy. 2015 jyly 7,1 mlrd bolsa, 2016 jyly 8,9 mlrd teŋgenı qūrady.
Qoǧamdyq ūiymdar azamattyq qoǧamnyŋ maŋyzdy instituty bolǧandyqtan, ÜEŪ qarjylandyrudyŋ jaŋa mehanizmderı – granttar men syiaqylar engızıldı. Granttyq qarjylandyru operatory qūryldy. 2016 jyly jalpy kölemı 208 mln teŋgenı qūraityn 11 joba jüzege asty. Biylǧy jyly granttyq qarjylandyru kölemı 3 esege deiın östı. Osy jyldan bastap ükımettık emes ūiymdarǧa äleumettık mäselelerdı şeşuge qosqan ülesı üşın syiaqylar berıletın bolady.
Qoǧamdyq maŋyzdy mäseleler boiynşa azamattyq qoǧamnyŋ pıkırın bıldıru maqsatynda tūraqty türde Qoǧamdyq keŋester qyzmet etedı. Qoǧamdyq keŋesterdıŋ qūramyna azamattyq qoǧamnyŋ, ÜEŪ, saiasi partiialar, käsıpodaqtardyŋ ökılderı kıredı. Bügıngı taŋda respublikada 227 qoǧamdyq keŋes qūrylǧan, olar qoǧamdyq maŋyzdy sūraqtar boiynşa 450-den astam qoǧamdyq tyŋdaular ötkızdı. Memleket basşysy Qazaqstan halqyna Joldauynda atap ötkendei, aldaǧy uaqytta da memleket ÜEŪ-darǧa kömek körsetuın jalǧastyra beretın bolady.
– Äŋgımeŋızge rahmet!
Gülmira AIMAǦANBET,
«Astana aqşamy»